Sakinlərdən uzun illərdir yaşadıqları evlərindən çıxmaları tələb olunur.
Söhbət Sumqayıtdakı "Betonzavod" kimi tanınan ərazidə yerləşən gecəqondu məhəlləsindən gedir.
Burada sakinlər iddia edirlər ki, onlara ərazini alan sahibkarın müraciəti əsasında bir günün içərisində məhkəmə bildirişi gəlib və evlərini tərk etmələri tələb olunub. Gözlənilməz halla rastlaşan sakinlər indiyədək heç kəsin onlara bununla bağlı xəbərdarlıq etmədiyini deyirlər.
Sakinlərin sözlərinə görə, ərazini alan sahibkarı tanımırlar və heç vaxt onun üzünü görməyiblər.
Sumqayıt şəhər Bələdiyyəsinin ərazi üzrə 1 saylı inşaatçı məhəllə komitəsinin sədri Gülnarə Ağayeva da sahibkarı tanımadığını və hər şeyin gözlənilmədən baş verdiyini bildirib.
Məsələ ilə bağlı ərazini aldığı deyilən sahibkarın vəkili Nizami İbrahimov "Xəzər Xəbər"ə bildirdi ki, oradakilar gecəqondudur, yəni qanunsuz tikililərdir. Ona görə də məhkəməyə müraciət olunub və sakinlərin şəxsi ərazidən çıxarılması tələbi qoyulub.
Vəkilin sözlərinə görə, sakinlərə heç bir kompensasiya ödənişi nəzərdə tutulmayıb.
Xəbərdən istifadə edərkən istinad etmək vacibdir.
