Ermənistanda baş vermiş hadisəni erməni xalqının uğuru kimi qiymətləndirmək yanlışdır. Bunu sosial şəbəkələrdə Region TV-nin sədr müavini, siyasi şərhçi İbrahim Məmmədov qeyd edib. O bildirib ki, Ermənistanda Sərkisyanın hakimiyyətdən getməsindən başqa heç nə dəyişməyib və dəyişəcəyi ehtimalı da minimumdur. "Sadəcə Ermənistan dağıdıcı "permanent inqilablar" dövrünü yaşamaqda davam edir. Oyuncaq erməni dövləti son 20 ildə 4-cü siyasi böhranını yaşadı. -1998-ci ildə Petrosyan beləcə hakimiyyətdən uzaqlaşdırıldı. -Sonra Ermənistan parlamentində gülləbaranla arzuolunmaz siyasətçiləri aradan götürdülər. - 2008-ci ildə küçədə 30-a qədər adamı öldürüb hakimiyyəti mənimsədilər. - İndi də hakimiyyət küçə nümayişləri vasitəsilə dəyişdi. Bu ölkədə hakimiyyətin bir qayda olaraq zorakı metodlarla dəyişməsi dövlətin əsaslarını sarsıdır və iqtisadiyyatı daha da çökdürür. Heç bir investor beş ildən bir siyasi böhrana düşən, siyasi və hərbi təhlükəsizliyi dayanıqlı olmayan ölkəyə yatırım etməz. 23 aprel hadisəsi də iqtisadiyyata daha bir zərbə vuracaq. 2-cisi Ermənistanın 20 ildə 4-cü dəfə-orta hesabla beş ildən bir, belə siyasi böhran yaşaması Azərbaycanın bu ölkəyə qarşı apardığı "iqtisadi bloklama" siyasətinin yaxşı nəticəsi kimi qiymətləndirilə bilər.

 Beləki, Ermənistandakı ağır sosial-iqtisadi, gərgin hərbi vəziyyətin əsas səbəbi Azərbaycanın onu iqtisadi layihələrdən kənarda və 2016-cı ilin aprel qorxusu altında saxlamasıdır. Nəhayət, S.Sarkisyanın hakimiyyətdən getməsi avtomatik olaraq Ermənistanın Avropayainteqrasiya edəcəyi anlamına gəlmir. Sarkisyanın və onu gizli dəstəkləyən partiyanın deputatları parlament çoxluğuna malikdirlər. Və onların özlərinə "yeni bir sarkisyan"ı baş nazir seçəcəklərinə şübhə yoxdur. Ermənistan nə geosiyasi oriyentasiyasını dəyişəcək, nə də Qarabağın işğalından imtina edəcək. Daha konkret: Ermənistanın Avropaya istiqamət götürməsi üçün Qarabağın işğalı siyasətindən əl çəkməsi şərtdir. Əks təqdirdə Ermənistanda heç nə dəyişməyəcək. Ona görə ki, Ermənistanda bütün "makroidarəçilik" Qarabağın işğalı siyasətinin üzərində qurulub", - deyə İ.Məmmədov söyləyib.