Son aylarda Azərbaycan və Türkiyəyə qarşı Avropanın, ümumiyyətlə Qərbin təcavüzkar siyasətini hamımız görürük. Amma nədənsə buna qarşı susmağı seçirik. Bəzilərimiz dövlətə başçılıq edənləri sevməyə bilərik. Amma anlamalıyıq ki, hər bir dövlətin başında olan iqtidarlar gələr də, gedər də. Dövlətimiz isə sonsuza qədər yaşayacaq. Bunu Qərbi idarə edənlər və onların başındakılar yaxşı bilir. Ona görə də, dövlətimizin parçalanması, torpaqlarımızın bütöv olmaması üçün hər cür böhtanlar atır və yazırlar. Bu iyrənc kampaniyaya qarşı səssiz qalmağımız vətənimizə, millətimizə xəyanətimizdir. Özünü vətənpərvər hesab edən, Azərbaycan və Türkiyə torpaqlarında yaşayıb, çalışan bütün media qurumlarına müraciət edərək bu mövzuda birləşmələrini, Qərb mediasının iyrənc iftiralarına Vətən adına cavab vermələrini xahiş edirik. Unutmayaq ki, bu Vətən müvəffəqiyyətiylə də uğursuzluğu ilə də bizimkidir, doğma ölkəmizdir. Onu düzəltmək də bizə düşər. Qərb mediasının bizi sevmədiyini, Azərbaycanda təşkil edilən Bakı 2015 birinci Avropa Oyunları zamanı aydın gördük. Bu oyunların Azərbaycanda keçirilməməsi üçün Qərb də, Almaniya dövləti də, onun dəstəkçiləri var gücləri ilə çalışdılar. Amma oyunlar ən yaxşı şəkildə təşkil edildi və bitdi. Dünya bu oyunların təşkilatçılığına heyranlıqla baxdı. Qərb yenə də öz iyrənc oyunlarından imtina etmədi. Qətiliklə söyləyə bilərəm ki, Azərbaycan və Türkiyənin müvəffəqiyyətinə sevinməyənlər qalibiyyətinə də heç bir zaman sevinməz. Odur ki, hər iki ölkənin mətbuatını dövlətçiliyin qorunması üçün öz ölkələrinin yanında, Respublikanın qorunması yollarında birləşməyə çağıracağıq. (avangartha.com)
Xəbərdən istifadə edərkən istinad etmək vacibdir.
