"Bu çox mühüm bir səfərdir. Azərbaycan 44 günlük müharibədən sonra keçən zaman ərzində regionda söz sahibi olan regional güclərdən birinə çevrilmiş dövlətdir. Qafqazda demək olar ki, bütün proseslərdə aparıcı söz sahibidir. İraqın bir bölgəsi olan regional Kürd Muxtariyyətinin prezidenti Neçirvan Bərzani Türkiyə ilə davamlı şəkildə müsbət əlaqələr quran və Türkiyənin strateji partnyorlarından biri kimi əsas mövqedədir”.
Bunu saytımıza açıqlamasında millət vəkili Müşfiq Məmmədli bildirib. O qeyd edib ki, Azərbaycanın İraqla münasibətləri daha da irəliyə aparması baxımından bu, çox mühüm bir görüşdür:
"Bu görüşün nəticələri həm Orta Şərqdə, həm Qoşulmama Hərəkatına üzv ölkələr çərçivəsində atılan addımlar mövqeyindən baxsaq, çox önəmlidir. Xüsusən enerji sahəsində İraq hökuməti ilə Türkiyə arasında olan əlaqələrdə Kürdüstan bölgəsinin çox mühüm yeri vardır”.
Millət vəkilinin sözlərinə görə, mədəni əlaqələrə diqqət yetirdikdə bir çox məqamı qeyd etmək lazımdır:
"İstər Gürcüstanın, istər Ermənistanın Kürdüstan regional bölgəsində konsulluqları var. Azərbaycanın İraq dövlətində diplomatik nümayəndəliyi var. O cümlədən konsulluğun açılması çox böyük əhəmiyyət kəsb edir. Biz bir şeyi də nəzərdən qaçırmamalıyıq ki, həmin bölgədə türkmən əhalisi də kifayət qədər yaşayır. Onların Azərbaycana olan münasibəti hansı səviyyədədir bilirik. O baxımdan oradakı qardaşlarımızla bizim əlaqələrimizin daha üst səviyyəyə keçirilməsi çox önəmlidir”.
M. Məmmədli sonda qeyd edib ki, görüş turist axını baxımından da əhəmiyyətlidir:
"Kürdüstan regional bölgəsindən Azərbaycana kifayət qədər turist axını var. Bu istiqamətdə işlər aktivləşdirilə bilər. Fikirləşirəm ki, Türkiyə-Azərbaycan-İraq birgə əməkdaşlığı çərçivəsində Kürdüstan regional bölgəsinin rəhbəri Nerçivan Bərzaninin səfəri əlaqələrə çox böyük töhfə verəcəkdir”.(aznews.az)
Xəbərdən istifadə edərkən istinad etmək vacibdir.
