İki min illik tarixi olan Corat tarixi abidələrlə zəngindir. Bu abidələrin içərisində hamamlar da var.
Xeberle.com-un məlumatına görə, Hacı Məcid tarixi hamamı uzun illərdir ki, baxımsız vəziyyətdədir, içərisi zibilliklə doludur. Tarixi abidədə uzun zamandır ki, bərpa-təmir işləri aparılmadığından köhnəlməyə məruz qalıb. Onu da qeyd edək ki, hamamı tarixi abidələr siyahısına salınıb.
Sözügedən tarixi hamam Sumqayıt şəhərinin Corat qəsəbəsində, Səməd Vurğun küçəsindən 60-70 metr aralıda, qəsəbənin daxilinə uzanan küçənin sağ tərəfində yerləşir. Corat qəsəbəsində mövcud olmuş iki hamamdan biridir. Qəsəbə sakinləri arasında köhnə hamam olaraq tanınır. Hamamın XVI əsrdə tikilməsi qeyd olunur. Sonuncu dəfə 1985-ci ildə təmir olunub. 1988-ci ilə qədər istifadə olunan hamam hazırda istifadəsiz və baxımsız vəziyyətdədir.
Ümid edək ki, qədim hamam tez bir zamanda zibillikdən təmizlənəcək və bərpa olunacaq. Mədəni abidələrimizi qorumaq elə tariximizi qorumaq deməkdir.
Məsələni davam etdirəcəyik.
Elşən Yəhyayev
Xəbərdən istifadə edərkən istinad etmək vacibdir.
