Ermənistan prezidenti Serj Sarkisyan Şuşa şəhərinin işğalı günündə Azərbaycanın işğal altında olan Dağlıq Qarabağ regionuna səfər edib. İstiPress-in erməni mətbuatına istinadla verdiyi məlumata görə, mayın 8-9-da keçirilən tədbirlərə qatılacaq. 
Onun təyyarəsi Xankəndinə dünən axşam saatlarında enib. Onu qondarma rejimin "rəhbəri" qarşılayıb. 
Bu gün Azərbaycanın Şuşa şəhərinin ermənilər tərəfindən işğal olunmasından 25 il ötür. Azərbaycanın bu qədim, zəngin tarixə və mədəniyyətə malik şəhərinin Ermənistan Silahlı Qüvvələri tərəfindən ələ keçirilməsi ilə Dağlıq Qarabağın işğalı başa çatdırılıb.
Şuşanın işğalı nəticəsində 480 günahsız vətəndaş qətlə yetirilib, 600 nəfər yaralanıb, 22 min nəfər öz yurdundan didərgin düşüb. Əsir götürülmüş 68 soydaşımızın taleyi barədə bu günə qədər məlumat yoxdur.
İşğal nəticəsində Şuşadakı bir sıra tarixi-mədəniyyət abidələri düşmən tərəfindən talan edilib. Bu siyahıya Xan mağarası, Qaxal mağarası, Şuşa qalası da daxil olmaqla bütövlükdə 279 dini, tarixi və mədəni abidə daxildir.

Xəbərdən istifadə edərkən istinad etmək vacibdir.