Sumqayıt şəhər Mədəniyyət və Turizm İdarəsinin mətbuat xidmətindən Xeberle.com-a verilən məlumata görə, Sumqayıtın mədəniyyət işçiləri 31 dekabr Dünya Azərbaycanlılarının Həmrəyliyi günü və Yeni ili əsgər və zabitlərimizlə birgə qeyd ediblər.
Belə ki, C.Cabbarlı adına mədəniyyət evinin kollektivi Müdafiə Nazirliyinin "N” saylı hərbi hissəsində konsert proqramı ilə çıxış edib. Konsertdə mədəniyyət evinin solistlərinin ifasında xalq və bəstəkar mahnıları oxunub, "Turan” rəqs qrupunun çıxışı əsgər və zabitlərimiz tərəfindən maraqla qarşılanıb.
Corat qəsəbə mədəniyyət evinin kollektivi də əsgərlərimizi öz ifaları ilə sevindiriblər. Tanınmış ifaçı Təhmiraz Şirinovun və gənc ifaçıların çıxışı əsgər və zabit heyətində böyük ruh yüksəkliyi yaradıb.
Şəhər Mədəniyyət evinin kollektivi Sərhəd qoşunlarının "N” saylı hərbi hissələrində konsert proqramı ilə çıxış edib. Konsertdə meyxanaçı Ədalət Dağlının, mədəniyyət evinin "Zəminxarə” instrumental ansamblının və solo ifaçıların çıxışı əsgər və zabitlərimizn marağına səbəb olub. Tədbirdə Şaxta baba hərbçilərin övladlarını bayram hədiyyələri ilə sevindirib.
"28 May” mədəniyyət evinin "Ravil” rəqs qrupu və solistləri də öz çıxışları ilə hərbi hospitalda müalicə alan əsgər və zabitlərimizi təbrik edib.
4 saylı şəhər klubunun kollektivi öz ifaları ilə əsgərlərimizə xoş ovqat bəxş ediblər. Belə ki, klubun "Meqa” və qızlardan ibarət "Mehriban” rəqs qrupları, "Bülbüllər” vokal qrupu, "Zirvə” instrumental ansamblının solistləri əsgər və zabitlər arasında xoş ovqat yaradıblar. Tədbirdə bayramın atributu olan Şaxta babanın yeni il təbriki əsgərlərimizin sevincinə səbəb olub. 
Qeyd edək ki, kollektivlərimiz çıxışlarına görə hərbi hissə rəhbərlikləri tərəfindən yüksək qiymətləndirilərək fəxri fərmanla təltif olunublar.