Miqrasiya şərtləri sərtləşdirilir.

Rusiyadan Azərbaycana həmvətənlərimizin qayıtması problemin pik nöqtədə olduğunu göstərmir.

Bu sözləri iqtisadçı-ekspert Oqtay Haqverdiyev Rusiyada yaşayan miqrantların (həmyerlilərimizin) qayıtmasının ölkə bazarına təsirini şərh edərkən bildirdi.

Onun sözlərinə görə, insanların özündə belə orda yaşayan azərbaycanlıların say göstəriciləri barədə yanlış informasiya var:

"İnsanlar deyirlər ki, Rusiyada 2 milyon nəfər azərbaycanlı yaşayır. Rusiyanın özünün statistik məlumatlarına baxsaz görərsiz ki, 500-600 minə qədər həmyerlilərimiz qonşu ölkəyə gedib-gəlir. Rusiyada yaşayan azərbaycanlıların sayı isə şübhəsiz çoxdur. Söhbət əmək miqrantlarından gedir”.

Onun sözlərinə görə vətənə qayıdan həmyerlilərimizin sayı çox olsa, bu, bazarda işsizliyin çoxalmasına səbəb ola bilər:

"60-70 minə yaxın azərbaycanlı Rusiya bazarını tərk edib. Bir çoxları Azərbaycanın özünə və ya başqa ölkələrə gediblər. Amma bütövlükdə götürdükdə vətənə qayıdan əmək miqrantlarının sayının artması bazarda işsizliyin yaranmasına səbəb olacaq. Onlar üçün Azərbaycan bazarında iş yoxdur” - deyə, iqtisadçı qeyd edib.

Məsələ ilə bağlı iqtisadçı-ekspert Rəşad Həsənovun da fikrini öyrəndik.

Rəşad Həsənovun sözlərinə görə, orda yaşayan azərbaycanlılar Rusiyanın iqtisadi vəziyyətinin düzələcəyinə ümidlə baxır:

"Hazırda Rusiyada dövlət tərəfindən ciddi təbliğat aparılır – "Rusiya dayanıqlıdır”, "Rusiya böhrandan çıxa bilər” və s.. Eyni zamanda, son günlər (təxminən 20 gün, bir ay ərzində) müşahidə olunan tendensiya ondan ibarətdir ki, rublda nisbətən möhkəmlənmə gedir və hələ də zərər də eləmiş, iflası yaxınlaşan vətəndaşlar da Rusiyanın gələcəyinə ümidlə baxır və Azərbaycandakı vəziyyəti gözdən keçirən vətəndaş ölkəyə qayıtdıqdan sonra nə edəcək sualı üzərində düşünür”.

Ekspert qeyd edir ki, onların əmək bazarına qayıtması bazara fəsadlı ola bilər:

"Onların ölkə bazarına qayıtmasını əngəlləmək üçün bizim nə mənəvi, nə də hüquqi haqqımız var, amma bütövlükdə götürdükdə bu iqtisadiyyatımıza zərərli ola bilər. Belə ki, dövlətin sosial yükü artacaq, bazarda əmək haqlarının artmasına olan inam da azalacaq. Belə ki, devalvasiyadan sonra əmək haqları artmalı idi”.

"Rusiya hökuməti ölkədə işsizliyin artmasının qarşısını almaq üçün rus vətəndaşlarının xeyrinə də bəzi qərarlar qəbul edib. Belə ki, miqrantlar üçün dil və s. kimi tələblər qoyulması, imtahana getmək üçün ödənişlərin artırılması əmək miqrantları üçün faydalı deyil” - deyə, ekspert bildirir.

Məlumat üçün bildirək ki, Rusiya Federal Miqrasiya Xidməti (FMX) əmək miqrantları ilə bağlı son göstəriciləri açıqlamışdı.

Belə ki, FMX-nin məlumatına görə, hazırda Rusiyada 558,8 min azərbaycanlı yaşayır.

2015-ci ilin üç ayı ərzində onların sayı 23,7 min nəfər, yaxud 4,1% azalıb.

Ümumilikdə isə 2014-cü ilin aprelindən 2015-ci ilin aprelinədək Rusiyanı 34 min azərbaycanlı tərk edib.

Üç ayın yekununa görə vəziyyət belədir: Rusiyanı 111,7 min Özbəkistan vətəndaşı, 37,5 min qırğız, 27,4 min tacik tərk edib.

Eyni zamanda, bu ölkədə Ermənistan (16,3 min nəfər), Belarus (18,5 min), Çin (19,5 min), Qazaxıstan (46,8 min) və Ukrayna (137,3 min) vətəndaşlarının sayı artıb.

Ölkədən gedənlərin sayı Ukraynadan gələnlərin sayı ilə kompensasiya olunub – yanvardan aprelədək Rusiyaya gələn ukraynalıların sayı 137 min nəfər artıb.

Ümumilikdə aprelin əvvəlinə olan məlumata görə, Rusiyada 11 milyona yaxın xarici ölkə vətəndaşı var. Bir il əvvəl – 2014-cü ilin aprelində onların sayı 10,8 mln. nəfər olub.  (oxu.az)