Tanınmış jurnalist Aida Eyvazovadan ermənilərin girov saxladığı azərbaycanlılarla bağlı müraciətinə baxılması üçün sənəd tələb olunub. Bu barədə xanım jurnalist özü məlumat verib.
O qeyd edib ki, Dilqəm Əsgərov və Şahbaz Quliyevlə bağlı Ağ Ev rəhbəri Barak Obamaya, Rusiya Dövlət Dumasının sədr müavini Vladimir Jirinovskiyə də məktub yazıb: "Jiriniovski dedi ki, sənədləri yığın göndərin, maraqlanarıq. Mən sənədləri yığa bilmədim. Çünki, tam olaraq hamısını əldə etmək imkanım olmadı”.
A.Eyvazova hələ də Ağ Ev rəhbəri Barak Obamadan cavab gözlədiyini vurğulayıb.
Dilqəm Əsgərov və Şahbaz Quliyev 2014-cü il iyunun 29-da yaxınlarının qəbirlərini ziyarət etmək üçün doğma yurdlarına - Kəlbəcərin Şaplar kəndinə gedərkən işğalçı Ermənistan ordusu tərəfindən girov götürülüblər. Girov götürülərkən onlarla getmiş digər mülki azərbaycanlı Həsən Həsənov öldürülüb, onun meyiti danışıqlardan sonra Azərbaycana qaytarılıb və dəfn olunub. Ermənilərin təxribatçı adlandırdığı Şahbaz Quliyev və Dilqəm Əsgərov qanunsuz olaraq bir neçə maddə ilə ittiham olunub. Dilqəm Əsgərov ömürlük, Şahbaz Quliyev isə 22 il müddətinə azadlıqdan məhrum edilib. Onlar hazırda işğal altındakı Şuşa şəhərində girov saxlanılırlar. (modern.az)
Xəbərdən istifadə edərkən istinad etmək vacibdir.
