Rubrikamızın budəfəki qonağı Mədəniyyət kanalında aparıcı işləyən Aytən Fehruzdur. O, Xeberle.com-un suallarını cavablandırıb. Aparıcı ilə olan müsahibəni təqdim edirik.

- Tanınmışların çox hissəsi aparıcılığın uşaqlıq arzuları olduqlarını deyirlər. Bəs sizdə necə?

- Uşaqlıqda həkim də olmaq istəyirdim, polis də, jurnalist də, vəkil də, müğənni də.

- Bir aparıcı kimi olduqca maraqlı simanız və məlahətli səsiniz var. Bu sadalananları aparıcının uğurunun əsasını təşkil edən amillər hesab etmək olarmı?

- Çox sağ olun,belə görən gözləriniz var olsun. Məncə insanın nəyi olsa da,nəyi olmasa da, şansı olmalıdır.Şans uğurun əsasını təşkil edən əsas amildir.

- Rafiq Hüseynov məktəbi keçmisiniz. Bir aparıcı kimi Rafiq müəlimin xeyir-duasını almısınız? Rafiq müəllim sizin aparıcılığınızdan razıdırmı?

- Allah Rafiq müəlimin canını sağ eləsin. Onun tələbəsi olmağımla həmişə fəxr edirəm. Onun xeyir-duasını almışam. Bu da həmişə mənə güc verib.

- Görünüşcə gözəl sənətkarımız Həmidə Ömərovaya bənzəyirsiniz. İstərdinizmi Həmidə xanım kimi kino haqqında veriliş aparasınız?

- Tələbəlik illərində elə bilirdilər onun qızıyam. Hələ ki, kino haqqında veriliş aparmaq istəyim yoxdur. Baxmayaraq ki, ixtisasca kinoşünasam.

- Mütaliəni sevirsinizmi?

-Sevirəm.Vaxt tapdıqca oxumağa çalışıram.

- Son illərdə oxuduğunuz və həyatınızda dərin iz buraxan əsər hansıdır?

- Mütaliəni sevirəm,amma kitablar siz dediyiniz kimi həyatımda dərin iz buraxmır.Oradan nəsə öyrənə bilərəm, hələ iz buraxacaq əsərə rast gəlməmişəm. Axırıncı oxuduğum kitab məşhur Xalid Hüseynin "Çərpələng uçuran" əsəridir.

- Əsərdəki Həsən obrazının dostluqdakı etibarını,fədəkarlığını özünüzdə görürsünüzmü?

- Düzünü desəm, Həsən qədər yox. Həm mən özümü qarşılıq görmədən fədakarlıq edən insanlardan hesab eləmirəm. Heç bunu düzgün də saymıram.

-Teatrı necə sevirsinizmi?

- Teatrı sevirəm, amma kino qədər yox.

- Daim tamaşalarını izlədiyiniz sevdiyiniz aktyor varmı? Bu gün Azərbaycan tamaşalarında nə catışmır? Bir tamaşaçı kimi tamaşalar sizi qane edir?

- Sevdiyim aktyor, aktrisalar var. Amma hər tamaşaların izləyirəm desəm, yalançı olaram. Bu haqda kifayət qədər bilik və məlumatım olmadığına görə, danışmaq istəməzdim. Amma bir tamaşaçi kimi,bizim teatrımız kasıb görünüşlüdür,zənginlik catmır.

- Ailəlisiniz. Həm ailə, həm də karyera. Sizin üçün çətin deyil ki?

-Ailəliyəm. Bizim bir müəllimimiz vardı, həmişə deyərdi ki, Tv-də çalışmadan öncə çalışın ailə qurasınız, bu daha asan olar.Tələbəlik vaxtında tanış olmuşduq. Rejissordur.

- Nə vaxtsa aparıcılığı tərk edib özünüzü tam ailəyə həsr etmək fikriniz varmı?

- Məncə özünü bütünlüklə nəyəsə həsr etmək düzgün deyil. Fərqi yoxdur,bu qadın olsun, yaxud kişi. Nə ailəyə, nədə ki karyeraya. Bu mənim fikrimdir.Əgər belə olsa, sonra sən xoşbəxt olmasan, kimisə, nəyisə günahlandıracaqsan. Bundan pis heç nə yoxdur.

- Bir aparıcı kimi özünüzə kimləri rəqib görürsünüz?

- Özümü rəqibi olmayan, ya da bir neçə aparıcını rəqib görəcək qədər professional aparıcı hesab eləmirəm.Hələ bu işdə çox təzəyəm.

- Deyirlər yaradıcı insanlar depresiyaya tez düşürlər. Sizdə də bu hallar tez-tez müşahidə olunur?

- Bir verilişi izlədim, oradan öyrəndim ki, əslində bizim depressiya hesab elədiyimiz hallari düzgün adlandırmırıq. Çünki depressiya, çox ağır, çıxilması çətin, hətta intihara gətirib çıxaran ruh düşkünlüyü imiş. Şükür məndə belə hallar çox olmayıb.

- Sizi nə ruhdan sala bilər?

- Tez-tez ruhdan düşürəm. Amma bu yaxşıdir ki,çox tərs xasiyyətim var.Tərsliyimdən başladığım işi yarıda qoya bilmirəm, nə qədər ruhdan duşsəm də.

- Həm də muxbir kimi fəaliyyət göstərirsiniz. Ən maraqlı müsahibiniz kim olub?

- Tv-də fəaliyyətə muxbir kimi başlamışam. Hətta bundan da əvvəl "525-ci" qəzet ilk iş yerim olub. Ən maraqlı müsahibim Kamal Abdulla olub. Çətin müsahib idi.

- Bir müddət Sumqayıt şəhərində yerləşən məktəbdə təhsil almısınız. Bu müddət Sumqayıt yaddaşınızda necəqalıb?

- Sumqayıt mənim uşaqlıgımın şəhəri kimi yaddaşımda qalıb. Sumqayıtda gözəl ibtidai təhsil almışam. Dilarə müəlliməmiz varidi. Tələbkar idi. Bütün dəftərlərimiz səliqəli olmalıydı.Yazılarımızı ancaq mürəkkəb qələmlə yazmalıydıq. Bir dəfə də şagirdlər yığilmışdı müəllimənin oturduğu stolun başına. Deyəsən dəftərlərimizi yoxladırdıq. Sən demə mən də çıxıb durmuşam müəllimənin ayağının üstündə. Dilarə xanım bir xeyli üzümə baxıb, içini çəkdi, nə qədərdən sonra mən başa düşdüm məsələ nə yerdədir.

Zeynəb Abdullah

Xeberle.com