Sumqayıtda Səməd Vurğun adına Mərkəzi kitabxanada mütaliə ilinə həsr olunmuş tədbir keçirilib. Kitabxanadan Xeberle.com-a verilən məlumata görə, tədbirdə  Mədəniyyət İşçiləri Müstəqil Həmkarlar  İttifaqı Sumqayıt şəhər Komitəsinin  sədri, şair Əşrəf Veysəlli,  əməkdar  jurnalist, yazıçı-publisist  Eyruz  Məmmədov  və  Sumqayıt şəhər Gənclər və İdman Baş İdarəsinin Gənclərlə  iş sektorunun müdiri  Rüstəm Sadıqzadə  iştirak edib. 
Sumqayıt şəhər MKS-nin  direktoru  Yeganə Əhmədova  bildirib ki,  2015-ci il  Sumqayıt şəhər MKS-ə daxil olan kitabxanalar  arasında  "MÜTALİƏ  İLİ” elan edilib. Y. Əhmədova qeyd edib ki,  "Mütaliə ili” çərçivəsində kitabxanalarda  ilboyu keçirilməsi nəzərdə tutulan tədbirlər planı işlənib hazırlanıb: Kitabxana direktoru əsas məqsədlərindən də danışıb. Vurğulayıb ki, rəhbərlik etdiyi kollektivin məqsədi  şəhər əhalisinin  bütün təbəqələrində mütaliəyə marağın  formalaşmasına və inkişaf etdirilməsinə, oxuculara xidmətin forma və məzmunca yenilənməsinə yardımçı olmaqdır.
Sonra Əməkdar jurnalist  Eyruz  Məmmədov, şair Əşrəf Veysəlli kitabın, kitabxanaların, mütaliə  vərdişinin  həyatımızda oynadığı əhəmiyyətli rolundan  söz açıblar.  Qeyd edilib ki,  milli-mənəvi  dəyərlərimizin  ən  gözəl  daşıyıcısı olan kitablar  bizi mənən  saflaşdırır, zənginləşdirir: "Daşıdığı  məna  dəyərindən  asılı  olaraq  gah  romantik dosta, gah  da  müdrik  yol  yoldaşına  çevrilir. İnsanın savadlı, intellektual, zəngin mənəviyyatlı, gözəl dil qabiliyyətinə malik olmasında mütaliənin rolu danılmazdır.  Biz unutmamalıyıq ki,  mutaliə  biliyə, bilik  müdrikliyə  aparır.”     
Sonda Sumqayıt şəhər  MKS-ə daxil olan kitabxanaların  ötən ilin nəticələrinə görə daha çox  mütaliə edən oxucularından   Elmin Hüseynxanlı, Gülnar Müzəffərova və Nərminə Soltanova Sumqayıt şəhər Mədəniyyət və Turizm İdarəsi, Sumqayıt şəhər MKS  və   Sumqayıt şəhər Gənclər və İdman Baş İdarəsi  tərəfindən  "İlin oxucusu” nominasiyasına görə  Fəxri  Fərman   və  hədiyyələrlə təltif olunublar. 
Xeberle.com