Respublikamızın hər yerində olduğu kimi, qubadlılı məcburi köçkünlər də dövlətimizin başçısının tapşırığı ilə icra olunan kütləvi tibbi müayinədən keçirilirlər. Müayinələr Sumqayıt şəhərində fəaliyyət göstərən Qubadlı Rayon Mərkəzi Xəstəxanasında aparılır.

Məcburi köçkünlər ultrasəs-müayinə, stomatologiya, terapiya, kardioqrama və digər növ tibbi profilaktik müayinələrdən keçirlər. Səyyar həkim briqadaları məcburi köçkünlərin məskunlaşdıqları yaşayış məntəqələrində müayinələr aparır.

Qubadlı Rayon Mərkəzi Xəstəxanası müasir tibbi avadanlıqlarla təchiz edilib. Gün ərzində tibb ocağında 200-dən çox vətəndaş müayinə olunur. Xəstəxananın baş həkimi Nüsrət Əhmədov bildirib ki, cari il fevral ayının 15-dən indiyədək 14 min Qubadlı sakini tibbi müayinədən keçib. Bunlardan 6700-ü Bakıda, 6000-i Sumqayıtda, 1300-ü isə digər rayonlarda dövlət hesabına müayinədən keçib. Ümumilikdə, may ayınadək respublikanın 41 rayon və şəhərində məskunlaşan 36685 nəfər Qubadlı rayon sakininin tibbi müayinədən keçməsi nəzərdə tutulub.

Tibbi müayinədən keçən Qubadlı rayon sakinləri bu cür aksiyanın keçirilməsini yüksək qiymətləndirir və sağlamlıqlarına göstərilən diqqət və qayğıya görə dövlətimizin başçısına minnətdarlıqlarını bildirirlər.