Kvillinq janrı müasir dövrdə çox populyar olan bir incəsənət növüdür. Bu, cürbəcür rəngli kağızlardan oyuncaqlar, rəsm əsərləri və bəzək əşyalarının hazırlanması sənətidir.

Bu incəsənət növü Avropada 15-ci əsrin əvvəllərində yaranıb, lakin 19-cu əsrin sonları - 20-ci əsrin əvvəllərində demək olar ki, tamamilə tənəzzülə uğrayıb. Yalnız 21-ci əsrin əvvəllərində kvillinq yenidən populyarlıq qazanmağa başlayıb. 

Kvillinqdə 20-yə yaxın alətdən istifadə olunur, lakin əsas alətlər "fırrağan”, yapışqan və ən əsası güclü fantaziyadır. 

Azərbaycanın qədim, həm də təbiəti etibarı ilə dilbər guşəsi olan Şəkidə dünyaya göz açan Aysel Natiq qızı Abdullazadə ölkəmizdə bu incəsənət növü ilə məşğul olan çox az sayda gənc sənətkarlardandır. O, nə İncəsənət Universitetini, nə də bu sənətlə bağlı bilgi verən hansısa kursu bitirib. 

"Doğrusu, heç vaxt incəsənətlə məşğul olmaq barədə düşünməmişəm”, - Aysel söhbətə başlayır:

"2013-cü ildə Bakı Dövlət Universitetinin tarix fakültəsini bitirdikdən sonra bir müddət işsiz qalmışdım və nə iləsə məşğul olmaq üçün kitab, internetdə müxtəlif məqalələr oxuyur və təsadüfən kvillinq sənət növünə rast gəldim və bu diqqətimi cəlb etdi. O vaxt Bakıda kvillinqlə məşğul olmaq üçün nə kağız, nə də alətlər var idi, ona görə də internet vasitəsilə onları sifariş edir, yaxud dostlarım xaricdən gətirirdilər”. 

Aysel ilk dəfə 2014-cü ilin fevral ayında Gənclər və İdman Nazirliyinin təşəbbüsü ilə "Asan xidmət” mərkəzində Gənclər gününə həsr olunan sərgidə iştirak edib.

2014-cü ilin avqust ayında isə İçərişəhərdəki "Natəvan” qaleryasında gənc rəssamların sərgisində Ayselin də bir neçə əsəri nümayiş etdirilib. Həmin sərgidən sonra gənc rəssam bir neçə sifariş alıb, o cümlədən bir müəllimə işlədiyi məktəb üçün bir neçə əsər sifariş edib. Hazırda Aysel Abdullazadə hər bazar günü "Natəvan” qalereyasında uşaqlar üçün kvillinq sənətindən məşğələlər keçir. Aprelin 13-də elə həmin mərkəzdə gənc sənətkarın əl işlərindən ibarət əsərlərin sərgisi keçiriləcək.  (Modern.az)