İnterAz-ın Rusiya bürosu xəbər verir ki, Rusiya azərbaycanlılarının milli-mədəni muxariyyətinin Ağsaqqallar şurasının sədri, Rusiya Xalqlar Assambleyasının sədri Abbas Abbasov Jirinovskinin azərbaycanlıları təhqir edən çıxışı ilə əlaqədar Rusiyanın Baş Prokurorluğuna məhkəmə ərizəsi ilə müraciət edib. 
Xatırladaq ki, martın ortasında Rusiyanın Dövlət Dumasındakı çıxışı zamanı azərbaycanlılar haqqında milli qürura toxunan bir sıra təhqiredici ifadələrə yol verib. 
O deyib: “Azərbaycan” sözü rus dilinə tərcümədə nə deməkdir? Azər – Xəzər dənizi, baca – qıraq, yerdir. Yəni, azərbaycanlılar – Xəzər dənizinin sahilində yaşayan insanlar deməkdir. Bu millətdir ki?”. 
“Azərbaycanlı” məfhumu insanın milli mənsubiyyətini müəyyən edən termindir ki, Rusiyada rəsmi olaraq tanınıb və sənədləşmədə istifadə olunur. Və bunu inkar etmək qanunvericiliklə məşğul olan üçün qeyri-etik şeydir”, - deyə Abbasov bildirib. Onun sözlərinə görə, Jirinovskinin bəyanatı Rusiya Cinayət Məcəlləsinin 282-ci maddəsi ilə cinayətdir. 
Abbas Abbasov xatırladıb ki, Rusiyada etnik azərbaycanlı olan 600 min rusiyalı və 1,5 mln yaxın Azərbaycan vətəndaşı yaşayır və Jirinovskiy özünün nalayiq sözləri ilə nəinki Azərbaycan xalqını, hətta Rusiya vətəndaşları və seçicilər olan yerli azərbaycanlıların hüquqlarını kobud şəkildə pozub. 
“Bizi ümumiyyətlə belə çıxışların mümkünlüyü təəccübləndirir. Çoxmillətli və polikonfessional Rusiyanın parlamentinin tribunasından ksenofobiya xarakterli çıxışlar emosional çıxışlar kimi qələmə verilir. Dövlətin müvafiq qurumları Rusiyaya qarşı bu cinayətkar çıxışlara kəskin reaksiya vermək əvəzinə belə kobud qanun pozuntularına yol verir və cavabsız qoyur. Jirinovskinin azərbaycanlılara aid dedikləri Rusiyada yaşayan və bu ölkənin vətəndaşı olan bütün xalqların nümayəndələrini təhqir edir. Buna görə də biz təşkilat olaraq Rusiyanın Baş Prokurorluğuna, müvafiq dövlət qurumlarına və məhkəməyə müraciət edərək bu cür təhlükəli, təhqiredici çıxışların qarşısını alıb onların müəlliflərini cinayət məsuliyyətinə cəlb etməkdir, çünki belə hallar cəmiyyətdə milli zəmində düşmənçilik əhval-ruhiyyəsinə zəmin yaradaraq dövlətin əsaslarına ciddi ziyan vurur””, - deyə Abbas Abbasovun başçılıq etdiyi təşkilatın adından yayılan bəyanatında bildirilir.