Xəbər verdiyimiz kimi, Türkiyənin Cümhuriyyət Xalq, İYİ, Səadət
və Demokrat partiyaları arasında koalisiya yaradılması haqqında razılıq əldə
olunub. Dörd partiya yalnız parlament seçkisində birgə hərəkət edəcək və AKP-yə
qarşı birləşəcəklər.
Bu ittifaq ilə bağlı Xeberle.com-a açıqlama verən politoloq Nəzakət Məmmədova sözügedən dörd partiya tərəfindən
yaradılan koalisiyann R.T.Ərdoğana qalib gələ bilməyəcəyini və həmin birliyin
Türkiyə üçün heç bir işıqlı gələcək vəd etmədiyini bildirdi: "Mən düşünürəm
ki, bu ittifaq AKP, MHP iqtidarına ciddi təhlükə doğura bilməz. Çünki hazırda
AKP-nin, o cümlədən də R. T. Ərdoğanın nüfuzu çox yüksəkdir. Əgər o özünə və
AKP-nin reytinqinin yüksək olduğuna əmin olmasaydı, yəqin ki, belə tezliklə
növbədənkənar seçkilər təyin etməzdi. Əksinə düşünərdi ki, vaxt qazansın və
xalqın daha çox sevgisini qazanmaq üçün addımlar atsın. Bilirik ki, Türkiyədə
hakimiyyət də, müxalifət də daim əhalinin fikirlərini öyrənmək üçün sorğular
keçirirlər. R.T. Ərdoğan güman ki, aparılan bu sorğular nəticəsində reytinqinin
yüksək olduğunu görüb və növbədənkənar seçkilərin keçirilməsi qərarına gəlib. Yəqin
ki, AKP və MHP-nin seçkilərdə topladığı səs 50-51 faizdən aşağı olmayacaq. Əvvəlki
illərə də nəzər salsaq görərik ki, AKP-nin topladığı səs faizi həmişə yüksək
olub. R.T.Ərdoğanın əhali arasında reytinqinin artmasına təsir edən bir sıra
amillər vardır. Onun hakimiyyət illərində Türkiyənin iqtisadiyyatında yüksəlişlər
oldu, hərbi qüdrəti artdı və Suriyada öz təhlükəsizliyini uğurlu şəkildə təmin
etdi. Mən düşünürəm ki, R.T.Ərdoğan üçün yeganə mənfi hal kürd əhalisinin verəcəyi
səsin itirilməsi ola bilər. Amma millətçillərin, əhalininin böyük hissəsinin
ona səs verəcəyini düşünürəm. Birləşən partiyalar məsələsinə gəldikdə isə,
onların fəaliyyətində şübhəli məqamlar çoxdur. İYİ partiyasının ABŞ-dan dəstək
aldığı məlumdur, CHP-nin nüfuzuna isə son illərdə müəyyən qədər xələl gəlib,
HDP-nin rəhbəri həbsdədir və o açıq-aşkar PKK-nı, terroru dəstəkləyən
partiyadır. Ona görə də, o ittifaqın müvəqqəti olduğunu və Türkiyə üçün işıqlı
gələcək vəd etmədiyini düşünür, R.T.Ərdoğana faktiki, real rəqib olacaq bir
qüvvə görmürəm. Ərdoğan əslində seçkiləri qabağa çəkməklə çox ağıllı bir addım
atdı. Çünki vaxta çox qaldıqca onun nüfuzunu zəiflətmək üçün Türkiyəyə qarşı terror,
təxribat aksiyaları həyata keçirilə bilərdi. Biz bununla bağlı atılan müəyyən
addımları da gördük. Məsələn, Avropa Birliyi (AB) irəliləmə hesabatını açıqladı,
orada Türkiyənin təqdir olunduğu amillər də qeyd olunsa da, onun AB-dən
uzaqlaşdırılmasını bəyan etdi. Türkiyə hazırda Qərbin əbədi, əzəli rəqibləri
olan İran və Rusiya ilə yaxın müttəfiqlik münasibətindədir. Bunun da Qərbi qane
etməməsi AB-nin belə bir hesabatla açıqlamasına səbəb oldu. Ona görə də R.T.Ərdoğan
ölkədə baş verə biləcək hadisələrin, təxribatların qarşısını almaq üçün növbədənkənar
seçkilərin keçirilməsinə qərar verdi”.
Elnarə Salamova
Xeberle.com
Siyasət bölməsi
Xəbərdən istifadə edərkən istinad etmək vacibdir.
