Dünyaya özünü demokratiya carçısı kimi sırımağa çalışan Freedom House təşkilatının qərəzli mövqeyindən çox yazmışıq. Faktlar bu yanaşmanın heç də əsassız olmadığını ortaya qoyur. Bu təşkilat açıqladığı hesabatlarda, rəhbərlərinin verdikləri açıqlamalarla özü özünü ifşa edir. Azad həyat və azad düşüncədən danışan təşkilat insanların vicdan azadlığı məsələsində də qərəzli mövqeyini gizlətməkdən çəkinmir. Maraqlıdır ki, hər zaman həqiqəti əks etdirməyən, məkrli hesabatları ilə gündəmə gələn Freedom House daha çox islam ölkələrini tənqid hədəfinə çevirir. Təşkilatın rəhbərliyində təmsil olunanlar da bu mövqelərini nəinki ört-basdır edir, hətta açıq-aşkar nümayiş etdirirlər. Belə ki, artıq bir neçə ildir ki, təşkilatın demokratiya, insan haqları "çubuğu” ilə islam ölkələrini döydüyü göz qabağındadır. Bu antitəbliğat və islamofobiya Devid Kramerin rəhbərliyi dövründə daha da genişləndi və hələ də davam etdirilir. Belə görünür ki, "Freedom House”un əsas məqsədi demokratik dəyişiklikləri təşviq etmək, dünyada azadlığın vəziyyətini müşahidə etmək, insan haqlarını qorumaq olsa da, bu təşkilat son illər müsəlman ölkələrini əsas tənqid hədəfinə çevirib. Espertlər düşünürlər ki, vaxtilə ABŞ Dövlət Departamentində yüksək vəzifə sahibi olmuş Devid Kramerin ”Freedom House"a rəhbər təyin olunması bu təşkilatın fəaliyyətinə xüsusi antiislam çaları gətirib.
Kramerin karyerasına diqqət etdikdə onun islamofob, müsəlmanlara, islama və Azərbaycana mənfi münasibəti olan şəxs kimi tanıdığını görərəik. Bu cənabın Azərbaycana mənfi münasibəti hələ 2008-ci ildə, ABŞ dövlət katibinin demokratiya, insan haqları və əmək məsələləri üzrə köməkçisi vəzifəsində ölkəmizə səfəri zamanı açıq müşahidə edilib. ”Freedom House"a icraçı direktor təyin ediləndən sonra isə bu münasibət daha da kəskinləşib. Təsadüfi deyil ki, Kramer tez-tez Azərbaycanla bağlı qeyri-obyektiv açıqlamalar verir, "Freedom House”un hesabatları isə Azərbaycan haqda qərəzli subyektiv mülahizələr toplusuna çevrilib. Bu təşkilat bütün hesabatlarında Azərbaycanı "qeyri-azad” ölkələr sırasında göstərir. Parlamentin, dinc etirazçıların gülləbaran edildiyi işğalçı Ermənistan isə az qala "demokratiya etalonu” kimi təqdim edilir. 2009-cu il üçün hesabatda Dağlıq Qarabağın Azərbaycandan ayrı ərazi vahidi kimi göstərilməsi və separatçı rejimin quldur metodları ilə idarə etdiyi Qarabağda "demokratiyanın inkişaf etməsi” iddiası da bu təşkilatın adına yazılan ixtiradır".
Bütün bunları nəzərə alan qəzetimiz hələ bir neçə il əvvəl "Freedom House”u və Krameri islam dünyasının revizoru adlandırmışdı və təşkilatın daha çox müsəlman və ərəb dünyasını hədəfə aldığını göstərmişdi. Həqiqətən də təşkilatın hesabatlarında Türkiyə, ərəb ölkələri, Pakistan, Azərbaycan və digər müsəlman dövlətləri qara rəngdə təsvir olunur, ən kiçik, əhəmiyyətsiz məsələlər şişirdilərək ümumbəşəri problem səviyyəsinə qaldırılır. Nə qədər təəccüblü görünsə də ”Freedom House"nin hesabatlarında Türkiyə kimi İslam aləmində demokratiya etalonu olan bir ölkə Ermənistanla birgə "qismən azad ölkələr” kateqoriyasına daxil edilir. Fransada qondarma "erməni soyqırımına” görə cinayət məsuliyyətini nəzərdə tutan qanunun qəbul edilməsinə cəhd, 2011-ci ildə məlum hadisələr zamanı Böyük Britaniyada bloggerlərin həbsi, internetin məhdudlaşdırılması, "News of the World” qəzeti əməkdaşlarının kütləvi həbsi, ABŞ hərbçiləri tərəfindən İraqda "Röyters” agentliyinin əməkdaşlarının qətlə yetirilməsi, Liviyada üsyançılar tərəfindən populyar jurnalist Qalya əl-Misratiyə işgəncələr verilməsi, öldürülməsi və digər bu kimi onlarla fakt qulaqardına vurulur.
Ərəb ölkələrində baş verən iğtişaşlarda minlərlə insanın öldürülsə də, Qərb bunu görmək istəmir. Kramer kimiləri bu reallığı ya görmür, ya da görmək istəmir və təbii olaraq rəhbərlik etdikləri qurumların mövqeyinə təsir göstərirlər. Buna görə də biz daim ”Freedom House"un açıqlamalarında ərəb dünyasının faciəsini görmürük, müsəlman ölkələrini, Azərbaycanı yalnız tünd rənglərdə müşahidə edirik.
Ona görə də heç kim təşkilatın qərəzli hesabatlarını ciddi qəbul etmir. Çünki hamı məsələnin mahiyyətindən xəbərdardır. Əslində, sözügedən təşkilatın insan haqları və demokratiya mövzusundan təzyiq elementi kimi istifadə etdiyi çoxdan məlumdur və təmsil etdiyi, maliyyələşdiyi dairələrlə eyni mövqe sərgiləməsi bəlkə də, başadüşüləndir. Amma diqqətçəkən odur ki, təşkilat rəhbərliyini danışdıqları yalanın tutub-tutmayacağı maraqlandırmır. Belə ki, indiyə qədər Azərbaycana ayaq basmayan şəxslər ölkədə vəziyyətin ürəkaçan olmadığını hardan bildikləri barədə verilən suallardan çəkinmirlərsə, deməli, kütlənin fikri və təşkilata ironiyası onlara maraqlı deyil və tənqidləri qulaq ardına vurular. Belə davranış isə biznesmenin ərköyün övladının ürəyi istəyən hərəkətləri etməsindən fərqlənmir. Separatçılara rəğbət, müsəlmanlara nifrət bəsləyən təşkilatın nüfuzunun getdikcə daha çox aşağı düşməsinə baxmayaraq, yenə də qərəzli hesabatlar hazırlayıb təqdim etməsi bir daha onların ictimaiyyət üçün deyil, müəyyən dairələr üçün işlədiklərini ortaya qoyur. (kaspi.az)
Xəbərdən istifadə edərkən istinad etmək vacibdir.