Bu gün iyunun 8-də gecə öz evində qətlə yetirilən Abşeron Rayonu Saray bələdiyyəsinin sədri Vəsilə və Vəfadar Əbilhəsənovların 40 mərasimidir. Cütlük qətlə yetiriləndən sonra, həmişə nənələri Meyxanımla birlikdə yaşayan 8-11 yaşlı uşaqlar nənəsindən kənarlaşdırılaraq, Vəfadarın qardaşına və qardaşı qətlə yetiriləndən sonra tələsik Azərbaycan vətəndaşlığı alan Natellaya verilib.
Qeyd etdiyimiz kimi, uşaqlara doğulan gündən nənəsi baxıb, tərbiyə edib. Əldə etdiyimiz məlumata görə, cütlüyün iyulun 19-da baş tutacaq yas mərasimi isə ayrı-ayrılıqda keçiriləcək. Vəfadar Əbilhəsənovun ailəsi Meyxanım Həsənova ilə bütün əlaqələri qırıb. Vəfadarın ailəsi uşaqlara sahib çıxmaqla, əslində qardaşdan qalan mal-mülkü itirmək istəmirlər. Vəsilənin 40 mərasimini keçirməyə isə anası Meyxanımın imkanı yoxdur. Hətta Vəsilə ilə işləyən Abşeron Rayon İcra hakimiyyətinin əməkdaşları və Saray bələdiyyəsinin üzvləri də, ailəyə kömək etməkdən imtina ediblər. Baxmayaraq ki, Vəsilə Əbilhəsənova cəmiyyətdə xeyirxah, hər kəsə yardım edən bir xanım kimi ad çıxarmışdı.
Sonda onu da qeyd edək ki, Vəfadar Əbilhəsənovun 40 mərasimi Sarayda, Vəsilə Əbilhəsənovanın isə Sumqayıt şəhərində 2-ci mikrorayonda Heydər Əliyev heykəlinin yaxınlığında yerləşən Xeyir-Şər evlərindən birində keçiriləcək.
Xeberle.com