Sumqayıt Regional Mədəniyyət İdarəsinə tabe olan Mərkəzləşdirilmiş Kitabxana Sisteminin Mərkəzi uşaq kitabxanasında N.Tusi adına 12 nömrəli tam orta məktəbin şagirdlərinin iştirakı ilə əsrlərin qaynaqlarından süzülüb gələn qədim el bayramı Novruz münasibətilə "Xoş niyyətli, xoş arzulu təbiətin Bahar qızı” adlı tədbir keçirilib.
Kitabxananın baş mütəxəssisi Azərbaycan xalqının milli ruhunu və yaddaşını, onun daxili aləmini bütün zənginliyi ilə yaşadan Novruz bayramının tarixi, bayram adət-ənənələri haqqında ətraflı məlumat verib.
Sonra iştirakçılar Novruza aid folklor nümunələrindən ibarət kitablar və baharın gəlişini əks etdirən əl işlərindən ibarət "Xoş növraqlı baharım” adlı sərgi-guşə ilə tanış olublar.
12 nömrəli məktəbin ibtidai sinif müəlliməsi İlhamə Axundzadə iştirakçıları Novruz bayramı münasibətilə təbrik edərək milli adət-ənənələrin gələcək nəsillərə ötürülməsinin və milli-mənəvi dəyərlərimizin qorunub saxlanılmasının vacibliyini vurğulayıb.
Uşaqlar Novruza, bahara aid şeirlər söyləyib, mahnılar ifa ediblər.
Novruzla bağlı göstərilən kiçik səhnəciklər, milli oyunlar, rəqslər, haxıştalar bayram şənliyinə rəngarənglik qatıb.
Milli geyimlərimizlə və milli atributlarla əsl bayram əhval-ruhiyyəsi yaşadan bayram tədbiri "Yallı” rəqsi ilə yekunlaşıb.
Xəbərdən istifadə edərkən istinad etmək vacibdir.
