Sumqayıt Dövlət Rəsm Qalareyasında gənc və peşəkar rəssam Nəsibə Şükürovanın Azərbaycan Respublikasının Müstəqillik gününə həsr olunmuş "Mənim dünyam” adlı fərdi sərgisi keçirilib.
Xeberle.com-un məlumatına görə, Sumqayıt şəhər Mədəniyyət və Turizm İdarəsi və Sumqayıt Dövlət Rəsm Qalareyasının birgə təşkilatçılığı ilə keçirilən sərgidə müxtəlif texnikada işlənmiş ümümilikdə 14-ə qədər rəsm və 36 dekorativ tədbiqi sənət işləri nümayiş olunub.
Sərgidə  çıxış edən Sumqayıt Dövlət Rəsm Qalereyasının direktoru Ellada Həsənova, əməkdar incəsənət xadimi, sənətşünas Ziyadxan Əliyev, peşəkar rəssam Vaqif Ucatay, Mədəniyyət və Turizm İdarəsinin məsləhətçisi Ceyran Axundova və digər qonaqlar rəssamı təbrik edərək gənc rəssamın estetik dünya görüşünə malik olduğunu  və öz yeri və dəsti-xətti olan rəssamlardan biri olduğunu qeyd ediblər.
Həmçinin, onun bənzərsiz əsərlərinin milli təsviri sənətimizin gözəl nümunələrindən olduğu vurğulanıb.
Çıxış edənlər rəssama yaradıcılıq uğurları arzu ediblər.
Sərgidə Hacı Zeynalabdin qəsəbəsinin icra başçısı Nasir Rzayev, Sumqayıt şəhər Mədəniyyət evinin direktoru Elnarə Rəşidova, Sumqayıt şəhərinin rəssam memarı Vaqif Nəzirov, Ə.Bakıxanov adına UİM-nin direktoru Vaqif Süleymanov, 28 May Mədəniyyət Evi, H.Ərəblinski adına teatrın baş rəssamı Nizami Dadaşov, "Dostluq” Mədəniyyət Evinin direktoru Aslan Fətullayev və Bülbül adına 2 saylı UİM-nin  kollektivi və  digər qonaqlar iştirak ediblər.
Qeyd edək ki, sərgi 15 gün davam edəcək.