Emalatxanasının demək olar tamamı qonağı olmuş məşhurlarla olan fotolarla doludur. Bu siyahısında Prezident İlham Əliyevdən tutmuş, ölkənin ən tanınan sənət adamları, müğənnilər, politoloq və siyasətçilər, hətta Türkiyə Respublikasının sabiq prezidenti Abdullah Gül belə var. Bu məşhurluq Hacı bəyə təsadüfi və ya şans üzərindən gəlməyib. Çünki o, 45 ildən artıqdır ki, bu sənətin sözün əsl mənasında sənətkarıdır. Usta Hacı təkcə saatları tərsinə işlətməsi ilə tanınmır. Onun düzəldə bilmədiyi saat yoxdur və ən təəccüblüsü isə düzəltdiyi saatların heç vaxt xarab olmamasıdır.

"Dayımın "pulu hər zaman qazanmaq olar, əsas sənəti yaxşı öyrən" sözünü qulağıma sırğa etdim və 6 ay öyrənməyimə baxmayaraq, daha 6 ay da pulsuz işləməyə qərar verdim. Əslən yəhudi olan ustam məni öyrətmək istəmirdi, əksinə məni həvəsdən salmağa çalışırdı. Amma qarşıma məqsəd qoymuşdum ki, ölkənin ən yaxşı saatsazı olacam".

"Sənətin pisi yoxdur, sənətkarın pisi var" - deyən usta Hacının adından istifadə edənlər belə tapılır:

"Məni tapmağa çalışan adamlar bəzən deyirlər ki, hara gedirəm hamı deyir usta Hacı mənəm. Bir dəfə İtaliyadan və digər xarici ölkələrdən gələn qonaqlar inana bilmədilər ki, mən burada işləyirəm. Dünyanın hər yerindən mənə iş təklifləri gəlir".

Yerinin darlığından şikayətlənən usta bizdən onun problemini işıqlandırmağımızı xahiş etdi: "Mən dəfələrlə verilişlərdə iştirak etmiş, filmlərdə rol almışam. Haqqımda Azərbaycan, Türkiyə və İtaliyada sənədli filmlər çəkilib. Mənə müxtəlif ölkələrdən - İran, Türkiyə, eləcə də bu yaxınlarda Amerikadan iş təklifi gəldi. Niyə yerimi, vətənimi, ailəmi atıb getməliyəm?! Hörmətli prezident İlham Əliyevlə 3 dəfə görüşmüşəm. Görüşlərin birində mənə dedi ki, "sənə halal olsun, usta. Sənin səs-sorağın Prezident Administrasiyasını götürüb".

2015-ci ildə İtaliyanın Milan şəhərində dünyanın ən böyük sərgisi keçirilirdi. Bu sərgidə mənim əl işlərim getdi. Dünyanın ən yaxşı 120 sənətkarı siyahısında idim. Bunun üçün İtaliyadan 12 nəfər nümayəndə heyəti gəlmişdi və elə sənədli filmi də o zaman çəkdilər. Və belə bir sənətkara 3 kv. metrlik yeri vermirlər".

Onu da qeyd edək ki, usta Hacı emalatxanasının dar olması səbəbi ilə Azadlıq Prospektində 3 kv. metrlik ərazinin ona verilməsini istəyir.

"Dəfələrlə ərizələrlə müraciət etsəm də verməyiblər. Bu yer oğlumun adınadır. O da saatsazdır. İki nəfərin burada işləməsi mümkün deyil. Xaricdən gələn qonaqlarım inana bilmirlər ki, mən burada işləyirəm. İctimai televiziya haqqımda "Zamana bağlı sənətkar" adlı sənədli film belə çəkib. Bəlkə, 300-ə yaxın televiziya çıxışlarım, müsahibələrim olub. Azadlıq prospektində ADNSA-nın yanında 3 kv. metrlik yer var. Öncələr ora saatsaz yeri olub. Sonra söküblər. Mən oranı öz şəxsi pulumla, hansı qaydada deyirlərsə, arxitekturasına uyğun hansı formada tələb edirlərsə, o formada da düzəltməyə hazıram. Mən xalqımı, vətənimi sevirəm və millətimi qoyub heç bir yerə getmərəm. Bu yaxınlarda 200 minlik saat düzəltdim. Elə təkcə hissələri 100 min manat elədi. Məni imtahan etsinlər, Azərbaycana qızıl medalı gətirərəm. Yerim dardır. Sənətkarın yeri geniş olmalıdır. İlham Əliyevin əmisi oğlu mənim dostumdur. "Nə qulluğun olsa de" - deyib mənə, amma utanıram deməyə. Türkiyənin prezidenti ilə görüşmüşəm. Baxan kimi dedi ki, "səni TRT1-də görmüşəm. Sən saatı geriyə işlədirsən".

Mən narazı deyiləm. Sadəcə, o yeri istəyirəm. Ölən günə kimi də istəyəcəm. Verməsələr də, ölən günə kimi deyəcəm ki, heyif o yerdən. Bakının Arxitektura idarəsinə göndərirlər, onlar da deyirlər ki, verə bilmərik. Ayıbdır, axı hər şeyi prezidentə demək olmaz. Mən utanıram şəxsən".

Həmin yerin əvəzinə başqa yer təklif etdilər? - sualına usta belə cavab verib:

"Xeyr. Heç yeri təklif etməyiblər. Məni axtaran insanlar tapa bilmirlər. Heç maşın saxlamağa yer də yoxdur burada. Arenda mənə sərf etmir. Məşhur adamam. Müştərilərimi yığacam, sonra sahibi deyəcək ki, buranı boşalt buranı başqa şey edirəm. Mən neçə il yığdığım müştərilərimi itirəcəm. Daş düşdüyü yerdə ağır olar. Bura gəlməyən adam olmayıb. Baxın şəkillərdə Zaur Rzayev, Rasim Əliyev, Novruz Məmmədov. Lətif Qəndilov Çində səfirdir. Fəxrəddin Manafov, Yaşar Nuri, Məlahət Həsənova, Nisə Qasımova, Skripkaçı Ceyhun. Mən elə sənətkaram ki, heçkimə zəng edib heçnə xahiş etmirəm. Tək bir dəfə çoxdan Novruz Məmmədovdan bir məsələdə xahiş etmişəm. Gördüyünüz bu insanlardan bir də Cənab Prezidentdən xahiş etmişəm. Heç vaxt heç kimdən heç nə xahiş etmirəm. Mən "Bəylik dərsi" filminə də çəkilmişəm. Yəni demək istədiyim odur ki, məşhur adamam, ürəyimdə arzularım var. İki nəfər girəndə bura dolur. Arxitektura idarəsi hansı qaydada istəyirsə, o cürə də yaradım oranı. Mən Prezidentimizi dəstəkləyən, dövlətimi sevən adamam".(ölkə.az)