Bu gün Müdafiə Nazirliyi ilə bağlı 3 mühüm hadisə haqqında məlumat aldıq. Onlardan ikisi haqqında mətbuata məlumat verildi, amma biri haqqında nədənsə danışılmadı. Onu da həftənin birinci günü biz acıqlayacağıq. Əgər hörmətli müdafiə naziri Zakir Həsənov o məsələni mətbuata açıqlamağa qadağa etsə.
Səhər tezdən Rusiyada tutulan keçmiş hərbi qulluqçu, Sumqayıt şəhər sakini, 1965-ci il təvəllüdlü mayor Yadigarov İlqar Heydər oğlu ilə bağlı Müdafiə Nazirliyi nədənsə özündə cəsarət tapıb olan faktı dandı. İ. Yadigarovun Müdafiə Nazirliyinin əməkdaşı olmadığını, Silahlı Qüvvələrin müxtəlif hərbi hissələrində çalışdığı bildirildi. Xatırladım ki, İlqar Azərbaycanda çox az sayda peşəkar hərbi maliyyəçi zabitlərdən biri olub. O, 1986-cı ildə Yaroslav Ali hərbi Maliyyə Məktəbini bitirib. Sabiq HHQ və HHM qoşunlarının komandanı, mərhum general-leytenant Rail Rzayev tərəfindən maliyyə xidməti rəisi vəzifəsinə təyin edilib. Sonralar isə, o 2011-ci ildə isə "Hərbi Xidmətkeçmə Haqqında " qanunun 156-cı maddəsinin "J" bəndi ilə xidməti uyğunsuzluğu adı ilə Silahlı Qüvvələr sıralarından tərxis olunub. İndi ortaya sual çıxır ki, nə vaxtdan MN-nin HHQ və HHM qoşunlarının Mərkəzi Aparatın xidmət rəisi olan zabiti MN-nin zabiti sayılmır? Deyəsən, hörmətli müdafiə nazirimiz özündən və rəhbəri olduğu güc strukturundan hədəfləri yayındırmaq üçün belə uğursuz addımlara əl atır.
Zakir Həsənov müdafiə naziri postuna təyinat aldıqdan sonra bir sıra kadr dəyişiklikləri həyata keçirib ki, hesab edirəm ki, bununla bağlı ondan aşağıdakılar soruşulmalıdır. Hörmətli cənab nazir, vaxtı ilə rəhbəri olduğunuz Daxili İşlər Nazirliyinin Daxili Qoşunlarından bir neçə nəfər zabit yoldaşlarınızı həm aldıqları hərbi təhsilə və fərqli ixtisas üzrə tamam fərqli bir güc strukturuna necə təyin edirsiniz və bu hansı qanunla tənzimlənir? Hərbidə VVUS deyilən bir anlayış mövcuddur. Belə gedişlə, onda Azərbaycandakı hərbi məktəblərdən hansı birisisə ixtisar edilməlidir. Ya MN-nin tabeliyində olan 3 hərbi məktəblərdən biri, ya da DQ-nın ali hərbi təhsil ocağı. MN-nin Maliyyə idarəsinə təyin etdiyiniz sabiq DQ-ın maliyyə şöbəsinin rəisini haradasa başa düşmək olar. Amma, Müdafiə Nazirliyi Gorədil Hərbi İstirahət Evinin rəisi polkovnik Etibar Qasımovu işdən azad edərək onun yerinə rəis vəzifəsinə isə ehtiyatdan olan zabit yoldaşınız polkovnik-leytenant Ayatxan Hüseynovu təyin etməniz isə başa düşülən deyil. Hələ bu azmış ki, Etibar Qasımovun müavini mayor Mobil Yusifovu da vəzifədən azad edərək təqaüdə göndərmisiniz. Qeyd edim ki, M. Yusifov Qarabağ uğrunda gedən döyüşlərdə fədakarlıq etmiş zabitlərdən biridir. Yeni rəisin isə döyüşlərdə iştirak edib-etməməsi isə hələ dəqiq bəlli deyil.
Beləliklə, son dövrlərdə MN sistemində aparılan sonsuz kadr dəyişiklikləri cəmiyyətdə bir qədər təəccüb doğurur. MN-i son vaxtlar Azərbaycanda bir dostlar və qohum-əqraba klubuna çevrilməkdədir. Mənə elə gəlir ki, artıq dövlət başçısının da bu işlərə müdaxiləsinin zamanı çatıb. Silahlı Qüvvələrimizdə o qədər həllini gözləyən məsələlər vardır ki, onları təxirə salınmadan həll etmək lazımdır.
Yazının əvvəlində dediyim 3-cü şok effekt yarada biləcək hadisə haqqında isə inşəallah həftənin əvvəlində məlumat yaymağa çalışacağıq. O da MN sistemində baş verib.
Ehtiyatda olan polkovnik-leytenant hərbçi-ekspert Üzeyir Cəfərov
/xeberlent.az/
Xəbərdən istifadə edərkən istinad etmək vacibdir.
