Bildiyiniz kimi, Nazirlər Kabineti "Yeni növ koronavirus (COVID-19) infeksiyası ilə mübarizə tədbirlərində iştirak edən tibb işçilərinin sosial müdafiəsinin gücləndirilməsi haqqında” Azərbaycan Respublikası Prezidentinin 2020-ci il 18 mart tarixli 1947 nömrəli Sərəncamının icrasını təmin etmək məqsədilə qərar qəbul edib. Bu qərara əsasən tibbi profilaktik tədbirləri həyata keçirən işçilərə, təcili tibbi yardım xidməti göstərən, həmçinin bioloji materialın müayinəsi ilə məşğul olan laboratoriya işçiləri, Məhkəmə Tibbi Ekspertiza və Patoloji Anatomiya Birliyinin və Azərbaycan Qida Təhlükəsizliyi İnstitutunun işçilərinə, pasiyentlərə stasionar tibbi xidmət göstərən bütün tibb işçilərinə qanunla nəzərdə tutulmuş qaydada 2020-ci il martın 1-dən iyunun 1-dək olan müddət üçün müvafiq məbləğ ödəniləcək.
Bəs Sumqayıtda bu qərar hansı tibb işçilərinə şamil olunacaq?
"Sözügedən qərara uyğun olaraq Sumqayıt şəhər tibb işçilərinin də maaşlarına ödəmələr köçürüləcək”.
Bunu Sumqayıt şəhər Səhiyyə Şöbəsinin müdiri Səkinə Sadıxova Xeberle.com-a açıqlamasında bildirib. Qurum rəsmisi həmçinin qeyd edib ki, verilmiş qərar Sumqayıt səhiyyəsində çalışan bir qisim şəxslərə də aiddir və bu barədə "Tibbi Ərazi Bölmələrini İdarəetmə Birliyi” publik hüquqi şəxs tərəfindən əmr verilib. "Sumqayıt şəhər Təcili və Təxirəsalınmaz Stansiyanın bütün əməkdaşları - sürücülər, xadimələr, operatorlar, tibb bacıları və həkimlər, həmçinin gücləndirilmiş iş qrafiki ilə çalışan şəhər və uşaq poliklinikaları, 1 saylı Sumqayıt şəhər xəstəxanasının yoluxucu xəstəliklər şöbəsinin əməkdaşları, sahə həkimləri, infeksionistlər, pediatrlar əmrdə göstərilən təlimata uyğun olaraq ödəmələrini alacaqlar. Hazırda səhiyyə şöbəsinin mühasibatlığında əmrə əsasən müvafiq sənədləşmə işləri aparılır, say tərkibi müəyyənləşdirilir deyə proses nisbətən uzanır. Sənədləşmə işləri bitdikdən sonra əmrə əsasən ödəmələr veriləcək və bu barədə işçilərə məlumat verilib”, - deyə S.Sadıxova söyləyib.
Xatırladaq ki, Nazirlər Kabineti "Yeni növ koronavirus (COVID-19) infeksiyası ilə mübarizə tədbirlərində iştirak edən tibb işçilərinin əməkhaqlarına müddətli əlavənin müəyyən edilməsi barədə” qərarı ilə aşağıda ətraflı məlumat ala bilərsiniz. Adıçəkilən infeksiya ilə əlaqəli əmək şəraitinə görə dövlət tibb müəssisələrində çalışan işçilərin əməkhaqlarına müddətli əlavənin məbləği aşağıdakı kimi müəyyən edilib:
- tibbi profilaktik tədbirləri həyata keçirən işçilərə - aylıq vəzifə (tarif) maaşının üç misli məbləğində;
- təcili tibbi yardım xidməti göstərən tibb işçilərinə, həmçinin bioloji materialın müayinəsi ilə məşğul olan laboratoriya işçilərinə, o cümlədən Məhkəmə Tibbi Ekspertiza və Patoloji Anatomiya Birliyinin və Azərbaycan Qida Təhlükəsizliyi İnstitutunun işçilərinə - aylıq vəzifə (tarif) maaşının dörd misli məbləğində;
- pasiyentlərə stasionar tibbi xidmət göstərən işçilərə - aylıq vəzifə (tarif) maaşının beş misli məbləğində.
Göstərilən müddətli əlavə iş vaxtına mütənasib olaraq 2020-ci il martın 1-dən iyunun 1-dək olan müddət üçün ödənilir.
Səhiyyə Nazirliyinə və İcbari Tibbi Sığorta üzrə Dövlət Agentliyinə tapşırılsın ki, yeni növ koronavirus (COVID-19) infeksiyası ilə mübarizə tədbirlərinə cəlb edilən özəl tibb müəssisələri işçilərinin və könüllülərin əməyinin ödənilməsi şərtlərinə, habelə tibbi profilaktik tədbirləri həyata keçirən işçilərin əhatə dairəsinin müəyyən edilməsinə dair təkliflərini beş gün müddətində hazırlayıb Nazirlər Kabinetinə təqdim emək tapşırılıb.
Səhiyyə Nazirliyi və İcbari Tibbi Sığorta üzrə Dövlət Agentliyi Azərbaycan Respublikasının Maliyyə Nazirliyi ilə birlikdə bu Qərardan irəli gələn digər məsələləri həll etməlidirlər.
Qeyd edək ki, Nazirlər Kabineti "Yeni növ koronavirus (COVID-19) infeksiyası ilə mübarizə tədbirlərində iştirak edən tibb işçilərinin sosial müdafiəsinin gücləndirilməsi haqqında” Azərbaycan Respublikası Prezidentinin 2020-ci il 18 mart tarixli 1947 nömrəli Sərəncamının icrasını təmin etmək məqsədilə bu qərarı qəbul edib.
Xədicə Səxavətqızı
Xeberle.com
Xəbərdən istifadə edərkən istinad etmək vacibdir.
