Son vaxtlar ərəblərin Azərbaycana səfərləri müntəzəm xarakter almağa başlayıb. Birləşmiş Ərəb Əmirliklərinin vitse-prezidenti və Baş naziri, Dubayın Əmiri Əlahəzrət Şeyx Məhəmməd bin-Rəşid Əl-Maktum, Şeyxdən bir neçə gün öncə onun varisi Hamdan Muhammed Bin Rəşid əl-Maktum da Azərbaycanda qeyri-rəsmi səfərdə olmuşdu.
Və bu səfərlərin məntiqi davamı kimi Aərbaycan prezidenti İlham Əliyevin Səudiyyə Ərəbistanına rəsmi səfəri baş tutdu.
Görüşdə iqtisadi, xüsusilə neft-qaz, turizm, kənd təsərrüfatı sahələrində, eləcə də biznes dairələri arasında əməkdaşlığın genişləndirilməsi perspektivləri, qarşılıqlı sərmayə qoyuluşu ilə bağlı məsələlər müzakirə edildi.
Bu səfərlərdən sonra politoloqlar regionda yeni bir situasiyanın yarandığını deməyə başlayıblar.
Politoloq Vəfa Quluzadə açıqlamasında deyib ki, doğrudan da regionda yeni bir situasiaya yaranıb: "Əgər Amerika İranla yaxınlaşırsa, ABŞ-ın müttəfqi olan ərəb ölkələri də İranla siyasətini dəyişməlidir”.
İndiyə qədər bu ölkələr arasında xeyli qarşıdurma vardı. Yeni mərhələdə bu münaqişələr aradan çıxmalıdır".
Politoloq hesab edir ki, bunun fonunda ölkəmiz çox əlverişli bir vəziyyətdə qərarlaşıb: "Ona görə ki, bizim hər iki tərəflə çox yaxşı əlaqələrimiz var. Üstəlik, Azərbaycan neft ölkəsidir, hər iki düşərgəyə həm dəxlimiz, həm də təsirimiz var”.
Daha ciddi faktor isə Azərbaycanın enerji layihələri ilə böyük nüfuz qazanmasıdır.
Ekspert deyir ki, çəkiləcək TANAP xəttində İranın da iştirakı müzakirə edilir: "Onun neftinin Avropaya çıxması lazımdır. Ərəb ölkələri ilə İranı da bir mövqeyə gətirən bu məsələdir”.
Prezident indi Səudiyyə Ərəbistanına gedib, güman ki, yaxın zamanlarda İrana da səfər edəcək.
Bütün bu məsələlər yeni strategiyadan xəbər verir.
V. Quluzadə hesab edir ki, bu yeni vəziyyətin qarantı ABŞ və Aİ-dır: "Azərbaycanın yeni daxil olduğu sistemə Rusiya heç cür təsir edə bilməyəcəkdir. Çünki Ukrayna avantürasından sonra özünə gələ bilmir və artıq heç bir təhlükə daşımır”. (news.atv.az)
Xəbərdən istifadə edərkən istinad etmək vacibdir.
