Ermənistanın xarici işlər naziri Edvard Nalbandyan ötən gün parlamentdə çıxışı zamanı bildirib ki, Azərbaycanla hərbi əməliyyatlar başlayarsa, Ermənistan Dağlıq Qarabağın təhlükəsizliyinin qarantı kimi, Dağlıq Qarabağı müstəqil dövlət olaraq tanımaqla yanaşı, digər lazımi tədbirlər görəcək.

Mövzu ilə bağlı açıqlama verən ekspert İlqar Vəlizadənin sözlərinə görə, Nalbandyanın bu açıqlaması Azərbaycan üçün yenilik deyil. Ermənistan tərəfi dəfələrlə Dağlıq Qarabağı bir dövlət kimi tanıyacağı ilə bağlı açıqlamalar verir: "Əslində bu çox əhəmiyyətsiz açıqlamadır. Çünki, Ermənistan özü asılı ölkədir və Rusiyanın icazəsi olmadan bir addım belə ata bilməz. Ermənistan tərəfi belə bir addım atarsa, hadisələr tam fərqli istiqamətdə inkişaf edəcək və bu vəziyyətdən geri dönmək mümkün olmayacaq. Hərb yolu isə regionda maraqlı olan bütün iştirakçılar üçün maraqlı deyil və onların planlarını pozmuş olur. Nalbandyanın bu çıxışı isə daxili auditoriya üçün hesablanıb. Azərbaycan tərəfi isə bu kimi çıxışlara əhəmiyyət belə vermir. Ermənistan rəhbərliyi ölkə daxilində və cəbhədə vəziyyətin gərginləşməsi səbəbi ilə nəsə deməlidir və bu səbəbdən dövlət rəsmiləri belə açıqlamalar verirlər. Lakin bu kimi çıxışlara ciddi yanaşmaq lazım deyil." (Atv.az)