Sumqayıt Regional Mədəniyyət İdarəsinə tabeli Əhməd Bakıxanov adına 1 nömrəli Uşaq incəsənət məktəbində görkəmli bəstəkar Cahangir Cahangirovun 100 illik yubiley tədbiri keçirilib. Tədbirdə bəstəkarın həyat və yaradıcılığından geniş məlumat verilərək, əsərlərindən ibarət nümunələr səsləndirilib.
Məktəbin uşaq xorunun ifasında "Məhsul mahnısı", xanəndələrin ifasında "Ana Kür", "Teymurun mahnısı", "Alagöz", xalq çalğı alətləri ansamblının ifasında "Bakım mənim", "Zərif gülüşlüm", "Yallı" və digər əsərlər səsləndirilib.
Konsert proqramından sonra çıxış edən idarə rəisi Rəşad Əliyev dahi bəstəkarın geniş və zəngin yaradıcılıq ənənələrinin olduğunu və o ənənələri bu gün məktəbin yetirdiyi tələbələrin davam etdirdiyini bildirib. R.Əliyev həmçinin H.Z.Tağıyev qəsəbəsində yerləşən məhdud imkanlara malik, təmirsiz bir məktəbdə belə istedadlı və bədii-estetik zövqə malik şagirdlərin olmasından fərəh duyduğunu qeyd edib. Sonda növbəti illərdə məhz bu məktəbin əsaslı təmir olunacağına və şagirdlərin ixtiyarına yeni görkəmdə veriləcəyinə ümüd etdiyini bildirib.
Xəbərdən istifadə edərkən istinad etmək vacibdir.
