Lənkəranda sərnişin avtobusu minik avtomobili ilə toqquşdu: sürücü öldü
Lənkəranda  bir nəfərin xəsarət alması ilə nəticələnən ağır yol-nəqliyyat qəzası baş verib. APA TV-nin cənub bürosunun məlumatına görə, hadisə noyabrın 7-də günorta saatlarında Ələt-Astara magistralının 199-cu kilometrliyində, yolun rayonun Digah kəndi ərazisindən keçən hissəsində qeydə alınıb. Sumqayıt şəhər sakini, 40 yaşlı Mehman Məmmədovun idarə etdiyi "Hyundai" markalı, 41 BB 958 dövlət nömrə nişanlı sərnişin avtobusu Astara istiqamətində hərəkətdə olarkən Lənkəran rayonunun Mamusta kənd sakini, 52 yaşlı Məhərrəm Hüseynovun idarə etdiyi  "VAZ-21011" markalı, 42 BF 290 dövlət nömrə nişanlı  minik avtomobili ilə toqquşub. Güclü zərbə nəticəsində minik avtomobili deformasiyaya uğrayıb. Hadisə yerinə çağırılmış  Fövqəladə Hallar Nazirliyinin (FHN) xilasediciləri xüsusi alətlərin köməyi ilə avtomobilin içərisində sıxılmış vəziyyətdə qalan sürücünü çıxararaq Lənkəran Mərkəzi Rayon Xəstəxanasına yola salıblar. Xəstəxanadan verilən məlumata görə, müxtəlif dərəcəli bədən xəsarətləri almış Məhərrəm Hüseynova müvafiq tibbi yardım göstərilsə də, həyatını xilas eymək mümkün olmayıb. Yol polisi əməkdaşları qəzanın baş verdiyi ərazini müayinə ediblər. Hadisənin dəqiq səbəbləri avtoekspertizanın yekun rəyindən sonra məlum olacaq. Faktla bağlı Daxili İşlər Nazirliyi Baş Dövlət Yol Polisi İdarəsinin istintaq və təhqiqat şöbəsində araşdırma aparılır.