Məlumdur ki, Ermənistanın analitikləri ölkədə baş verən hadisələrin Rusiya prezidenti Vladimir Putinin qurduğu siyasi modelin iflasa uğraması ilə bağlı fikirlər səsləndiriblər. Ölkədə baş nazir vəzifəsinə namizəd olan Xalq Hərəkatının lideri Nikol Paşinyan isə bildirib ki, baş nazir olacağı təqdirdə Ermənistan Avrasiya İttifaqı və Kollektiv Təhlükəsizlik Müqaviləsi Təşkilatının (KTMT) üzvü kimi qalacaq. O həmçinin bidirib ki, Avropa Birliyi və Amerika Birləşmiş Ştatları (ABŞ) ilə münasibətləri də dərinləşdirəcək. Görünən odur ki, N.Paşinyan baş nazir olacağı təqdirdə, ölkəsi yenidən Rusiyanın yaratdığı "çətri altında" olan təşkilatlarda təmsil olunacaq. Bununla da, Xalq Hərəkatı liderinin dedikləri erməni analtiklərinin fikirlərini təkzib etmiş olur. Ümumiyyətlə N.Paşinyan xarici siyasətdə balansı qoruya biləcəkmi sualına politoloq Elxan Şahinoğlu onun baş nazir kimi uğur qazana bilməyəcəyini dedi. " Aydındır ki, N.Paşinyan Rusiya ilə ittifaqdan qopacaqları ilə bağlı fikirlər irəli sürməyəcəkdir. O, nə qədər qərbpərəst olsa da, bunu gizlətməyə çalışacaq. Müxalifət liderinin əsas məqsədi Serj Sarkisyanı istefaya məcbur etmək idi. Bəlkə heç özü də buna nail olacağına inanmırdı. Amma bunu bacarsa da, onun nə proqramı, nə də ki, komandası var. O, xarici siyasət və Dağlıq Qarabağ məsələsində də hələ ki, S.Sarkisyanın yürütdüyü siyasəti davam etdirəcəyini deyir, daxili siyasətdə isə uğur qazanması üçün gərək iqtisadi islahatları genişləndirsin. Lakin bunun üçün Ermənistanın resursları yoxdur. Ona görə də, mən düşünürəm ki, N.Paşinyanın nə deməsindən asılı olmayaraq, Ermənistan yenə də Rusiyadan asılı vəziyyətdə olacaq. Çünki Rusiya Ermənistanı faktiki nəzarətdə saxlayır, İran sərhəddini məhz onun qoşunları qoruyur, təbii qaz da erməni xalqına Rusiya tərfindən verilir. Əgər Ermənistan Rusiyanın təsirindən çıxarsa, həmin an çökər və Azərbaycan da hiss etsə ki, Rusiyanın artıq Ermənistan üzərində nəzarəti yoxdur, Qarabağ məsələsini asanlıqla təkbətək və müxtəlif yollarla həll edə bilər. Buna görə də Ermənistan Rusiya ilə ittifaqdan qopmayacaq. Bundan başqa N.Paşinyanın baş nazir kimi uğur qazanacağını da mən düşünmürəm. Mümkündür ki, yaxın aylarda Ermənistanda ümumiyyətlə xaos və anarxiya hökm sürsün. Çünki özü küçə vasitəsilə S.Sarkisyanı devirdi və deməli ona qarşı mübarizə də küçə vasitəsilə həyata keçiriləcək”.