Sumqayıt Dövlət Dram Teatrında cəbhədəki vəziyyətlə bağlı iclas keçirildi. Direktor İslam Həsənovun təklifi ilə şəhidlərin xatirəsi bir dəqiqəlik sükutla yad olundu.
Baş rejissor əməkdar artist Firudin Məhərrəmov hər kəsin Ali Baş Komandan İlham Əliyevin qətiyyətli addımını dəstəklədiyini və ürəyi Vətən eşqi ilə döyünən igidlərin "döyüş” əmrinə hazır olduğunu bildirdi. Qüdrətli Ordumuzun peşəkar heyəti düşmənin gözünün odunu alıb, biz də boynumuza düşən vəzifənin öhdəsindən layiqincə gəlməliyik deyə baş rejissor fikrini səsləndirdi. İnformasiya müharibəsində, sosial şəbəkələrdə daha məntiqli və səviyyəli fikirlərin paylaşımında öz töhfəmizi verməliyik. Acığa, kinə söykənmiş təhqiramiz ifadələr işlətməkdənsə tarixi faktlara, dəmir məntiqə istinad edən informasiyalar yayımlayaq. Biz öz barışmaz mövqeyimiz, mücadiləmizlə bərabər mədəniyyətimizi də nümayiş etdirməliyik.
Aktrisa Sədaqət Nuriyeva Ordumuzun şücaətindən qürurla danışaraq, " lazım gələrsə cəbhə bölgəsində sənətimizlə xidmət edək” təklifini verdi.
Aktrisa Xatirə Süleymanovanın " Şəhidlərə ağlamamalıyıq, əksinə onlarla fəxr etməliyik” fikri alqışlarla qarşılandı.
Nərmin Səfərovanın xatirələri nə qədər acı olsa da aktrisa çıxışını nikbin notlarla bitirdi. Onun atası könüllü olkaraq döyüşlərə qatılıb. Bugün başında qəlpə gəzdirsə də yenə cəbhəyə getmək istəyir
Daha sonra şəhid qardaşı Rövşad İlyasov,əməkdar artistlər İlahə Səfərova, Ulduzə Nəsir, Yeganə Məmmədvəliyeva, direktor müavini Vidadi Məmmədov,truppa müdiri Zöhrəli Əliyev, Dağlar Rüstəmov, Vəfa Qurbanova və digərləri çıxışlarında Milli Ordumuzun döyüş bölgəsində göstərdiyi şücaətdən, artıq beynəlxalq aləmin də Azərbaycanın haqq işini dəstəklədiyindən danışdılar. Hər kəsdə "Qələbə bizimlədir” əminliyi olduğu bildirildi.
Sonda baş rejissor Firudin Məhərrəmov vətənpərvərlik ruhunda hazırlanan tamaşaların hərbi hissələrdə oynanılması təklifi ilə çıxış etdi.(moderator.az)