Bu gün Sumqayıt Cümə məscidində Dini Qurumlarla İş üzrə Dövlət Komitəsinin Sumqayıt-Abşeron bölgəsi üzrə şöbəsinin vəQafqaz Müsəlmanları İdarəsinintəşkilatçılığı ilə şəhərin din xadimlərinin  iştirakı ilə görüş keçirilib.

Tədbirdə Dini Qurumlarla İş üzrə Dövlət Komitəsinin Sumqayıt-Abşeron bölgəsi üzrə şöbəsinin müdiri Azər Abbasov, Sumqayıt Cümə məscidinin axundu Hacı Rauf Sərdarov çıxış edərək Ümummilli Lider Heydər Əliyevin din sahəsində gördüyü işlərdən, bu işlərin ölkə prezidenti İlham Əliyev tərəfindən uğurla davam etdirilməsini dinə olan diqqət və qayğının təzahürü kimi xarakterizə ediblər.

Bildirilib ki, Qafqaz Müsəlmanları İdarəsi tərəfindən təsdiqlənən Ramazan ayının təqviminə əməl edilməlidir. Qeyd olunub ki, ölkədə məzhəb ayrı-seçkiliyindən çıxış edərək Ramazan ayının başlanması və namazla bağlı azanın fərqli vaxtlarda səsləndirilməməli və vahid vaxta əməl edilməlidir.

Vurğulanıb ki, zaman-zaman dindən müəyyən maraqlar üçün istifadə edən bəzi qruplar ölkəmizdəki ənənəvi dini dəyərlərlə uyğunluq təşkil etməyən, dindarlar arasında fikir ayrılığı yaradaraq vəhdət və həmrəyliyə xələl gətirən tədbirlər görməklə öz məkrli məqsədlərinə nail olmaq istəyirlər.

Təcrübə göstərir ki, xüsusilə ölkə əhəmiyyətli tədbirlərin keçirildiyi vaxtlarda ictimai sabitliyi pozmaq üçün bəhanə arayan belə qruplar xüsusilə aktivləşirlər. Bu baxımdan, Ramazan ayında müxtəlif "dini təqvim”lər hazırlayaraq dindar kontingent arasında yayanlar çaşqınlıq yaratmaq məqsədi güdürlər.

Dini Qurumlarla İş üzrə Dövlət Komitəsinin Sumqayıt-Abşeron bölgəsi üzrə şöbəsinin müdiri Azər Abbasov deyib ki, Azərbaycan Respublikasında bütün İslam icmaları dini mərkəz kimi Qafqaz Müsəlmanları İdarəsində birləşirlər. Ona görə də mərkəzləri və havadarları xaricdə yerləşən bəzi müsəlman dini qrupların bu və ya digər şəkildə Azərbaycan vətəndaşlarına dini-ideoloji konteksdə müdaxilə etmələri qəbul edilməzdir: "Hər il olduğu kimi, Ramazan ayı öncəsi Qafqaz Müsəlmanları İdarəsinin Qazılar Şurası və Elmi-dini Şurası ölkə ərazisində Ramazan ayının başlanması və bayram günlərinin vaxtı ilə əlaqədar fətva verir, ay boyu icra olunacaq ibadətlərin vaxtları ilə bağlı xüsusi təqvim hazırlayır ki, məhz bu təqvim Azərbaycan ərazisi üçün dəqiq hesablanmışdır. Belə ki, həmin təqvim Qafqaz Müsəlmanları İdarəsi ilə Milli Elmlər Akademiyasının Şamaxı Astrofizika Rəsədxanası ilə birgə astronomik hesablamalara uyğun tərtib edilir. Ölkə müsəlmanları ay boyunca bu cədvələ riayət etməlidirlər".

Sumqayıt Cümə Məscidinin axundu Hacı Rauf Sərdarov vurğulayıb ki, Sumqayıt şəhərində də dövlət-din münasibətlərinin yüksək səviyyədədir, bu münasibətlərin daha da yaxşılaşdırılması üçün lazımı tədbirlərin həyata keçirilir. R. Sərdarov gənclər arasında dini maarifləndirmə işinin daha yüksək səviyyəyə çatdırılmasının, dini radikalizmə qarşı mübarizənin qanun çərçivəsində genişləndirilməsinin zəruriliyini də diqqətə çatdırıb. Şəhərin din xadimlərigənclərin dini maarifləndirilməsində daha fəal iştirak edəcəklərini, dövlət-din münasibətlərinin yaxşılaşdırılmasında, qeyri- ənənəvi dinlərə qarşı mübarizədə dövlətimizə yaxından kömək edəcəklərini bildiriblər.

Xeberle.com