"Sumqayıtda pandemiya xəstəxanasında hazırda 305 xəstə var, onlardan 12-si isə reanimasiyadadır".
Bu sözləri Xeberle.com-a koronavirus xəstələri haqqında məlumat verərkən Sumqayıt şəhər Səhiyyə Şöbəsinin müdiri Səkinə Sadıxova söyləyib. O, həmçinin bildirib ki, vəziyyət həqiqətən ciddidir, müraciət edən xəstələri xəstəxanaya yerləşdirə bilmirlər, çünki yer yoxdur. "Bu gün üçün 305 xəstəmiz var ki, onlardan 30 nəfərini sabah evə yazacağıq və yerinə yeni xəstələr qəbul ediləcək. Sumqayıt şəhərində ölüm sayının və yoluxanların çox olmasına səbəb tibbi avadanlıqların məhdud sayda olması və yer çatışmazlığı deyil, əsas səbəb xəstələrin xəstəxanaya gec müraciət etməsidir. Dünən 37 yaşlı pasiyentimizi itirdik, onun da ölümünə səbəb gec müraciət etməsi və yanaşı olaraq talassemiya daşıyıcısı olması idi. Risk faktoru olan xəstələr xüsusilə diqqətli olmalı və sağlamlıqlarına daha ciddi yanaşmalıdırlar.
Günümüzdə xəstəxanada 9 süni tənəffüs aparatımız var, 3 ağır xəstə isə süni tənəffüs aparatına qoşulmuşdur. Yəni aparatın sayının az olması hazırda problem deyil, çünki ən son həddə xəstə aparata qoşulur. Vaxtında xəstəxnaya müraciət edilməlidir. Bu yaxınlarda modul tipli xəstəxananın da açılışını edəcəyik və xəstələr ora köçürüləcək. Xəstəxana xəstələri qəbul etməyə tam hazırdır", - deyə Səkinə Sadıxova qeyd edib.
Xədicə Səxavətqızı
Xəbərdən istifadə edərkən istinad etmək vacibdir.
