31 dekabr Dünya Azərbaycanlılarının Həmrəyliyi Günü və Yeni il münasibətilə Sumqayıt şəhərinin mədəniyyət müəssisələrində silsilə tədbirlər davam etdirilir.    Sumqayıt şəhər Mədəniyyət və Turizm Idarəsinin mətbuat xidmətindən Xeberle.com-a verilən məlumata görə, N.Nərimanov adına mədəniyyət mərkəzində uşaqlar üçün yeni il şənliyi keçirilib. Üç gün davam edən şənlikdə bayramın atributu olan Şaxta baba, Qar qız, Küpəgirən qarı, İlin padşahı - Meymunun uşaqların iştirakı ilə keçirdikləri bir-birindən maraqlı oyunlar, şən rəqslər tədbirə xoş ovqat qatıb. Tədbirin sonunda uşaqlara yeni il hədiyyələri paylanıb.
Bütün uşaq musiqi və incəsənət məktəblərində bayram şənliyi keçirilib.
Q.Qarayev adına uşaq musiqi məktəbində keçirilən bayram tədbirində Azərbaycan xalqının birliyi, həmrəyliyinin önəmi haqqında danışılıb. Məktəbin xalq çalğı alətləri, simli alətlər, fortepiano şöbələrinin ifasında maraqlı əsərlər səslənib.
Bütün şəhər kitabxanalarında həmrəylik gününü ehtiva edən ədəbiyyatların sərgisi təşkil olunub. Uşaq kitabxanalarının bağçalarda təşkil etdiyi bayram şənlikləri körpələrin sevincinə səbəb olub.
Mədəniyyət evlərinin kollektivləri "N” saylı hərbi hissələrdə konsert proqramı ilə çıxış edib, fəxri fərmanlara layiq görülüb.
Xatırladaq ki, şəhərin müəyyən olunmuş ərazilərində mədəniyyət evlərinin özfəaliyyət kollektivlərinin çıxışları bir neçə gün davam edəcək.