"Ölkə Prezidenti cənab İlham Əliyevin 2020-ci ilin yekunlarına həsr edilmiş müşavirədə etdiyi çıxış, qeyd etdiyi fikirlər həqiqətən də proqram xarakteri daşıyır. Burada diqqəti çəkən məqam ondan ibarətdir ki, Azərbaycan müstəqilliyini qazandıqdan sonra beynəlxalq birlik tərəfindən Azərbaycanın qanuni torpaqları kimi tanınan ərazilərimiz işğal altından azad edildi, Azərbaycanın ərazi bütövlüyü bərpa edildi. 44 günlük müharibədən sonra üç dövlət başçısının imzaladığı bəyanatda qeyd olunan hər bir bəndə Azərbaycan tam şəkildə riayət edir və eyni zamanda bu bəyanatı imzalayan digər dövlətlərin siyasi rəhbərlərinin də bu bəndlərə riayət etmələrini tələb edir. Bu tələb ondan ibarətdir ki, Azərbaycanın ərazi bütövlüyünə, beynəlxalq səviyyədə tanınmış sərhədlərinə və beynəlxalq hüququn normalarına bütün ölkələr ciddi şəkildə riayət etməlidir. Hansısa bir ölkənin nümayəndə heyətinin və yaxud Ermənistanın Xarici İşlər nazirinin Azərbaycan dövləti ilə razılaşdırılmadan əvvəlki status-kvo şərti sanki qəbul edilmiş kimi müəyyən addımlar atması, cənab Prezidentin də haqlı olaraq qeyd etdiyi kimi, Azərbaycan xalqının hiddətinə səbəb olur və bunun qarşısı qətiyyətlə alınacaq. Əks halda Ermənistan "Dəmir yumruq” əməliyyatının bütün acı nəticələrini bir daha öz üzərində hiss edəcəkdir. Beynəlxalq hüququn subyekti olan digər ölkələr də öz addımlarına diqqət yetirməlidirlər. İstər sülhməramlı qüvvələrin fəaliyyəti, istərsə də digər beynəlxalq təşkilatların fəaliyyəti mütləq şəkildə Azərbaycan dövləti ilə, dövlətimizin qanunlarına uyğun şəkildə, Azərbaycan dövlətinin qanuni sərhədləri çərçivəsində və Beynəlxalq hüququn normalarına uyğun olaraq həyata keçirilməli və nizamlanmalıdır.”
Bu fikirləri "İki sahil”ə açıqlamasında Milli Məclisin deputatı Müşfiq Məmmədli deyib.
M.Məmmədli qeyd edib ki, Azərbaycan hər zaman ikitərəfli əlaqələrdə qəbul edilən qərarlara, verilən sözlərə ciddi yanaşır və beynəlxalq hüquq normalarına əməl edən etibarlı tərəf kimi tanınır: "Azərbaycan dövləti hər zaman digər dövlətlərin qanunlarına hörmətlə yanaşır və buna görə də təbii ki, Azərbaycan bu dövlətlərin öz dövlətinin qanunlarına da hörmətlə yanaşılmağı tələb etməyə haqqı vardır. Cənab Prezident öz çıxışında qeyd edir ki, digər dövlətlər də mütləq şəkildə bu hüquq normalarına və imzalanmış bəyanatlara, razılaşmalara ciddi yanaşmalı, hər bir bəndinə ciddi şəkildə əməl etməlidirlər. Azərbaycannın nədəsə güzəşətə gedəcəyini düşünmək tamamilə yanlışdır. Ortada bir razılaşma vardır və bu razılaşmaya hər bir dövlət riayət etməlidir.”
Deputat vurğulayıb ki, müharibədən sonra revanş qazanmaq arzusunda olan Ermənistanın bəzi siyasi qüvvələrinin səsləndirdiyi fikirlərə də cənab Prezidentimiz öz kəskin münasibətini bildirərək qeyd etdi ki, Ermənistan bu fikirlərindən əl çəkməzsə, Azərbaycannın qüdrətli ordusunun, silahlı qüvvələrinin adekvat cavabını bir daha alacaqlar: "Bu məsələdə ölkə rəhbərinin mövqeyi aydındır. Azərbaycan öz torpaqlarında otuz illik işğala son vermişdir, Dağlıq Qarabağı və yeddi rayonu işağaldan azad edərək dövlət ərazsinin bütövlüyünü bərpa edib. Artıq Dağlıq Qarabağın statusu məsələsindən söhbət gedə bilməz. Azərbaycanın ərazi bütövlüyünə hər kəs hörmətlə yanaşmalıdır. Azərbaycanın işğaldan azad edilmiş torpaqlarında yaşayan vətəndaşları da Azərbaycan dövlətinin qanunlarının verdiyi imkanlardan istifadə etmə hüququna sahibdirlər. Bunun üçüncü bir yolu yoxdur, başqa yanaşma tərzi qəbuledilməzdir. Azərbaycanın mövqeyi qətidir və Azərbaycan dövlətinin başçısı 2020-ci ilin yekunlarına dair keçirilən müşavirədə bunu bir daha qətiyyətlə bəyan etdi.”
Xəbərdən istifadə edərkən istinad etmək vacibdir.
