İSLAMOV SAMİR XALIQ oğlu      
(Kapitan)   
Qısa arayış: "Aslan Pəncəli” ləqəbi ilə adı dillərə düşən qəhrəmanımız SAMİR XALIQ oğlu İSLAMOV 5 fevral 1983-cü ildə Sumqayıt şəhərində dünyaya gəlib. 1989-cu ildə Yusif Məmmədəliyev adına 31 saylı tam orta məktəbdə təhsil almağa başlayıb. 
Məktəb illərindən vətənpərvər ruhda böyüyən və hərbiçi olmaq arzusu ilə yaşayan Samir İslamov 1997-ci ildə  səkkizillik təhsilini başa vurduqdan sonra, sənədlərini Cəmşid Naxçıvanski adına Hərbi Liseyə verib. İmtahanları müvəffəqiyyətlə verərək liseyə daxil olub.
Samir İslamov 2000-ci ildə arzusunda olduğu Azərbaycan Ali Hərbi Məktəbə qəbul olub. 2004-cü ildə o, Müdafiə Nazirliyinin xətti ilə, Silahlı Qüvvələrin "Təlim və Tədris Mərkəzi”ndə kurslara qatılıb, 2005-ci ildə "Leytenant” rütbəsi ilə təhsilini uğurla bitirib.  
S.İslamov Naxçıvan Muxtar Respublikasının Kəngərli rayonunun Qıvraq qəsəbəsində yerləşən "N” saylı hərbi hissədə "Minaatan batareya”nın komandiri vəzifəsində hərbi fəaliyyətə başlayıb. 2012-ci ildə təyinatla Ağcabədi rayonunda yerləşən "N” saylı hərbi hissəyə göndərilib və burada da "Minaatan batareya”nın komandiri vəzifəsində çalışaraq fəaliyyətini davam etdirib.
Samir İslamov 2016-cı ildə Aprel döyüşlərində iştirak edib. 
Azərbaycan Ordusunun gənc zabiti 2018-ci ildə Tərtər rayonunda yerləşən "N” saylı hərbi hissənin "Əməliyyat” bölmə rəisinin "Qoşun xidməti” üzrə rəis köməkçisi vəzifəsinə təyin olunub. 2020-ci ilin 4 iyun tarixində S.İslamov 20 illik əmək stajı ilə təqaüdə çıxıb. 
S.İslamov 20 illik fasiləsiz hərbi xidməti dövründə aşağıdakı təltiflərə layiq görülüb:
*"Azərbaycan Ordusunun 90 illiyi” Yubiley medalı – (1918-2008); 
*"Azərbaycan Silahlı Qüvvələrinin 95 illiyi” Yubiley medalı – (1918-2013);
*"Azərbaycan Ordusunun 100 illiyi” Yubiley medalı – (1918-2018);
* 3-cü dərəcəli "Qüsursuz xidmətə görə” medalı (10 il);  
* 2-ci dərəcəli "Qüsursuz xidmətə görə” medalı  (15 il);
* 1-ci dərəcəli "Qüsursuz xidmətə görə” medalı (20 il) ilə. 
--------------------------
AİLƏ: İslamovlar ailəsi 5 nəfərdən: ata, ana, 2 qız və 1 oğlan övladından ibarət olsa da, sonradan bu ailə daha da genişlənir. Evin iki qızı ailə həyatı qurur. Birinin 2, digərinin 3 övladı olur.  Qəhrəmanımız isə 4 uşaq atası idi...
Valideynləri deyirlər ki, Samir uşaq vaxti nə qədər ciddi olubsa da, bir o qədər dəcəl olub. Lakin bu dəcəlliyində də bir şirinlik olub. Heç kəs inciməz, onu danlamazdı.
Uşaqlıqdan Samirdə bir zabit duruşu, zabit danışığı hiss olunub, elə  bil  balaca hərbiçi idi. Hətta atası ilə də elə danışardı ki, sanki qərarı o verirdi; qəti, kəskin, zabitəli səs tonuyla. Atası da sakit tərzdə başa salardı ki, "oğlum, bir qədər yumşaq danış, unutma ki atanla danışırsan”. 
Bəlkə, elə o vaxtlar uşaq xəyallarında özünü hərbiçi kimi canlandıran bu balaca oğlan, özünü zabit kimi aparmaqla xəyallarını gercəkləşdirməyə çalışırdı. Kim bilir... O qədər müharibəyə həsr olunmuş döyüş filmlərinə baxardı ki. Tarixi filmləri maraqla izləyər, həmçinin tarixi və detektiv əsərləri mütaliə edərdi. Sevdiyi qəhrəmanlara oxşamağa çalışan Samir, real həyatda özünü sevdiyi qəhrəman kimi hiss edərdi. Samirin iç dünyası təkcə özünə bəyan idi. Atasının sözlərindən sonra, o, sanki xəyal dünyasından gerçək həyata dönər, səhvini anlayıb, atasına yaxınlaşaraq üzr istəyərdi: "Ata, bağışla, özümdən asılı olan şey deyil”. 
Təbii ki, belə də olmalıydı. Uşaqların fantaziyaları, xəyalları, arzuları – özlərinə məxsus sehirli dünyaları daha zəngin olur. O dünyadan kimsə reallığa, mövcudluğa qayıtmaq istəmir. Böyüklər isə kiçik yaşlı uşaqların yaşlarından böyük hərəkət və davranışlarını, danışıqlarını qəbul etmək istəmirlər..
Samir, yaşının az olmasına baxmayaraq, şax duruşu, təmkini, güclü xarakteri, danışıq tərzi, diksiyası, səs tonu ilə yaşıdlarından seçilərdi. Hətta yoldaşları ilə də eyni tonda danışardı. 
Vətənpərvərlik Samirin canında, qanında olub. Onun bir arzusu vardı: hərbiçi olmaq! Elə bu arzuya doğru da addımlayırdı. Hərbi liseyə daxil olanda sevincindən bilmirdi ki nə etsin. Artıq o, arzuya gedən yolun ilk pilləsinə qədəm qoymuşdu. Bundan böyük xoşbəxtlik olardımı, arzusunu öz gücünə reallaşdıran bir yeniyetmə üçün? Əlbəttə ki, yox!
Hərçənd ki, evin tək oğul övladı olduğundan valideynləri onun hərbiyə getməsini istəmirlər. Lakin həyatda prinsipial olan, məqsədə doğru inamla addımlayan Samiri heç nə yolunu kəsə bilmir... O, qərarından dönməyərək irəli doğru can atır...
Sonradan Ali Hərbi Məktəbdə oxuduğu illərdə unudulmaz tələbəlik həyatını yaşadı qəhrəmanımız. Möhkəm iradəsi, güçlü xarakteri, təlim-tərbiyəsi, əxlaqı... ilə onu tanıyan hər kəsin hörmət və rəğbətini qazandı. Qayğıkeşliyi, mehribanlığı, xeyirxahlığı ilə ürəklərdə yuva qurdu. Haqsızlıqla barışmaz mövqeyi, həqiqətpərəstliyi, düzgünlük tərəfdarı olması ilə hər kəsin gözündə ucaldı Samir İslamov! 
Nəhayət, Samir uşaq xəyallarında canlandırdığı zabit rolunu gerçək həyatda reallaşdırdı öz savadı, qabiliyyəti, əzmkarlığı, mətinliyi ilə. Artıq o, kapitan Samir İslamov idi! 20 illik xidməti dövründə qayda-qanuna, nizam-intizama riayət etməsi, zəkası, geniş təxəyyülü, zəngin dünyağörüşü, öz üzərində daima çalışması ilə fərqləndi peşəkar hərbiçi!  İnsani keyfiyyətlərinə görə, bütün zabit heyəti və əsgərlər onu sevdilər. Bu hörməti və sevgini o, özü qazandı – insaniyyətliyi, istiqanlığı, cəfakeşliyi, xeyirxahlığı ilə! 
Kapitan heç vaxt əsgərlərini kiminsə ayağına verməzdi. Yol verməzdi ki, kimsə də onun əsgərlərinə bir söz desin, onları danlasın. Hansısa promlen çıxardısa, düzgün hərəkət olmazdısa, o, özündən yuxarılara heç vaxt şikayət göndərməzdi. Nə tədbir lazımdırsa, özü görərdi. Yeri gələndə danlayar, yeri gələndə ata, qardaş kimi başa salardı. Elə şərait yaratmışdı ki, tabeliyində olan əsgərlərinə yalnız özü söz demək səlahiyyətinə malik idi. Kiminsə onun "mətbəx”inə müdaxilə etməsinə imkan verməzdi. Bir ailə kimi, hər zaman əsgərlərini müdafiə edər, qoruyardı.
Samir bəzən çox ciddi, bəzən də sərt görünsə də, çox yumşaq qəlbi vardı. O, hələ çavuş olan vaxtlar çox imkansız bir uşaq görür, ona kömək etməyə çalışır. Və əlindən gələni də edir. 
Samir İslamov sevib-seçdiyi Kifayət xanımla ailə həyatı qurduqdan sonra, dünyaya gələn övladları İdris, Ülviyyə, İslam və Ömər onun həyatında önəmli rol oynayır. 
Samir İslamov mehriban, qayğıkeş, diqqətcil ailə başçısı, cəfakeş ata olaraq, ailə qayğıları ilə yaşayır, hər an övladlarının gələcəyini düşünür. Hərçənd ki, bir hərbiçinin həyatının neçə keçdiyini hər birimiz çox yaxşı bilirik. Bəzən aylarla əzizlərinin üzünü görmür. Lakin önəmli olan ailədə qoyulan ilkin düzgün təməl, qayda-qanun və bu qanunlara riayət olunmasıdır. Samir İslamov da öz ailəsində möhkəm "adət-ənənəsini” yaratmışdı. Bu səbəbdən evdə olmasa da, onun yeri hər zaman görünürdü... 
20 illik fəaliyyətdən sonra, təqaüdə çıxan kapitan 2020-ci il sentyabrın 27-də, işğal altında olan ərazilərin azad edilməsi üçün, başlanan Vətən müharibəsinə cəlb olunaraq, Tərtər rayonuna geri çağırılır. Hər gün Vətən torpağını düşünən, gündəlik informasiyaları müntəzəm izləyən Samir İslamov böyük sevinc, həvəs və qürurla döyüş bölgəsinə yollanır. Kapitan fürsət tapan kimi, ailəsi, əzizləri ilə telefon əlaqəsi yaradırdı. 
Oktyabrın 9-u Samir evlərinə zəng edir, doğmaları ilə danışır. O, hər kəsi bir-bir soruşur, xeyli söhbət edir və hər kəsdən də halallıq istəyir. Samirin halallaşması ailə üzvlərində narahatlıq yaradır... 
Oktyabrın 10-u, 11-i... Bütün ailə üzvləri nigarandılar. Ata dözməyib oğlunun nömrəsini yığır. Cavab gəlmir. Samirin əmisi oğlu da bir neçə dəfə Samirin telefonuna zəng edir. Nəhayət, tanımadıqları bir nəfər cavab verir. Samiri soruşduqda xəttin o biri başından eşidilir: "Şəhid olub...”...
 Oktyabrın 9-u 2020-ci ildə Azərbaycan Ordusunun qeyrətli, igid oğlu kapitan Samir İslamov Tərtər rayonunun Talış kəndi və Suqovuşan, Ağdərə istiqamətində gedən döyüşlərdə düşmənə qarşı mərdliklə vuruşaraq, onların neçə-neçə canlı qüvvəsini məhv edir. Əsgərlərini hər an qorumağa can atan zabit, hətta şəhid olmuş yoldaşlarını, yaralıları da imkan tapan kimi, döyüş meydanından kənarlaşdırmağa çalışır. Qızğın döyüşlərdə qəlbi Vətən sevgisi ilə çırpınan kapitan qəhrəmancasına həlak olaraq ən uca məqama - Şəhidlik Zirvəsinə ucalır.
Şəhidimizin nəşi 13 oktyabr 2020-ci il tarixində Sumqayıt şəhərinə gətirilir, oktyabrın 14-də Sumqayıt Şəhidlər Xiyabanında torpağa tapşırılır. 
Azərbaycan Ordusunun məğrur, yenilməz zabiti, kapitan Samir İslamov hərbidə təqaüdə çıxmışdı. O, bu müharibəyə getməyə, imtina da edə bilərdi. Çünki Vətən yolunda 20 illik xidməti vardı və onu da şərəflə, vicdanla yerinə yetirmişdi. Lakin o, bu, şərəfli yoldan geri durmadı! O, valideynlərindən, ailəsindən, dörd övladından daha üstün VƏTƏNi tutdu! Peşəkar hərbiçi, qeyrətli Vətəm oğlu "təqaüdə çıxım, sonra fərarilikmi edim?! Əsla! Mən hərbiçiyəm, mənim yerim oradır!” deyərək, hər kəslə görüşüb evdən çıxmışdı.
Ata: "O, heç vaxt zəng edəndə deməyib ki, "ata, haqqını halal elə”. Onun bu sözü mənə çox pis təsir etdi. Bircə təsılli yerim onun Şəhidlik Zirvəsidir, bir də onun əmanət qoyub getdiyi  dörd balasıdır”.
...Samir İslamovun övladları ilə bağlı tükənməz arzuları, planları vardı. 10 yaşlı İdrisi peşəkar stomatoloq, 6 yaşlı İslamı məhşur idmançı, 4 yaşlı Öməri isə hərbiçi görmək istəyirdi...
Bu günün reallığı isə odur ki, uşaqlar atanın şəklinə baxaraq, onun intizarındadırlar. Bu gün o itkinin acısını öz uşaq ağılları ilə nə dərəcədə dərk edib çəksələr də, illər sonra ataları ilə fəxr edib, qürur duyacaqlar. Bir gün kapitanın canı, qanı bahasına azad olunmuş torpaqlara ayaq basanda, "bu yerlərdən atamız keçib”,"bu torpaqlarda atamızın izi var” deyib, alnıaçıq, üzüağ gəzəcəklər. Məhz o günlər üçün – Azərbaycanın parlaq gələcəyi, fidan balaların xoşbəxt yaşaması üçün ölümü belə gözə aldılar Samir İslamov kimi qeyrətli Vətən oğulları!!! 
Kifayət xanım (həyat yoldaşı): "Ailəmiz əsl hərbiçi ailəsi olub. Samir öz işini o qədər sevib, o qədər bağlı olub ki, onun üçün birinci növbədə iş, ondan sonra ailə olub. O, ömrünün yarısını hərbidə keçirdi. 20 il az müddət deyil. Və təbii ki, artıq bu müddətdə onun özünəməxsus xarakteri formalaşmışdı. Sərt xasiyyətli, ciddi xarakterli idi.
 Ona dedim ki, "dörd uşağın var, olmaz ki, gedib-gələsən?”. Cavab verdi ki, "necə yəni?! Mən mütləq getməyim! Ömrümün yarısını sərf etmişəm bu işə, şərəflə xidmət etmişəm Vətənimə. İndi müharibə olanda deym ki, mənim dörd uşağım var? Qorxaq kimi gizlənim? Əsla! Mənim yerim oradır!”. Sözün düzü, deməyimə də peşman oldum. Bilirdim ki, o, işinin fədaisidir.
Uşaqlarla çox mehriban olub. Çox istəyib ki, oğlanları güclü olsunlar. Qızı ilə isə yumşaq davranardı. O, uşaqları özü kimi vətənpərvər, ciddi, möhkəm xarakterli, nizan-intizama, qaydalara riayət edən... yetişdirməyə çalışırdı. Uşaqlar atalarını hər zaman formada, şax duruşlu, əzəmətli görüblər. 
Samir hər zaman "hər şey Vətən üçün!” dedi. O qədər xeyirxah insan idi ki... Əsgərlərinə ata, qardaş qayğısı göstərib. Onun xətrini istəməyən olmayıb. Bu hörmət və sevgini də o, öz gözəl xasiyyəti ilə qazanıb”.
İslamovlar ailəsində Qəhrəman ATAnın şərəfli yolunu davam etdirən, mövqeyini tutan, amalını, əməlini yaşadan dörd vətənpərvər övlad böyüyür. Azərbaycanın Günəşli Sabahının dörd təminatçısı!
Samir İslamovun 1993-cü ildə I Qarabağ savaşında əmisi öğlu şəhid olmuşdu. Deyirdi, "əmioğlunun qanını yerdə qoymayacam!”. Azərbaycan torpağının igid, mərd, qorxmaz oğlu kapitan Samir İslamov öz şücaəti ilə, təkcə əmisi oğlunun deyil, bütün şəhidlərimizin, günahsız körpə balaların, ana-bacıların... qisasını aldı mənfur düşməndən! Vətən müharibəsində qəhrəmanlığı ilə Allah dərgahına pənah apararaq, adını tarixin yaddaşına böyük hərflərlə yazdı: ŞƏHİD SAMİR İSLAMOV! 
Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirən, 20 ilin hərbçisi, 37 yaşlı kapitan Samir Xalıq oğlu İslamov ölümündən sonra, Azərbaycan Respublikasının prezidenti İlham Əliyevin müvafiq Sərəncamlarına əsasən, "Vətən uğrunda”, "Hərbi xidmətlərə görə” və "Suqovuşanın azad olunmasına görə” medalları ilə təltif olunub. 
Olkə Rəhbərinin 05.11.2021-ci il tarixli Sərəncamına görə, Vətənin igid oğlu Samir İslamov 3-cü dərəcəli "Rəşadət” ordeni ilə təltif edilib.
Ruhun şad olsun, Cənnətməkan Şəhidimiz!!! 
Aygün Hacıyeva,
AJB, AYB və AAB-nin üzvü

Xəbərdən istifadə edərkən istinad etmək vacibdir.