Üzvləri sırasında Sumqayıt Bələdiyyəsinin sədri, professor Əbülfəz Babayevin də olduğu Azərbaycan nümayəndə heyəti Avropa Şurasının Yerli və Regional Hakimiyyətlər Konqresinin Strasburqda keçirilən 27-ci sessiyasında MDB ölkələrində baş qaldıran separatizm halları ilə bağlı bəyanat layihəsi ətrafında aparılan geniş müzakirələrdə iştirak edib. Bu barədə Xeberle.com-a Sumqayıt şəhər Bələdiyyəsindən məlumat veriblər.

Bələdiyyə sədri çıxış edərək hər zaman öz hiylə və fitnəkarlıqlarının bir çox ermənipərəst ölkələr tərəfindən "öz müqəddəratını həlletmə”, "azadlıq mübarizəsi” kimi və maneəsiz qəbul olunmasına alışmış ermənilərin bu dəfə Azərbaycan diplomatiyası qarşısında tab gətirə bilmədiyini bildirib. Ə. Babayev bu uğurun əsasının Avropa Şurasının Yerli və Regional Hakimiyyətlər Konqresinin Monitorinq Komitəsinin bu ilin iyulunda Moldovanın paytaxtı Kişinyovda keçirilən növbəti iclasında qoyulduğunu diqqətə çatdırıb: "Regionun bəzi ölkələrinin separatizmdən əziyyətlər çəkdiyinin və bunun bütün Avropada narahatlıq doğurduğunun qeyd edildiyi Monitorinq Komitəsinin iclasında Konqresin 27-ci sessiyasında qəbul ediləcək Deklarasiyasında regional muxtariyyətin dövlətlərin suverenliyinə, ərazilərinin bütövlüyünə, sərhədlərinin toxunulmazlığına hörmət daxilində təmin edilməsi Konqresın Bürosu qarşısında mühüm məsələ kimi qaldırılmışdı. Bizim nümayəndə heyətimiz tərəfindən isə Ukrayna, Gürcüstan, Moldova ilə yanaşı Azərbaycanın da separatizmdən əziyyət çəkən ölkələr sırasına daxil edilməsi təklif edilmişdi.”

Bələdiyyə sədri vurğulayıb ki, Konqresin 27-ci sessiyasında deklarasiyanın qəbulu ilə bağlı səsvermədən öncə Azərbaycanın Konqresdəki nümayəndə heyətinin rəhbəri Anar İbrahimov təklif olunan əlavəyə ölkəmiz üçün mühüm olan bir dəyişikliyin də edilməsini zəruri hesab etdiyini bildirmiş və sənədin son variantında "dövlətlərin” sözü əvəzinə konkret olaraq Ukrayna, Gürcüstan, Moldova və Azərbaycanın adlarının salınmasını təklif etmişdi. Baxmayaraq ki, bu təklif ermənilər tərəfindən birmənalı qarşılanmayıb: "Ermənistan nümayəndə heyəti üzvlərinin narazılıq və kəskin etirazlarına baxmayaraq, sonda həmin təklifin də daxil edildiyi Bəyanat layihəsi səs çoxluğu ilə, bütövlüklə qəbul edildi. Nəticədə Konqresin Bəyanatında separatçılığın böyük zərbə vurduğu, bundan əziyyət çəkən ölkələr kimi Ukrayna, Gürcüstan və Moldova ilə yanaşı ilk dəfə olaraq Azərbaycanın da adı əlavə olundu.”

- Bu, Azərbaycan diplomatiyasının, xaqımızın haqq işi uğrunda mübarizəsinin növbəti, həm də böyük bir uğurudur, - deyə Ə.Babayev nümayəndə heyətinin üzvü kimi məmnunluğunu ifadə edib. O qeyd edib ki, bu uğurun təmin olunmasında Azərbaycanın apardığı uğurlu xarici siyasət əsas rol oynayıb: "Avropanın enerji təhlükəsizliyində mühüm rola malik olan, beynəlxalq əhəmiyyətli transmilli layihələrin reallaşmasını təmin etmiş Azərbaycan Prezidenti İlham Əlievin bütün dünyada artan nüfuzu, eyni zamanda YUNESKO və İSESKO-nun xoşməramlı səfiri, Heydər Əliyev Fondunun prezidenti Mehriban xanım Əliyevanın Avropanın bir çox ölkələrində tarixi və maddi-mədəniyyət abidələrinin qorubub-saxlanmasına, mədəniyyətlərin qarşılıqlı inkişafına xidmət edən layihələrin reallaşmasına verdiyi töhfələr müstəsna rola malik olmaqla başlıca əhəmiyyət kəsb etmişdir.”

Bələdiyyə sədri eyni zamanda qeyd etmişdir ki, Konqresin 27-ci sessiyasında Avropada gənclər siyasətinə də diqqət yetirilmiş, bu mövzuda geniş müzakirələr aparılmışdır. Ə.Babayev sessiyanın plenar iclasında çıxış edərək, Azərbaycanda gənclərə göstərilən qayğı və etimad, onların öz potensial imkanlarından tam və səmərəli istifadə edə bilmələri üçün yaradılan əlverişli şərait barədə məlumat vermiş, gənclərin bütün sahələrdə, o cümlədən idarəetmədə fəal iştirak etdiklərini diqqətə çatdırmışdır. Buna misal olaraq Sumqayıt Bələdiyyəsinin sədri özünün müavininin istedadlı gənc şahmatçı, qadınlar arasında Dünya çempionu, Beynəlxalq dərəcəli qrossmeyster Zeynəb Məmmədyarovanın olduğunu bildirmişdir.

Azərbaycan gənclərinin fəallığını və vətənpərvərliyini təsdiq edən faktlardan biri kimi qədim Gəncə şəhərinin 2016-cı il üçün Avropanın "Gənclər paytaxtı” elan edilməsi sessiya iştirakçılarının diqqətinə çatdırılmışdır və sonda Avropa ölkələrinin nümayəndə heyətləri bu münasibətlə Azərbaycan tərəfindən təşkil olunmuş prezentasiyada iştirak etməyə dəvət olunmuşlar.

Rəhman ORXAN