Bildiyimiz kimi, Türkiyə Afrin əməliyyatından sonra Menbiçə daxil olacağını ən üst səviyyədə dilə gətirib. Bu da məlumdur ki, Menbiçdə kürd silahlılarıyla bərabər Türkiyənin NATO-da müttəfiqi olan Amerika Birləşmiş Ştatlarının (ABŞ) əsgərləri də vardır. Türkiyə rəsmilərinin Menbiç əməliyyatıilə bağlı səsləndirdikləri fikirlərə Amerikanın sözügedən ərazidə yerləşən əsgərlərinin komandiri Türkiyə rəsmilərinin ard-arda verilən bəyanatına "Biz buradan çəkilməyəcəyik” – kimi ultimativ cavab verib. Türkiyə isə Afrindən sonra Menbiçə girməkdə israrlıdır.
Belə bir məqamda Türkiyə ilə ABŞ Menbiçdə qarşı-qarşıya gələcəklərmi? Yoxsa rəsmi Ankara və rəsmi Vaşinqton bu məsələdə ortaq qərar verəcəklər? - sualına politoloq Arzu Nağıyev açıqlama verib.
O, Xeberle.com-a açıqlamasında bildirib ki, antiterror əməliyyatları aparılarkən bu iki qüvvə bir-birilərilə razılığa gələcəklər: "Düşünürəm ki, Afrində gedən əməliyyatlara geniş şəkildə nəzər yetirmək lazımdır. Rojova deyilən anklavda beş yüz minə yaxın kürd yaşayır. Onlar müxtəlif məzhəbə qulluq edən, müxtəlif siyasi əqidəli şəxslərdir. Sadəcə olaraq, ABŞ o vaxtı onlardan İŞİD-ə qarşı mübarizə aparan, dağda döyüşə bilən bir qrup yaradaraq istifadə etmişdi. Eyni zamanda Türkiyə heç də Afrində təkbaşına əməliyyatlar keçirmir və Azad Suriya Ordusu deyilən qurumdan da istifadə edir. Yəni burada hərənin öz məramı, məqsədi var. Mən düşünürəm ki, Afrin əməliyyatından sonra müxtəlif ərazilərə keçmək razılaşdırılmalardan sonra mümkün olacaq. Çünki kürdlərin arasında da müxtəlif meyilli qüvvələr var. Burada əsas məqsəd heç də Suriyanın ərazisini ələ keçirmək deyil. Türkiyənin əsas məqsədi yarana biləcək bu zonanı yenidən qurmaqdır. Çünki daim, istənilən vaxt onun sərhədlərinin təhlükəsizliyinə qarşı təhdid var. Düşünmürəm ki, eyni hərbi blokda təmsil olunan iki qüvvə qarşı-qarşıya gəlsin. Yəqin ki, antiterror əməliyyatları aparılanda onlar bir-birilərilə razılığa gələcəklər. Bildiyimiz kimi, hətta əməliyyat başlamamışdan əvvəl Rusiya ilə də razılaşmalar aparılıb. Əgər hər hansı bir problem yaransa (təbii ki, yaranmasa yaxşı olar) həmin ərazi ikinci Əfqanıstana çevrilə bilər və müxtəlif başıpozuq qruplaşmalar, müxtəlif dövlətlərin nəzarətində olan qruplar ayrı - ayrı cəbhələrdə vuruşa bilərlər. Buna görə də düşünürəm ki, hər bir addım razılaşdırılaraq atılacaqdır”.
Elnarə Salamova
Xeberle.com
Siyasət bölməsi
Xəbərdən istifadə edərkən istinad etmək vacibdir.
