"Rusiya baş naziri Dmitri Medvedevin Dağlıq Qarabağda vəziyyətin gərginləməsinə görə Türkiyəni ittiham etməsi və hazırkı vəziyyət "türk amili”nin təsir etdiyini deməsi anlaşılandı. Çünki, üç günlük Qarabağ savaşı Ermənistanla yanaşı bu ölkəni müdafiə edən bir-iki dövlətin o cümlədən də Rusiyanın nüfuzunu ciddi şəkildə zədələdi. Ona görə də Medvedevin və digər rus rəsmilərinin bu cür açıqlamalar verməsi təəcüblü deyil. Əvvəla nəzərə almaq lazımdır ki, Azərbaycan tərəfi ikinci Qarabağ savaşında iki dövlətlə iki fərqli cəbhədə müharibə aparırdı. Bunlardan biri Ermənistanla hərbi müharibə, digəri isə Ermənistanın ağası sayılan Rusiya ilə informasiya müharibəsi idi."
Bunu Xeberle.com-a açıqlamasında politoloq Elçin Abdullayev deyib.
Onun sözlərinə görə, nəticədə Azərbaycanın hər iki cinahda sistemli şəkildə müharibə aparması və qələbə qazanması, Ermənistanla yanaşı Rusiyanı da çaşbaş salıb. Bu müharibənin davamlı olması Rusiyanın bölgə planlarını tam olaraq iflasa uğrada bilərdi. Məhz bunun nəticəsi idi ki, Kreml atəşkəsə nail olunmaq üçün əl-ayağa düşmüşdü. Atəşkəsə nail olmasına rəğmən Kremlin də bu müharibədən zərər gördüyünü düşünmək olar: 
"Birincisi: Erməni xalqında Rusiyanın formalaşdırdığı Ermənistan ordusunun məntiqi çatışmamazlıqlar üzündən müvəffəqiyyətsizliyə uğraması və sonradan bunun aradan qaldırılmasının mümkün olmayacağı fikirlərinin meydana gəlməsi ehtimalı artdı.
İkincisi: Sülhə nail olunmayacağı təqdirdə NATO üzvü olan Türkiyənin dəstəklədiyi Azərbaycanın, Dağlıq Qarabağı işğaldan azad etməsi üçün başında, Rusiyanın durduğu Kollektiv Təhlükəsizlik Müqaviləsi Təşkilatının üzvü olan Ermənistana qarşı savaşa başlama qorxusundan vahiməyə düşən ermənilərin, rəsmi Moskvadan birdəfəlik üz çevirmə meyiilərinin yaranması
Üçüncüsü: Müharibənin yenidən alovlanacağı təqdirdə dünyada, xüsusəndə qərbdəki erməni lobbilərinin Rusiyaya qarşı təsirli fəaliyyətinin müşahidə olunması.
Dördüncüsü: Kremlin süpürgəsi sayılan Sərkisyana qarşı xalq hərəkatının başlanılması və nəticədə Rusiyanın bölgədə son dayaq nöqtəsi olan Ermənistandan uzaq düşməsi.
Beşincisi: Üç günlük müharibədən sonra Rusiyanın yaratdığı Avrasiya İttifaqında təmsil olunan Qazaxıstan və Belarus kimi ölkələrin Azərbaycana dəstək verməsi və bu təşkilatın gələcəyinin şübhələrə yol açması.
Altıncısı: Rus cəmiyyətinin elitasında Ermənistan-Azərbaycan münasibətlərinə dair fikirlərin toqquşması və tədricən Rusiya daxilində Kremlin yürütdüyü tərəf siyasətinə qarşı hərəkatın başlaması ehtimalı.
Politoloq qeyd edib ki, sadalanan bu amillər Rusiyanın əlehinə işləyən amillərdir. Odur ki, Kreml rəsmiləri o cümlədən baş nazir D.Medvedev hadisələri önləmək üçün diqqətləri yenidən Türkiyənin üzərinə yönləndirmək istəyirlər: "Yaxşı olardı ki, Kreml rəsmiləri son hadisələrdən nəticə çıxarıb Dağlıq Qarabağ münaqişəsində tərəfsiz olduqlarını ortaya qoysun. Əgər bu gün Rusiyanın müdaxiləsi ilə əldə edilən atəşkəs DQ-da vəziyyəti qismən sakitləşdiribsə də müharibə ehtimalının tamamən önünə keçməyib. Çünki, Azərbaycan-Ermənistan münaqişəsinin birdəfəlik bitirilməsi üçün rəsmi Bakının şərtləri açıq aydın ortadadır. Və artıq son hadisələr də gösdərdi ki, buna nə qədər tez əməl olunarsa regionda sabitlik bir o qədər tez bərqərar olar."