Xeberle.com-a açıqlamasında "Sumqayıt şəhər Təmizlik Departamenti” Məhdud Məsuliyyətli Cəmiyyətin direktoru Atəş Rüstəmov bildirib ki, 52-ci məhəllə fərdi yaşayış sektorudur və müqavilə əsasında ərazinin tullantılarını daşıyırlar: "Bizim qurum təsərrüfat hesabına işləyən idarədir və göstərdiyimiz xidmət müqabilində bizə pul ödənilməlidir. Hamı pandemiyadan istifadə edir, artıq 4 aydır ödənişlərin yığımında çətinliklər var. Lakin biz yenə də, köhnə texnika ilə də olsa, heç bir ərazidə imkan vermirik tullantı qalsın. Ən ucqar yaşayış massivlərinə qədər gün ərzində neçə dəfə tullantılar daşınır. Yəqin ki, sözügedən ərazidə vətəndaş evində aparılan təmirlə əlaqəli və ya digər işlərlə bağlı olaraq normadan artıq tullantı çıxarıb və ödənişi həyata keçirmədiyi üçün tullantı ərazidən götürülməyib. Bu o demək deyil ki, biz əraziyə baxmırıq və tullantılar həftələrlə qalır".

İdarə direktoru şəhər ərazisində zibil qutularının olmamasına da aydınlıq gətirib və bildirib ki, idarə şəhərin hər yerində zibil qutuları yerləşdirir, çünki bu tullantıların daşınmasını rahatlaşdırır. "Lakin təəssüf ki, zibil qutuları oğurlanır. Polisin də bundan məlumatı var. Hətta 17-ci mikrorayon ərazisində 10 tonluq kontener gecə ilə oğurlanıb", - deyə qurum rəsmisi bildirib