Rusiya 2016-cı il yanvarın 1-dən Türkiyə ilə vizasız rejimi dayandırır. 
APA-nın Moskva müxbirinin verdiyi məlumata görə, bunu Rusiya xarici işlər naziri Sergey Lavrov bildirib.  
"Rusiya rəhbərliyi tərəfindən iki ölkə arasında olan vizasız rejimin dayandırılması qərara alınıb. Bu qərar gələn il yanvarın 1-dən qüvvəyə minəcək", - deyə S.Lavrov suriyalı həmkarı Valid Muallimlə birgə keçirdiyi mətbuat konfransında bildirib. 
Rusiya prezidenti Vladimir Putin isə türkiyəli həmkarı Rəcəb Tayyip Ərdoğanın görüşmək istəyini rədd edib. Bunu Rusiya prezidentinin köməkçisi Yuri Uşakov deyib. 
Y.Uşakov bunun səbəbini Ankaranın Rusiyaya məxsus "Su-24" təyyarəsinin vurulmasına görə üzr istəməməsi ilə əlaqələndirib. O, Putinin Parisdə keçiriləcək beynəlxalq iqlim konfransı çərçivəsində İsrail baş naziri Benyamin Netanyahu və Almaniya kansleri Angela Merkellə görüşəcəyini bildirib.