Kremlin Ukraynadakı kobud və volyuntarist (ağılı deyil, iradəni psixik həyatın həlledici amili hesab etmə - red.) siyasəti nəticəsində Putin Rusiya ərazisində ciddi qarşıdurmalarla üzləşəcək. Bu gün Abxaziyada baş verənlər bunu bir daha təsdiq edir.

Axar.az xəbər verir ki, bunu ukraynalı politoloq Viktor Nebojenko müsahibəsində deyib.

“Maydan təkcə Putini gözləmir. Ukraynadakı hadisələrdən sonra Rusiya, Belorus və Qazaxıstan kimi ölkələri də bu cür zərbələr gözləyir. Putinin kobud şəkildə Krımı ilhaq edərək, başqa dövlətin daxili işlərinə qarışmasından sonra Abxaziyada baş verənlər Rusiyada yeni Maydanın yarandığını göstərir. Bu cür partlayışlar bütün Rusiyanı əhatə edəcək”, - deyə politoloq bildirib.

Politoloq hesab edir ki, Putinin Ukraynanın işlərinə kobud şəkildə qarışması Kreml üçün Ukrayna, Qafqaz və Suriya cəbhəsi açıb.

“Putin sadəcə, hər şeyi kobudluqla etdi və cavab olaraq Abxaziyadakı partlayışla cavabını aldı. Daha sonra Qafqaz partlayacaq. Ermənistanın Gömrük İttifaqına tam qoşulmasından sonra Dağlıq Qarabağda vəziyyət gərginləşəcək. Regionun iqtisadi problemləri həll olunmayacaq. Vəziyyət birdən-birə pisləşəcək, insanlar küçələrə çıxacaq”, - politoloq əminliklə bildirib.

Nebojenko payızda bütün Rusiyanın qarışacağını da proqnozlaşdırıb: “Maydan Povoljye və Həştərxandan İnquşetiyaya qədər bütün ərazini işğal edəcək. Bu, Putinin ağılsız və volyuntarist gedişinin nəticəsidir”.