Sumqayıtın "7 nömrəsi” başsız qalıb (FOTO)
İnsanların gündəlik həyatında ictimai nəqliyyatın xüsusi yeri var. Sumqayıtda ictimai nəqliyyat sahəsindəki çatışmazlıqlarla bağlı mediada və sosial şəbəkələrdə dəfələrlə yazılsa da, müzakirə açılsa da, nədənsə müsbətə doğru ciddi dəyişiklik müşahidə edilmir.
Sumqayıt sakinləri son zamanlar şəhərin bir vaxtlar əsas ictimai nəqliyyat yükünü üzərində daşıyan 7 nömrəli marşrut xəttinin fəaliyyətindən narazıdırlar.
Onların sözlərinə görə, avtobuslar çox gec gəlir, gedəcəkləri ünvana gecikirlər. Sözügedən maşrut xəttinin iş qrafikində pərakəndəlik, özbaşınalıq hökm sürür.
Şəhər sakini Tural Məmmədov Xeberle.com-a bildirib ki, marşrut qrafiklə hərəkət etmir: "Elə günlər olur ki, insanlar küçələrdə qalır. Soruşanda da deyirlər ki, avtobus xarab olub, xəttə buraxılmayıb. Şikayət üçün avtobusda qeyd olunan nömrəyə zəng vurursan, telefona ya cavab vermirlər, ya da söndürürlər. Bu hal aylardır ki davam edir”.
Sakinlər həm də "7 nömrə" sürücülərinin pul qazanmaq adı ilə salonu həddən artıq sərnişinlə doldurmasından gileylənirlər. Hətta vəziyyət o həddə gəlib çatır ki, sürücü hərəkət zamanı avtobusun qapısını bağlamır və sərnişinlərdən bəziləri belə demək mümkündürsə, bütün yolu qapıdan sallana-sallana gedirlər.
Elşən Yəhyayev
Xəbərdən istifadə edərkən istinad etmək vacibdir.
