Bu gün 26-cı ildönümünə yaxınlaşdığımız Xocalı qətliamında şəhid edilən bütün azərbaycanlı qardaşlarımızı rəhmətlə və təzimlə yad edirik.
Bu sözləri Türkiyə Prezidenti Rəcəb Tayyib Ərdoğan Ədalət və İnkişaf Partiyasının (AKP) qrup toplantısında çıxışı zamanı deyib.
"Dağlıq Qarabağdakı Xocalı şəhərində uşaq, qadın, qoca demədən vəhşicəsinə qətlə yetirilən məsumlara Allahdan rəhmət, azərbaycanlı qardaşlarımıza da başsağlığı və səbr diləyirəm. Əgər dünyada vəhşicəsinə bir qətliam axtaran varsa, bax o Xocalıdır. Son dövr insanlıq tarixinin ən böyük zülmlərindən biri 26 il öncə Xocalıda yaşanıb. Dünyada hər fürsətdə demokratiyadan, insan hüquq və azadlıqlarından bəhs edib Xocalı qətliamının günahkarlarına qarşı hər hansı sanksiya tələb edən və ya həyata keçirən bir ölkə barədə eşitmisiniz? Eşidə bilməzsiniz. Çünki əgər söhbət müsəlmandan, xüsusən də türkdən gedirsə, bunların qulaqları, gözləri, vicdanları bağlanır. Görməzlər, eşitməzlər, hiss etməzlər. Ancaq hər kəs unutsa da, biz unutmayacağıq, unutdurmayacağıq. Xocalı qətliamını da, qardaşlarımıza qarşı törədilən bütün qeyri-insani cinayətləri də həmişə xatırlayacaq və xatırladacağıq”, - Ərdoğan bildirib.
Qeyd edək ki, Türkiyə prezidentinin çıxışı zalda "Şəhidlər ölməz, vətən bölünməz” şüarları və alqışlarla müşayiət olunub.(Axar.az)

Xəbərdən istifadə edərkən istinad etmək vacibdir.