...

-----------------

ŞAMİLOV FƏRİD Mirzə oğlu

(Əsgər)

Qısa arayış: ŞAMİLOV FƏRİD MİRZƏ oğlu04 may 1999-cu ildə Sumqayıt şəhərində dünyaya gəlib. Sumqayıt şəhər 16 saylı tam orta məktəbin məzunudur.

2017-ci ilin yayında Sumqayıt Şəhər Hərbi Komissarlığı tərəfindən həqiqi hərbi xidmətə çağrılan Fərid Şamilov, Vətən qarşısındakı borcunu yerinə yetirmək üçün, xidmətinə döyüş bölgələrindən birində - Füzuli rayonunun Haramı düzündə yerləşən "N” saylı hərbi hissədə başlayır.

2019-cu il yanvarın 9-da hərbi xidmətini uğurla başa vuraraq, ordudan ehtiyatda olan əsgər kimi, tərxis edilir.

Fərid Şamilov əsgərliyini başa vurduğu müddətdən II Qarabağ müharibəsinə qatılanacan Sumqayıt şəhərində "Səba” MMC-də "Mühafizəçi” vəzifəsində çalışır.

------

Hələ uşaq vaxtlarından yoldaşlarından saf qəlbi, gülər üzü, xoş təbəssümü, ağıllı baxışı, qoçaqlığı ilə seçilərdi Fəridimiz. Gözlərinin içi daim parıldayardı. Çox zaman deyirdilər ki, "gözü hər zaman gülür bu balacanın”.Yaşının azlığına baxmayaraq, düşüncələri və davranışları ilə böyüklərin hörmət və rəğbətini qazanardı. Mehribanlığı, gözəl xasiyyəti, şirin dili və maraqlı söhbətləri ilə hər yerdə hər kəsin əhval-ruhiyyəsini qaldırar, mühitdəki ab-havanı dəyişərdi.

Dərslərinə xüsusi marağı olmasa da, təlim-tərbiyəsi, nizam-intizamı, özünəməxsus xarakteri və xüsusi davranışı ilə sinif yoldaşlarının və müəllim kollektivinin sevgisini qazanmışdı. Məktəbin ictimai həyatında fəal iştirak edər, təşkilati işlərdə fəallığı ilə seçilərdi.

Fərid çox mehriban, qayğıkeş, kimliyindən asılı olmayaraq, böyükdən-kiçiyə hər kəsə yardım etməyə hazır olan biri idi. Öz ürəyi kimi, bütün insanları mehriban, gülərüz, qayğıkeş görmək istəyərdi.

Hələ uşaqlıqdan səmimiliyi, dürüstlüyü, doğruçuluğu ilə seçilən Fəriddə Vətən torpağına olan sevgi sözlə ifadə olunmayacaq səviyyədə idi. Əhatəsində olan insanlar belə, onun vətənpərvərliyinə heyran qalardılar.

Fərid atasına Azərbaycanın tarixi ilə bağlı sullar verməkdən yorulmazdı. Axı, atası Mirzə müəllim I Qarabağ müharibəsində iştirak etmiş, cəng meydanında düşmənlə üzbəüz savaşmışdı. Mirzə müəllim səbr və təmkinlə, aram-aram xalqımızın illərlə başına gətirilən müsibətlərdən danışar, düşmənin siyasi oyunlarını anladardı. Atasının söhbətlərindən yeniyetmənin qəlbində düşmənə qarşı yaranan nifrət hissi zamanla güclənərdi. O,"kaş, mən də düşmənlə döyüşüb, torpaqlarımızı geri alardım!” deyə düşünərdi.

Fərid məsləyi, amalı uğrunda əzmlə, mərdliklə mübarizə aparan idi. Elə qarşısına qoyduğu məqsədə çatmaq üçün son nəfəsinədək mübarizə apardı.

Fərid, uşaqlıqdan xoş rəftarı ilə qayğısını, nazını çəkən, onu böyük bir sevgi ilə böyüdən nənəsi Tamara xanıma hər dəfə deyərdi ki, "nənə, bir gün gedib o torpaqları alacam, səni də özümlə Şuşaya aparacam. İnanmırsan? Görərsən!”.Nənə də fəxrlə gözlərinin içi daima gülən şirin nəvəsinə baxar, "İnşallah, mənim ağıllı balam”deyərdi.

Bəli, vətənpərvər oğul bu arzusunun nə vaxtsa reallaşacağına, özünün də bu yolda bir iz qoyacağına inanırdı. İnandığı nə vardısa, Fərid amalına doğru addımlamaqdan heç zaman çəkinməzdi. Özünəinam, özünəgüvən hissi olan insanlar isə, qarşılarına çıxacaq maneələri əzmlə, cəsarətlə dəf edərək, hər zaman istəklərinə çatırlar, bizim qoçaq, cəsur Fərid kimi!

Fərid evin böyük övladı olaraq, hər zaman özündən kiçik qardaş-bacısına böyük məhəbbətlə yanaşar, qayğılarına qalardı. O, öz davranışı ilə kiçiklərə nümunə olardı...

2020-ci ilin iyul ayında baş verən Tovuz hadisələri zamanı general-mayor Polad Həşimovun və onun silahdaşlarının itkisindən sarsılan, heç yerdə qərar tutmayan Fərid Şamilov Sumqayıt Şəhər Hərbi Komissarlığına gedərək, burada könüllü olaraq yazılanların cərgəsinə qoşulur. Sentyabrın 21-i 2020-ci ildə Hərbi Komissarlıqdan "Çağırış” vərəqəsi alan gənc, Qusar rayonunda yerləşən "N” saylı hərbi hissədə hərbi təlimlərə yollanır.

2020-ci ilin sentyabr ayının 27-də Ali Baş Komandanın əks-hücumla bağlı əmri veriləndə II Qarabağ müharibəsinə qoşulmaq istəyən könüllülərin ard-arası kəsilmirdi. Hər kəsin üzündə bir sevinc, fərəh var idi. Azərbaycan xalqı bu günü, bu anı səbirsizliklə gözləmişdi. Elə gənc əsgərimizin də sevincinin həddi-hüdudu olmur. Nəhayət, illərlə torpağımızı işğal edib, insanlarımıza torpaq həsrəti yaşadan, Xocalı soyqırımının baiskarları olan mənfur qonşuların cavabı veriləcək, torpaq həsrətinə son qoyulacaq, Polad Həşimovun timsalında, bütün Şəhidlərimizin qisası alınacaqdı!

Azərbaycan Ordusunun cəsur, qorxmaz əsgəri Fərid Şamilov böyük ruh yüksəkliyi ilə Füzuli istiqamətində gedən döyüşlərə qatılır. Füzuli rayonu alındıqdan sonra, Cəbrayıl, Zəngilan rayonlarının düşməndən azad olunması uğrunda gedən döyüşlərdə mərdlik, şücaət göstərir cəsur döyüşçü.

F.Şamilov gənc olmasına baxmayaraq, üzbəüz döyüşdə düşmən üzərinə elə şığıyırdı ki, kənardan ona baxan olsaydı bircə kəlmə deyərdi: "Şir ürəyi yeyib bu igid!”.

O, silahdaşları ilə birlikdə bir çox uğurlara imza ataraq, yalnız irəliyə doğru gedirdi. Daha sonra o, Xocavənd, Şuşa, Laçın uğrunda gedən döyüşlərdə iştirak edir. Vətən oğlu elə”Vətənim” deyərək, Azərbaycanın azadlığı, parlaq gələcəyi naminə düşmənə göz açmağa belə imkan vermirdi.

Fərid son dəfə son döyüşündən bir gün öncə - noyabrın 7-si atasına zəng edir. Onunla danışanda; "ata, sən ala bilmədin, amma mən aldım o torpaqları. Şuşa bizimdir, sən narahat olma”, - deyir. I Qarabağ savaşının iştirakçısı olan Mirzə Şamilov oğluyla qürur duyur. Gözləri dolan ata, bircə kəlmə deyə bilir: "Sağ ol, oğlum!”.

2020-ci il noyabrın 8-dən 9-na keçən gecə Xocavənd rayonunun Qırmızı Bazar kəndində, Şuşanın bir addımlığında düşmənlə üzbəüz qızğın döyüşlər gedir. Qələbəyə köklənmiş igidimizin gözləri önündən bu illər ərzində qətlə yetirilmiş günahsız insanların simaları çəkilmirdi. Döyüş zamanı o, həm vuruşur, həm də, imkan tapan kimi, yaralı döyüş yoldaşlarına kömək edirdi.Qızğın döyüş zamanı mətin döyüşçü düşmən gülləsinə tuş gəlir və ağır yaralanır... İgidimizin son nəfəsində dediyi söz "atama deyin ki, məni bağışlasın... mən onu çox istəyirəm...”.

M.Familin son döyüşdə yazdığı mesaj: "Biz hücum edən bölük idik, Fəridgil müdafiə edən. Ancaq hər şey əksinə oldu. Hər ikisi də yaralanmışdı. Mən Fəridi də, Qubadı da xilas etmək istəyirdim. Canım bahasına olacağını bilirdim. Ancaq bu vaxt erməni snayperi məni vurdu. Yaralı da olsam, durmağa cəhd etsəm də, güllə yağışından tərpənə bilmədim. Onların "kömək eləyin” səsləri get-gedə zəifləyirdi. Qanları durmadan axırdı... Yaranı bağlamaq lazım idi, silahdaşlarımızın əksəriyyəti yaralı idi... Həmin gün sanki "can bazarı” idi. Hamı üzgün, çarəsiz idi...”.

Bu döyüşlərdə Fəridlə bərabər, Sumqayıtdan olan daha bir Vətən oğlu – Qubad Əliyev də düşmənə qarşı mərdliklə vuruşurdu. Dostluq edən hər iki qəhrəman birgə Şəhidlik Zirvəsinə ucalırlar.

Görmək arzusunda olduğu Şuşa şəhərinin bir addımlığında gedən döyüşlərdə Fərid Şamilov qəhrəmancasına həlak olaraq hər kəsin arzuladığı ən uca məqama – Şəhidlik Zirvəsinə yüksəlir. Az ömür yaşadı, lakin şərəfli ömür yaşadı, ölümüylə ölümsüzlüyə imza atdı məğrur Azərbaycan əsgəri! İmzası ilə Azərbaycan Tarixinin şanlı səhifələrinə, milyonların qəlbinə adını əbədilik həkk etdi mübariz Şəhidimiz!!!

Azərbaycan Ordusunun məğrur, comərd əsgəri Fərid Şamilov 10 noyabr 2020-ci ildə Sumqayıt Şəhidlər Xiyabanında dəfn olunur.

Azərbaycan Silahlı Qüvvələrinin 21 yaşlı igid əsgəri – iri pulemyot atıcısı Fərid Mirzə oğlu Şamilov ölümündən sonra, Azərbaycan Respublikasının prezidenti İlham Əliyevin müvafiq Sərəncamlarına əsasən, "Vətən uğrunda”, "Xocavəndin azad olunmasına görə” və "Füzulinin azad olunmasına görə” medalları ilə təltif edilib.

Ruhun şad olsun, Cənnətməkan Şəhidimiz!!!

Aygün Hacıyeva,

AJB, AYB, AAB-nin üzvü