Sürücülər reysə çıxmır, sərnişinlər yolda qalır: Sumqayıtda nə baş verir?
Sumqayıt şəhərindən Bakı Beynəlxalq Avtovağzal Kompleksinə və 20 Yanvar metrostansiyası istiqamətində hərəkət edən ekspress avtobuslarla bağlı sərnişinlərin narazılığı gündən-günə artır.
Sakinlərin Xeberle.com-a bildirdiyinə görə, son günlər sözügedən marşrutlar üzrə avtobusların sayı kəskin şəkildə azaldılıb. Bu səbəbdən insanlar dayanacaqlarda 30–40 dəqiqə, bəzən isə daha uzun müddət avtobus gözləməyə məcbur qalırlar. Nəticədə ciddi vaxt itkisi yaranır, sıxlıq isə qaçılmaz olur.
Narazılıqlar təkcə avtobusların intervalı ilə məhdudlaşmır. Bildirilir ki, ekspress avtobuslar Bakı Beynəlxalq Avtovağzal Kompleksinə yaxınlaşan zaman dayanacaqda yox, kənarda saxlanılır. Sürücülər isə sərnişinlərə müxtəlif bəhanələrlə reysə çıxmaq istəmədiklərini bildirirlər.
Bu vəziyyət sərnişinlərin nizamsız və təhlükəli şəraitdə gözləməsinə səbəb olur. Müşahidələr göstərir ki, bəzi hallarda avtobus sürücüləri sərnişin götürməkdə maraqlı görünmürlər.
Eyni problem Sumqayıtdan 20 Yanvar metrostansiyası istiqamətində fəaliyyət göstərən ekspress avtobuslarda da müşahidə olunur. Hazırda da sərnişinlər avtobusların dayanacaqdan kənarda saxlanıldığını, yüzlərlə insanın uzun müddət gözləməyə məcbur qaldığını bildirir. Bu hal həm təhlükəsizlik baxımından ciddi risk yaradır, həm də ictimai nəqliyyatda mövcud qaydaların kobud şəkildə pozulması kimi qiymətləndirilir.
Məsələ ilə bağlı aidiyyəti qurum — Azərbaycan Yerüstü Nəqliyyat Agentliyinə (AYNA) sorğu ünvanlansa da, indiyədək rəsmi cavab verilməyib. Sərnişinlər isə haqlı olaraq sual edir: ekspress avtobusların sayı hansı səbəbdən azaldılıb və sürücülərə sərnişin götürməmək barədə göstəriş olubmu? Bu barədə rəsmi elan verilibmi?
İctimai nəqliyyatın əsas məqsədi vətəndaşlara rahat, təhlükəsiz və vaxtında xidmət göstərmək olduğu halda, mövcud vəziyyət bunun tam əksini nümayiş etdirir. Sərnişinlər aidiyyəti qurumlardan problemin operativ şəkildə araşdırılmasını və ekspress avtobusların əvvəlki qrafik üzrə, qaydalara uyğun fəaliyyətinin bərpa olunmasını tələb edirlər.
Xatırladaq ki, Bakı-Sumqayıt istiqamətində 594 nömrəli sözügedən ekspres avtobus marşrutu 9 dekabr 2024-cü il tarixindən etibarən istifadəyə verilib.
Elşən Yəhyayev
Xeberle.com
Xəbərdən istifadə edərkən istinad etmək vacibdir.
