Xəbər verdiyimiz kimi, qanunsuz erməni silahlı birləşmələrinin tərkibində Xocalı rayonunun Meşəli kəndində soyqırımı törətməkdə təqsirləndirilən Xaçaturyan Vaqif Çerkezoviçin cinayət işi üzrə məhkəmə iclası yekunlaşıb. Bakı Hərbi Məhkəməsinin sədri Zeynal Ağayevin sədrliyi ilə keçirilən prosesdə hökm oxunub. Hökmə əsasən, Vaqif Xaçaturyan 15 il müddətinə azadlıqdan məhrum olunub. Hökmdə qeyd olunub ki, Vaqif Xaçaturyan cəzasının ilk 5 ilini həbsxanada, qalan hissəsini isə ciddi rejimli cəzaçəkmə müəssisəsində çəkməlidir.
Bəs nəyə görə, bu qədər cinayət hadisələrini törədən şəxsə ömürlük həbs cəzası verilmədi?...Suallarımıza cavab öyrənmək üçün hüquqşünas Elşad İsayevlə həmsöhbət olduq.
Elşad İsayev Vaqif Xaçaturyana niyə ömürlük həbs cəzası tələb edilmədi sualının cavabı aşağıdakı kimi verib:
1. Qanunun tələbinə əsasən yaşı 65-dən çox olan şəxslər ömürlük məhkum edilə bilməzlər.
2. 2014-cü ilə qədər qüvvədə olan qanunvericilikdə sülh və müharibə əlehinə olan cinayətlərə görə sanksiya həddi 10 ildən 15 ilə qədər olub.
3. Əməl törədildiyi vaxt qüvvədə olan Cinayət məcəlləsinin müddəaları tətbiq olunur.
4. Əməlin (hərəkət və ya hərəkətsizliyin) cinayət sayılması və həmin əmələ görə cəza, bu əməlin (hərəkət və ya hərəkətsizliyin) törədildiyi zaman qüvvədə olan cinayət qanunu ilə müəyyən edilir. Törədildiyi zaman cinayət sayılmayan əmələ görə heç kəs cinayət məsuliyyətinə cəlb oluna və cəzalandırıla bilməz.
5. İctimai təhlükəli əməlin (hərəkət və ya hərəkətsizliyin) törədilmə vaxtı, onun nəticələrinin baş verdiyi andan asılı olmayaraq, cinayətin törədildiyi vaxt sayılır.
6. Əməlin (hərəkət və ya hərəkətsizliyin) cinayət sayılmasını və bu əmələ görə cəzanı aradan qaldıran, cəzanı yüngülləşdirən, yaxud cinayət etmiş şəxsin vəziyyətini başqa cür yaxşılaşdıran cinayət qanununun geriyə qüvvəsi vardır, yəni həmin qanunun qüvvəyə minməsindən əvvəl müvafiq əməli (hərəkət və ya hərəkətsizliyi) törətmiş şəxslərə, habelə cəza çəkən, yaxud cəzasını çəkmiş, lakin məhkumluğu üstündən götürülməmiş və ya ödənilməmiş şəxslərə şamil edilir.
7. Əməlin (hərəkət və ya hərəkətsizliyin) cinayət sayılmasını və həmin əmələ görə cəza müəyyən edən, cəzanı ağırlaşdıran, yaxud cinayət törətmiş şəxsin vəziyyətini başqa cür ağırlaşdıran cinayət qanununun geriyə qüvvəsi yoxdur.
Elşən Yəhyayev
Xəbərdən istifadə edərkən istinad etmək vacibdir.
