Müsahibimiz 121 saylı Laçın Seçki Dairəsindən Milli Məclisə namizədliyi Yeni Azərbaycan Partiyası tərəfindən irəli sürülmüş iqtisad elmləri üzrə fəlsəfə doktoru Mahir Abbaszadədir. 

– Hakim partiyanın 121 saylı Laçın Seçki dairəsindən namizədliyinizin irəli sürülməsini necə qarşıladınız? Gözlənilən idimi?

– Düzünü deyim ki, Yeni Azərbaycan Partiyasından namizədliyimin irəli sürülməsi həm gözlənilən idi, həm də gözlənilməyən. Gözlənilən idi ona görə ki, hakim partiyanın siyasi kursunu həmişə dəstəkləmişəm, daim partiyanın yanında olmuşam. Açığı, böyük bir partiyanın mənə bu dərəcədə etimad göstərməsi bir qədər gözlənilməz olsa da, sevindiricidir. Bu etimada görə ilk növbədə partiyanın rəhbəri İlham Əliyev cənablarına minnətdaram. Partiya sıralarındakı fəaliyyətimi yüksək qiymətləndirərək 121 saylı Laçın Seçki Dairəsindən namizədliyimi irəli sürən idarə heyətinin üzvlərinə də təşəkkürümü bildirirəm ki, mənə belə bir fürsət verdilər.

– Bir neçə gündən sonra deputatlığa namizədlərin təbliğat-təşviqat kampaniyasına start verilir. Özünüzü seçicilərə necə təqdim edəcəksiniz?

– Düşünürəm ki, – istər namizəd olaq, istər deputat, istərsə də adi vətəndaş, – laçınlının qarşısına ən əvvəl bir laçınlı kimi çıxmalıyıq. Həyatımın dərk etdiyim hissəsi, əməli fəaliyyətə başladığım hissəsi rayonumuza, elimizə, obamıza, respublikamıza çox mötəbər xidmətlərdən keçibdir. Seçki oldu-olmadı, gücüm, imkanım çatacaq səviyyədə rayonumuzdan olan insanlardan köməyimi əsirgəməmişəm. Amma Yeni Azərbaycan Partiyasının namizədi kimi bu siyasi proseslərə qoşularaq laçınlıların qarşısına çıxmaq və onlardan səs istəmək iqtidarını özümdə hiss edərkən məsuliyyətim bir az da artır. Mən indiyədək laçınlıların problemlərinə bir laçınlı kimi ürəyimin səsinə qulaq asaraq kənardan yaxınlaşırdımsa, millət vəkilliyinə namizəd olaraq problemlərin içinə girmək imkanı qazanaır, onların qarşısına ən yaxşı təmsilçiləri olaraq çıxmağı öz öhdəmə götürürəm. Çalışacam ki, bütün seçicilərim məni özlərinin balası, qardaşı, əmisi oğlu, dayısı oğlu, bibisi oğlu və bir parçası, ayrılmaz hissəsi kimi qəbul etsinlər.

– Cəmiyyətdə tez-tez belə fikirlər səslənir ki, parlamentdə hüquqşünaslar və iqtisadçılar çoxluq təşkil etməlidir. Bu həm də sosial sifarişdir. Bir iqtisadçı alim olaraq parlamentdə yerinizi necə görürsünüz?

– Əslində bu cəmiyyətin çox doğru bir tələbidir. Eyni zamanda diqqətinizə çatdırım ki, əhalinin sosial sifarişi bir də onunla əlaqəlidir ki, parlamentdə gəncləşmə getməlidir. Bilirsiniz ki, ölkə rəhbərinin gənclərlə bağlı siyasətinin tərkib hissəsindən biri də gənclərin Azərbaycanın ictimai-siyasi həyatında əvəzedilməz rol oynamasıdır. Necə ki, bu gün gənclər əsgəri xidmətdə Vətənin keşiyində durur, necə ki, ölkə universitetlərində və xaricdə təhsillərini davam etdirirlər ki, gələcəyin çox yaxşı mütəxəssisləri, iqtisadçıları, alimləri, həkimləri, mühəndisləri kimi yetişsinlər, eyni zamanda onların ictimai-siyasi proseslərdə aktivliyi də vacibdir. Cənab Prezidentin birbaşa fikridir ki, ölkənin ictimai-siyasi həyatının ayrılmaz tərkib hissəsi olaraq parlamentdə də gənclərə xüsusi yer verilməlidir. Bu nöqteyi-nəzərdən YAP tərəfindən mənim və mənimlə bərabər digər gənclərin dəstəklənməsini ölkə başçısının gəncliyə olan diqqətinin bir hissəsi kimi qiymətləndirirəm. 

O ki qaldı sualınızın əsas hissəsinə, Azərbaycan istər regionumuzda, istərsə də qitəmizdə iqtisadi cəhətdən çox inkişaf etmiş bir dövlətdir. Azərbaycanın qısa vaxtda qazandığı iqtisadi uğurlar digər dövlətlərin uzun müddət ərzində nail ola bildiyi iqtisadi uğurlardan üstündür. Bu, ölkə rəhbərinin apardığı iqtisadi siyasətin məntiqi nəticəsidir. Əsası Ulu Öndərimiz tərəfindən qoyulan bu siyasət indi də İlham Əliyev cənabları tərəfindən ləyaqətlə, yüksək səviyyədə yerinə yetirilir. Milli Məclisə üzv seçilərəmsə, başlıca məqsədim bu dövlətin iqtisadi sahədə həyata keçirdiyi tədbirlərin, onun qanunverici bazasının hazırlanmasında əməli fəaliyyətimlə yaxından iştirak etmək olacaq. Lazım olan təklifləri verərək, bu təkliflərin parlament səviyyəsində müzakirəsinə nail olmağa və onların iqtisadi sahədə qəbul olunmuş qanunlarda öz əksini tapmasına çalışacam. Təbii ki, bu iqtisadi qanunların qəbulu, onların parlament tərəfindən ratfikasiya olunması qanunları daha çox işlək vəziyyətə gətirib çıxardacaq və qanunlar işlək vəziyyətdə olduğu müddətdə iqtisadi sahədə Azərbaycanın uğurları daha da artacaq. Hər bir vətəndaş bu uğuru öz həyatında hiss edəcəkdir. Üzvü olduğum hakim siyasi partiyanın bu 23 ildə qarşısında duran ən ümdə vəzifələrdən biri də Azərbaycanda iqtisadiyyatın yüksələn xətlə inkişaf etdirilməsidir. Hər bir insanın sosial vəziyyəti yaxşılaşmalı, bərabər hüququ qorunmalıdır. Parlamentə seçiləcəyim təqdirdə fəaliyyətimi bu istiqamətdə davam etdirmək niyyətindəyəm.

– Məcburu köçkünlük həyatı yaşayan seçiciləri təmsil etmək ikiqat məsuliyyətdir. Bu məsuliyyətə hazırsınızmı? Parlamentdə daha çox hansı problemləri qabartmaq istərdiniz?

– Doğru deyirsiz, məcburi köçkün həyatı yaşayan insanları parlamentdə təmsil etmək ikiqat məsuliyyətdir. Tam səmimi olaraq deyim ki, həm də çox şərəfli bir işdir. Seçicilərim mənə səs versələr, bu yüksək tribunadan təmsil olunmağıma şərait yaratsalar həm də üzərimə böyük bir məsuliyyət qoymuş olacaqlar. 
Qaçqınlıq həyatı mənə yaxşı tanışdır. Bütün laçınlı soydaşlarım kimi 1992-ci ildə rus-erməni hərbi birləşmələrinin torpaqlarımızı işğal etməsi səbəbindən kəndimdən-kəsəyimdən qaçqın düşüb Sumqayıtda, Bakıda məskunlaşanlardan biriyəm. Yataqxana həyatına da yaxşı bələdəm. Təxminən 10 ilə yaxın yataqxana həyatı yaşamışam. Ailə üzvlərimlə birlikdə Sumqayıtın 41-ci məhəlləsində yerləşən 8 №-li tələbə yataqxanasında yaşamışam. Bir nəfər üçün, ən yaxşı halda iki nəfər üçün nəzərdə tutulmuş otaqda 7 nəfər qalırdıq. O həyatın nə qədər acılı, nə qədər çətin, nə qədər məşəqqətli olduğunu unutmamışam. Yəqin ki, ötən əsrin 92-93-cü illəri xatirinizdədir. Hakimiyyətin çox zəif olduğu və hərc-mərciliyin hökm sürdüyü bir zaman idi. Ölkənin iqtisadi qüdrəti olduqca aşağı bir vəziyyətə düşmüşdü. Gündəlik qayğılarını həll edə bilməyən yerli əhali belə bu qayğıların öhdəsindən gələ bilmirdi. O ki qala qismətinə məcburu köçkünlük həyatı yazılmış bir insan olasan. Evin olmaya, işin olmaya, yataqxana şəraitində yaşayasan. Ən pisi də odur ki, stabil bir dövlətin olmaya. Problemlərinin öhdəsindən gəlmək üçün hansı ünvana gedəcəyini, kimin qapısını döyəcəyini bilməyəsən. Biz bu günləri yaşamış insanlarıq. 
Allaha şükürlər olsun ki, Ulu Öndərimiz 93-cü ildə hakimiyyətə gəldi. Bütün əhali bu gəlişi çox yüksək səviyyədə qarşıladı. Ulu Öndərin fəaliyyəti nəticəsində Azərbaycanda bütün problemlər zaman-zaman öz həllini müsbət istiqamətdə tapmağa başladı. Məcburi köçkünlərin də həyatında böyük dəyişiklik oldu. Hər şeydən əvvəl dərk etdik ki, ölkənin sahibi gəlib. Məcburi köçkünlər ulu öndər Heydər Əliyevin, bu gün isə dövlətimizin başçısı İlham Əliyevin siyasətini həmişə dəstəkləyiblər, bu siyasətin öncüllərindən olublar. Dövlət rəhbəri ilə xalqın birliyi nəticəsində qaçqınların və məcburi köçkünlərin həyatında demək olar ki, köklü dəyişikliklər baş verdi. Nədən ibarət idi bu dəyişmə? 
Bilirsiniz ki, ölkə rəhbəri cənab İlham Əliyevin sərəncamları ilə Azərbaycanda məcburi köçkünlər üçün yeni qəsəbələr salınıb. Bu qəsəbələr çox yüksək səviyyədə inşa edilib və insanlar artıq çadır həyatını tərk edərək rahat evlərdə yaşayırlar. Laçınlılar da mənzil şəraiti yaxşılaşdırılanların içərisindədir, bunlardan kənarda deyil. Qaradağ, Abşeron rayonlarının ərazisində salınmış müasir qəsəbələrdə də laçınlılar məskunlaşdırılmışdır. Ağcabədi rayonunun ərazisindəki Taxtakörpü qəsəbəsində də laçınlı ailələr üçün fərdi evlər tikilib istifadəyə verilmişdir. Ən sevindirici hal burasındadır ki, bu gün də məcburi köçkünlərin mənzil şəraitinin yaxşılaşdırılması birbaşa dövlət başçısının nəzarətindədir. 

Bir məsələni də xatırlatmaq istəyirəm ki, cənab Prezidentin məcburi köçkünlərə, xüsusilə də laçınlılara olan məhəbbəti özünün ad günündə bir daha nümayiş olundu. Prezident ad gününü laçınlılarla bir yerdə qeyd etdi və orada bir ifadə işlətdi ki, hər kəs öz ad gününü öz evində, ailəsində keçirdir, bu gün Ağcabədidəki Taxtakörpünü özümə ev hesab edirəm, laçınlıları özümə ailə hesab edirəm və sizinlə birlikdə ad günümü qeyd edirəm. Bu cənab Prezidentin bir daha laçınlılara olan diqqətinin, qayğısının göstəricisidir. Düşünürəm ki, zaman gəldikcə ölkə rəhbərliyinin xüsusi qayğısı ilə bütün məcburi köçkünlərin həyat şəraiti daha da yaxşılaşdırılacaq, onlar yataqxanalardan, məktəblərdən və bağçalardan çıxarılaraq rahat evlərdə yerləşdiriləcəklər. Amma qaçqın və məcburi köçkünlərə burada nə qədər gözəl şərait yaradılsa da, bu insanlar nə qədər ev-eşiklə təmin olunsa da, hamımızın içində bir nisgil var. Bu nisgil Vətənə, itirilmiş torpaqlarımıza qayıtmaq nisgilidir. Vəziyyətin, şəraitin yaxşılaşdırılması heç də insanları torpaqlarından soyutmur. Əksinə, xalq görür ki, ölkə rəhbəri, Ali Baş Komandan ona qarşı necə diqqətlidir. Mənə elə gəlir ki, mənzil şəraiti yaxşılaşdırılan hər bir laçınlının dövlətə inamı bir daha artır və düşünür ki, dövlət başçısının qətiyyəti və xalqın birliyi sayəsində torpaqlarımızı geri alacağıq. Cənab Prezident öz çıxışlarında torpaqların alınma yollarını da dəfələrlə qeyd edibdir. Qeyd edibdir ki, hələ ki siyası yollar tükənməyib, hələ ki siyasi mübarizə aparılır və siz görürsüz ki, ölkəmizin iqtisadi qüdrəti, hərbi potensialı artıqca onun siyasi gücü də artır. Beynəlxalq miqyaslı ən mötəbər tədbirlərdə, ən ali kürsülərdə ortaya prinsipal mövqe qoyan dövlət başçısı işğal olunmuş torpaqların, xüsusilə Laçının tarixi Azərbaycan torpaqları olduğunu dönə-dönə vurğulayır.

İkinci bir məsələni deyim, əgər siyasi müstəvidə danışıqlar bir nəticə verməsə, Azərbaycan nəyin bahasına olursa-olsun, öz torpaqlarını geriyə alacaqdır. Bu alınmanın içərisində təbii ki, hərbi yol istisna deyil və bu sahədə Azərbaycan dövlətinin üstünlükləri göz önündədir. Danılmaz faktdır ki, dövlətimizin hərbi sahəyə ayırdığı vəsait Ermənistanın ümumi büdcəsinə bərabərdir. Eyni zamanda Azərbaycan Respublikasının Hərbi Sənaye Nazirliyi yaradılıbdır. Hərbi Sənaye Nazirliyi bu gün dünyanın ən müasir silahlarını istehsal etmək gücündədir. Azərbaycan artıq dünya arsenalında silah istehsal edən bir dövlət kimi də tanınmaqdadır. Ordumuz da günü-gündən möhkəmlənir. Ordumuzun möhkəmlənməsi, iqtisadi gücünün artırılması, müasir silahlarla təchiz olunması bir daha Azərbaycan dövlətinin işğal altındakı torpaqlarımızı hansı yolla olur-olsun geriyə qaytarmaq gücünü özündə saxladığını göstərir. Elə sizə müsahibə verdiyim ərəfədə, 3-4 gün bundan öncə Azərbaycan ordusu cəbhə xəttində nəyə qadir olduğunu göstərdi. Erməni tərəfinin artıq təşvişə düşməsi, böyük itkilər verərək geri çəkilməsi və bunu Ermənistanın müdafiə nazirinin etiraf etməsi bir daha ordumuzun gücündən, qüdrətindən xəbər verir. 

– Laçınlı məcburi köçkünlər həm də respublikanın 60-a yaxın rayonunda məskunlaşıblar. Regionlarda yaşayan seçicilərin hamısı ilə görüşmək planınız varmı? Çətin olmayacaq ki?

– Bildirim ki, deputatlığa namizəd irəli sürüldükdən sonra bu dislakasiya ilə bağlı bir az dərindən tanış olmağa başlamışam. Rayonumuzun əhalisi respublikanın təxminən 58 rayonunda yerləşib. Bizim bunların hamısının səsini almaq fikrimiz var. Laçın rayonunda 45-46 min seçici vardır ki, bunlar da müxtəlif bölgələrdə məskunlaşmışdır. Təxminən 24 mini Bakı, Sumqayit və Abşeron ərazisində, 21 mini isə regionlarda yerləşir. Mərkəsi Seçki Komissiyası yalnız 20 gün təbliğat-təşviqat kampaniyası aparmağa icazə verir. Çalışacağıq ki, bu 20 gün müddətində həm Bakıda, Sumqayıtda, Abşeronda, həm də respublikanın digər rayonlarında məskunlaşan bütün seçicilərimizlə təmas quraq. Onların hamısı ilə görüşə bilməsəm belə, mənim səlahiyyətli nümayəndələrim mütləq o adamlarla görüşəcəkdir. Jurnalınız vasitəsilə onların hamısına salam-dualarımı çatdırıram. Əgər mənə etimad göstərsələr, parlamentin deputatı olduqdan sonra da onların problemləri ilə yerindəcə tanış olacam. Bu seçki dönəmində isə mənim 20 günlük işim ancaq və ancaq seçicilərimlə işləməyə, onların suallarına cavab axtarmağa, arzu və təkliflərini dinləməyə yönələcəkdir. Elə məsələlər var ki, namizəd olaraq həll etmək mümkündür və deputatlıq dönəminə saxlamağa ehtiyac yoxdur. Ancaq elə məsələlər də var ki, həll etmək üçün ən azı millət vəkili səlahiyyətində olmalısan. Daha çətin problemləri isə uyğun nazirliklərin və komitə sədrlərinin qarşısında qaldıraraq bu problemin həlli yollarını seçicilərimizə göstərəcəyik. Yəni bu problemlər müxtəlif cürdür. Onlara yanaşmaq da müxtəlif formalarda olacaq. Eləsi var özümüz həll edəcəyik, eləsi var yerli hakimiyyət səviyyəsində, eləsi var nazirlik səviyyəsində həll olunacaq, eləsi var zaman-zaman o problemlərin həllinə yenidən qayıdacağıq. Bütün hallarda, yəni mənə səs verən, səs verməyən istənilən laçınlının probleminə heç bir fərq qoymadan yanaşacağıq. Unutmamalıyıq ki, deputat olmamışdan öncə Laçınlıyıq. Eyni problemləri yaşayan insanlarıq. Ermənilər bizi öz torpaqlarımızdan didərgin salanda fərq qoymayıbdır ki, bu YAP-ın üzvüdür, o biri digər partiyanın. Kimsə deputatdır, yaxud sadə bir fəhlədir. Vəzifəli şəxsdir, yoxsa işsizdir. Ona görə də Laçına qayıtmaq bizim hamımızın problemidir. 

Vaxt qısa olsa da, seçki kampaniyası müddətində çalışacam ki, bütün seçicilərimlə görüşüm. Millət vəkili seçilərəmsə, qarşımda hələ 5 ilim olacaq. Tam məsuliyyətimlə bildirirəm ki, həmin müddətdə 58 rayonda məskunlaşmış heç bir laçınlı diqqətdən kənarda qalmayacaq. 

– Yeri gəlmişkən, son dövrlərdə müəyyən qüvvələr sanki Laçında "kürd problemi varmış” təəssüratını yaratmağa çalışırlar. Sizcə bu nədən qaynaqlanır? Milliyətcə kürd olan seçicilərin də səsini almağa əminsinizmi? 

– Çox sağ olun. Bu sual gözlənilən idi, çünki qonşu Türkiyə Pespublikasında baş verən hadisələr bizdən yan keçmir. Laçın rayonu etnik tərkibinə görə mürəkkəb bir region olmasa da, təkcə türklərdən də ibarət deyil. Əhalisinin böyük əksəriyyətini türklər təşkil edən rayonda say tərkibinə görə ikinci yerdə kürdlər gəlir və az sayda digər millətlərin nümayəndələri də yaşayır. Bizim rayonda tarixən türklər də, kürdlər də, digər millətlərin nümayəndələri də bir yerdə çiyin-çiyinə yaşayıbdır. Xüsusilə, kürdlərlə münasibətlər elə bir səviyyəyə gəlib çatıbdır ki, heç kəs bu iki milləti bir-birindən ayırmaq haqqında düşünməyib. Qohum olublar, qaynayıb-qarışıblar. Tam məsuliyyətimlə deyə bilərəm ki, Laçın rayonunda, ümumiyyətlə Azərbaycanda belə bir problem yoxdur. Laçın rayonunu, Azərbaycanı istəməyən, sabitliyi pozmağa can atan qüvvələr "kürd kartı”ndan istifadə etməyə başlayıblar. PKK əslində kürd demək deyil. Kimsə PKK-nı kürdlə eyniləşdirirsə, böyük siyasi səhvə yol verir və ola bilsin ki, nə türkün tarixindən xəbəri var, nə kürdün, nə də PKK-nın. Necə ki, İŞİD müsəlman deyil, eləcə də PKK kürd anlamına gəlmir. PKK-nın tərkibində Türkiyəni, Azərbaycanı sevməyən qüvvələrin, əsasən də ermənilərin vuruşduğu artıq heç kəsə sirr deyil. Bu terror təşkilatının tərkibində elə qüvvələr də var ki, nəyin uğrunda vuruşduqlarının fərqində deyillər. Mən inanmıram ki, Azərbaycanda yaşayan hansısa bir kürd və ya qeyri bir millət o syasəti bəyənir və dəstəkləyir. Nəinki Azərbaycanda yaşayanların, bütün dünyada yaşayan azərbaycanlıların, ulu öndərimiz Heydər Əliyev demiş, bir Vətəni var. O da Azərbaycandır. Sizin xatirinizdədirsə, ulu öndər Heydər Əliyev hakimiyyətə gəldikdən sonra Azərbaycanda azərbaycançılıq ideyasının sürətli inkişafına nail ola bildi. Azərbaycanda yaşayan türk də, kürd də, ləzgi də, talış da, tat da, avar da və digər bütün millətlər də bu ideyanın ətrafında birləşərək Azərbaycan dövlətini təmsil edir. Laçın rayonu da Azərbaycan dövlətinin ayrılmaz bir hissəsidir. Haqlı olaraq ortaya bir sual çıxır. Bəs niyə Azərbaycanı istəmirlər, bu "problemlər”i qabartmaq istəyirlər? Əslində heç bir problem yoxdur. Mənim kürdlərin içərisində çoxlu dostlarım, qohumlarım var, onların ağsaqqalları ilə çox yaxın bir münasibətdəyəm. Onu da bildirmək istəyirəm ki, namizədliyim irəli sürüləndən sonra demək olar ki, kürd əsilli insanlar öz namizədliklərini vermədilər, ərizə belə yazmadılar, düşündülər ki, mən onların da namizədiyəm. Laçın rayonunda olmayan problemi süni şəkildə şişirdənlərin arxasında xarici dövlətlərin əks-kəşfiyyat dairələri dayanır. 

Möhtərəm Prezidentimiz İlham Əliyevin və Azərbaycanın birinci xanımı Mehriban Əliyevanın Azərbaycan dövlətini dünyada tolerant bir dövlət kimi tanıtmasını bəzi dövlətlər hələ də həzm edə bilmir, bəziləri isə artıq həzm etmək məcburiyyətindədir. Azərbaycanda multikulturalizm mühiti hökm sürür, heç bir fərq qoyulmadan bütün millətlər eyni hüquqlarla yaşayırlar. Multikultiralizmin inkişaf etdiyi bir ölkədə müxtəlif mədəniyyətlərin, dinlərin daşıcıyısı olan insanların bir yerdə bərabər yaşaması hamımızın gözü önündədir. "Kürd kartı” da bunu gözü götürməyən dövlətlərin Azərbaycandakı tolerantlığa, multikulturalizmə qarşı apardığı bir mübarizə formasıdır. Bu süni problemi Laçın rayonunda qabartmaq istəyənlər yanılırlar və heç vaxt məqsədlərinə çatmayacaqlar. Bir daha təkrar edirəm ki, seçicilərim mənə səs verərsə, Laçın rayonunda hamının, – türkün də, kürdün də, rusun da, yəni milli mənsubiyyətindən asılı olmayaraq hər kəsin millət vəkili olacam. 

– İndiyədək bizi təmsil edən deputatlar da laçınlı olublar. O da məlumdur ki, laçınlılar kiçik istisnalarla rayonun rəhbərinə də, deputatına da həmişə ehtiramla yanaşıblar. Amma Laçından seçilən deputları parlamentdə qeyri-fəal olduqlarına görə qınayanlar da az deyil. Bu sindromu sındıra biləcəksinizmi?

– Partiya namizədliyimi irəli sürərkən və bu siyasi aksiyaya razılıq verərkən təbii ki, bunların hamısını ölçüb-biçmişəm. Bir az təvazökarlıqdan uzaq olsa da deyim ki, mən iqtisad elmləri üzrə fəlsəfə doktoruyam, iqtisadiyyat institutunun doktoranturasında ikinci ildir təhsil alıram, 7 elmi məqalənin, 3 elmi tezisin, 1 elmi monoqrafiyanın müəllifiyəm və bir neçə xarici dil bilirəm. İntellekt səviyyəm, dünyagörüşüm imkan verir ki, məsuliyyəti öz üzərimə götürərək bu sindromu sındırım. Çalışacam ki, bundan sonra Laçın rayonunu Milli Məclisdə təmsil edən deputat haqqında "qeyri-fəal” ifadəsi işlədilməsin. Çünki millət vəkili haqqında o ifadənin işlənməsi hər bir laçınlıda təəssüf doğurur. Onu da bildirim ki, namizədliyimiz irəli sürülərkən partiyamızın rəhbəri cənab İlham Əliyevin qarşımıza qoyduğu əsas tələblər və tapşırıqlar da diqqətimizə çatdırılıb. Deyilib ki, Yeni Azərbaycan Partiyasının sədri hər bir deputatdan istər siyasi, istər iqtisadi, istərsə də gündəlik ictimai-sosial proseslərə münasibətdə xüsusi fəallıq tələb edir. Hər kəs yaxşı anlamalıdır ki, problemlərin hamısını cənab Prezident həll etməli deyil. Bütün siyasi partiyalar, xüsusilə parlamentdə böyük səs çoxluğuna malik Yeni Azərbaycan Partiyasının dəstəyi ilə seçilmiş millət vəkillərinin borcudur ki, onların arxasında duran seçicilərin fikirlərini efadə etsinlər. Seçici noyabrın 1-də millət vəkilini seçərkən səhv etmədiyinə, səsinin havayı getmədiyinə və düzgün qərar verdiyinə inanmalıdır. 

– 121 saylı Laçın seçki dairəsindən 10-a yaxın deputatlığa namizəd rəsmi qeydiyyatdan keçib. Sevindirici haldır ki, laçınlı namizədlər ötən seçkilərdə də mübarizəni ləyaqətlə aparıblar. Ümidvarıq ki, indiki seçkilərdə də bu ənənə qorunacaq. Siz necə düşünürsünüz?

– Bu bir mübarizə formasıdır və cəmi 20 gün çəkəcək. Keçmiş seçkilərdə də deputatlarla bu və ya digər dərəcədə münasibətim olub. Aktiv seçki prosesində iştirak etməsəm də, dediyiniz məsələnin müzakirəsinə tez-tez rast gəlirdim. Yəni toxunduğunuz məsələ o zaman da aktual idi. Mən də dərk etməliyəm, mənimlə bərabər bu mübarizəyə qoşulmuş namizədlər də dərk etməlidirlər ki, bir nəfər namizədə seçki dairəsi düşmür. Ən azı 2-3 namizəd olmalıdır. 
Namizədlərin siyahısına baxmışam, hamısı laçınlıdır, digər yerlərdən yoxdur. Biz isə bir-birimizi hansısa formada tanıyırıq. Dilindən, dinindən asılı olmayaraq hər bir laçınlını qohumluq, qonşuluq və dostluq əlaqələri birləşdirir. 20 günlük seçki prosesindən sonra Mərkəzi Seçki Komissiyası seçilən namizədi elan edəcək. Təbii ki, seçilməyənlər laçınlılıqdan çıxmayacaq. Mən indidən bu seçkidə qalib gələcək insanı təbrik edirəm. Kim qalib gələcəksə, indidən onun əlini sıxmağa hazıram. Biz noyabrın 1-dən sonra xeyir-şərdə, tədbirlərdə bir yerdə olacağıq. Mən inanmıram ki, hansısa laçınlı Laçını başqa laçınlılardan çox istəsin. Hamının qəlbində bir Laçın sevgisi var. Gərək elə edək ki, seçki kampaniyası başa çatandan sonra görüşəndə utanmayaq. Atalarımızın da gözəl bir deyimi var: "Dalaşanda elə dalaş ki, barışmağa üzün olsun”. 

Mən inanıram ki, bu dəfə də namizədliyi qeydə alınmış laçınlılar siyasi mübarizəni ləyaqətlə aparacaq və heç kəs 20 gün müddətində özümüzə aid olmayan nalayiq fikirlərlə yaddaşlarda qalmaq istəməyəcək. Televiziyada, yazılı mətbuatda, saytlarda və sosial mediada çıxışlarımız zamanı Laçını təmsil etdiyimizi yaddan çıxarmamalıyıq. Şəxsən mənim üçün namizədlərin hər biri əzizdir. Həm də ona görə əzizdir ki, bu insanlar özlərində cəsarət taparaq qalib gəlmək əzmi ilə mübarizəyə qoşulublar. Onlara hörmətimin bir səbəbi də budur. Elə sizin tribunanızdan mübarizəyə qoşulan namizədlərin hər birinə uğurlar arzulayıram!

Bu gün suallarımızı namizəd kimi cavablandıran müsahibimizlə Milli Məclisin üzvü kimi həmsöhbət olmaq arzusu ilə: 

Arif MƏMMƏDLİ
"Laçın yurdu” jurnalının baş redaktoru