"Mixail Saakaşvilinin Ukraynaya qayıdışı ağılsız addımdır. Hətta, onun arxasında müəyyən qüvvələr dayansa da, Odessanın keçmiş merinin Ukraynaya bu formada girişi ölkədə sabitliyin pozulması üçün ciddi əsas ola bilər".
Bu sözləri politoloq Qabil Hüseynli Gürcüstanın eks-prezidenti Mixail Saakaşvilinin öz tərəfdarları ilə birlikdə Polşa sərhədindən Ukrayna ərazisinə keçməsini
xeberle.com saytına şərh edərkən bildirib.
Politoloqun sözlərinə görə ”Bu hadisə Rusiya üçün göydəndüşmə fakta çevriləcək. Hansı ki, bu gün Rusiya KİV-lərinə baxanda Saakaşvilinin Ukraynaya girişinin təqdir edildiyi açıq-aşkar görünür. Sabiq merin Ukrayna ərazisinə keçməsi qanuni hərəkət deyildi. O, pasport qeydiyatından keçmədən ölkə ərazisinə daxil olub”.
Politoloq Q.Hüseynli qeyd etdi ki, Saakaşvili onun üçün qurulmuş tələyə düşüb: "Birincisi, kordonu yarıb keçmək qanunvericilik aktının pozulması kimi dəyərləndirilə bilər. İkincisi, isə onun Ukraynaya girişi zamanı heç bir pasport yoxlamasından keçməməsi, onun sərhəd keçiminə şərait yarada biləcək vizanın olmaması və bütün bunlar hamısı toplanaraq sərhədi qeyri-qanuni keçmə maddəsinə uyğun olaraq keçmiş mer haqqında cinayət işinin qaldırılmasına səbəb ola bilər. Əgər Saakaşvili vətəndaşlığına xitam verilməsilə bağlı mübarizəni hüquq müstəvisində aparsaydı, daha yaxşı olardı. Ən azı o, bu məsələ ilə əlaqədar Avropa Məhkəməsinə müraciət edə bilərdi. Lakin keçmiş mer qarşıdurma xəttini seçdi və bunu da qazandı. Bu təhrikçi yolda da onun baş məsləhətçilərindən biri Yuliya Timaşenko olub”.
"Saakaşvilinin özü ilə oğlunu və həyat yoldaşını da götürməsi avantyuradan xəbər verir. Bu, onun reytinq itkisi, ümumiyyətlə, siyasətçi kimi gələcək fəaliyyətində müxtəlif amillərin meydana çıxması ilə nəticələnəcək. Saakaşvili cox ciddi səhvə yol verdi. Və bu səhf onun gələcək həyatında dərin izlər buraxacaq”, - deyə politoloq fikirlərini bildirib.
"Qeyd edim ki, M.Saakaşvili xidmətləri olan və demokrat bir şəxsiyyətdir. Fəqət, onun Ukraynada vəziyyəti gərginləşdirməyə doğru yönəlik hərəkətini siyasi uzaqgörənlik kimi dəyərləndirmirəm.Bu məsələdə, Amerika susur, Almaniya susur, təkcə Polşa fəaldır. Orada da yüksək elita bu məsələlərə reaksiya vermir. Yalnız, deputat səviyyəsində olan şəxslər Saakaşvilini müdafiə edir.”
"Necə hesab edirsiniz, Saakaşvili Amerikanın, yaxud da Qərbin aparıcı dövlətlərinin razılığı olmadan Ukraynaya giriş edərdimi? Ümumiyyətlə, Qərb dövlətlərinin dəstəyilə Ukraynada iqtidar olan Poroşenko ilə Qərbin digər "layihəsi” Saakaşvilinin qarşı-qarşıya qoyulması maraqlı ölkələrə nə verəcək?” Sualına isə politoloq bildirdi ki, təqribən bir ay öncə ABŞ müdafiə naziri Ceyms Mettis Ukraynanın Müstəqillik günü ilə bağlı bu ölkəyə gəldi və oradakı prosseslərə yüksək qiymət verdi: "Ondan sonra isə NATO ilə Ukrayna ordusunun hərbi paradına baxaraq hətta, bu ölkəyə ABŞ tərəfindən ölümcül silah veriləcəyinə dair ilk dəfə fikir səsləndirdi. Mənim zənnimcə, Qərb 100 faiz qələbəyə əmin olmadığı işlərə getmir. Qərbə belə şou xarakterli avantyura lazım deyil. Əgər Qərb Poroşenkonu başqası ilə əvəzləmək istəsə və ya da oliqarxların iqtidarına son vermək istəsə, onlara bir neçə gün kifayətdir ki, istəklərini gerçəkləşdirsinlər. Bu baxımdan Qərbin belə bir planlarını həyata keçirməkdən ötrü M.Saakşaviliyə yer yoxdur. O mənada yer yoxdur ki, məlum avantyurist addımlar olan yerdə Qərb yoxdur. Çünki, bu cür addımlar Rusiyanın maraqlarına xidmət edir. Ona görə də Qərb Saakaşvilini bu cür qorxunc və yarıtmaz layihəsi kimi işə salmaz. Bu çox kobud və ciddi sürətdə hazırlanmamış layihəyə bənzəyir”, - deyə politoloq fikrini tamamlayıb.
Siyasət şöbəsi
Xeberle.com
Xəbərdən istifadə edərkən istinad etmək vacibdir.
