“Erməni deputatı Azərbaycan haqqında yanlış fikir oyatmağa çalışır”. Bu fikri Avropa Şurası Parlament Assambleyasının (AŞPA) qış sessiyası çərçivəsində isveçli deputat Yonas Gunnarssonun “Avropada irqçilik və dözümsüzlüyün qarşısını almaq strategiyası” adlı məruzəsi ətrafında müzakirələrdə Azərbaycanın AŞPA-dakı nümayəndə heyətinin üzvü Sahibə Qafarova səsləndirib. Sahibə Qafarova bildirib ki, son illərdə Avropa onun siyasi və demokratik stabilliyinə təsir göstərən iqtisadi və maliyyə böhranlarının səbəb olduğu bir sıra problemlərlə üzləşir. 

“Bu problemlərdən biri də cəmiyyətin bütün təbəqələrinə təsir göstərən irqçilik və irqi diskriminasiyadır. Assambleya hüquq mühafizə orqanlarında irqçilik məsələsinə də diqqət yetirməlidir. Bu sahədə Avropa Şurasına üzv ölkələrin ən yaxşı təcrübə nümunələri müəyyən edilməli, bu problemin qarşısının alınması üsulları yaradılmalıdır”.

Ölkəmizə qarşı qərəzli mövqe nümayiş etdirən, yalan və böhtanla dolu çıxışlardan əl çəkməyən Ermənistan nümayəndə heyətinin üzvü Naira Zöhrabyanın Azərbaycan haqqında fikirlərinə münasibət bildirən millət vəkili qeyd edib ki, N.Zöhrabyan Azərbaycan haqqında yanlış fikir oyatmağa çalışır. 

“N.Zöhrabyanın fikirləri heç bir əsasa, məntiqə söykənmir. Azərbaycan xalqı təkcə azərbaycanlılardan ibarət deyil, çoxmədəniyyətlidir. Azərbaycanda məscidlərlə yanaşı, kilsə və sinaqoqlar da fəaliyyət göstərir. Azərbaycan bir çox etnik qrupların vətənidir. Onlar əsrlər boyu ölkəmizdə mehriban şəraitdə yaşayırlar. Azərbaycanda yəhudilər, ruslar, gürcülər, ukraynalılar, ermənilər və digər millətlərin nümayəndələri bərabər hüquqlara malikdir. Amma bu, bir həqiqətdir ki, Ermənistanda etnik qruplar mövcud deyildir”. 

S.Qafarova Azərbaycan barədə səhv məlumatlar səsləndirən Zöhrabyana məsələni daha ətraflı araşdırmağı məsləhət görüb: “Burada Azərbaycan haqqında yanlış məlumat verən Naira Zöhrabyana məsləhət görərdim ki, internetdə axtarış aparsın və Ermənistan Prezidenti Serj Sarkisyanın yüzlərlə azərbaycanlı qadının, uşağın və yaşlı insanların qanına qəltan edilməsi, Xocalı qətliamında şəxsən iştirakı barədə özünün verdiyi müsahibəni tapsın. Onlar azərbaycanlı olduqları üçün öldürülmüşlər. Bax bu, irqçilikdir”.

Azərbaycanlı deputatın çıxışı maraqla qarşılanıb.

./azertag.com/