Müğənni Röya Ayxan ötən gün özü ilə əlaqəli olaraq maraqlı açıqlamalar verib. 

ANS PRESS-in məlumatına görə, müğənni yerli telekanallardan birində yayımlanan verilişdə qonaq qismində iştirak edib. İstanbuldan yeni qayıdan ifaçı təklif olunan yeni layihələrindən bəhs edib. Proqramın aparıcısının: “Röya-Tarkan dueti reallaşa bilər?” sualına sevilən ifaçı maraqlı cavab verib: 

“Ozan Çolaqoğlu dəfələrlə təklif edib ki, Tarkanla duet oxuyun. Hətta bir dəfə deyirdi ki, “Bəlkə də” mahnısında Tarkan vokalçı olsun. Tarkana təklif etsəydik razılaşardı da. Amma onu narahat etmək istəmədim. Mən sırtıq kimi hərəkət etmirəm. Orada da buna görə mənə qiymət verirlər. Ümumiyyətlə, biz-Azərbaycan müğənniləri özümüzə qiymət veririk”. 

Azərbaycanla yanaşı Türkiyədə də sevilməyi bacaran Röya ulduzluq xəstəliyinə heç vaxt tutulmayacağını deyib. Bundan əlavə olaraq xaricdə olarkən təşkilatçılara tələblərini açıqlayıb. 

"Məndə heç vaxt ulduzluq olmayacaq. Bütün dünya ulduzlarının zəif nöqtəsi var. Hansısa verilişə gedəndə tələbləri olur. Mən burada verilişlərə dəvət olunanda baxıram, istədiyimi görməyəndə getmirəm. Durub onlardan tələb etmirəm ki, bunlar mütləq olsun. Amma Türkiyədə mənim də tələblərim var. Qalacağım otel səsyazma studiyasına yaxın olmalıdır. Əgər mən oteldən çıxıb, tıxacda qalıb nə qədər vaxtdan sonra studiyaya çatacağamsa, onda oxumayacağam”. 

Müğənni ana olduqdan sonra gözəlləşdiyini deyib: “İlk övladım dünyaya gəldikdən sonra hamı deyirdi ki, Röya, gözəlləşmisən. İndi də istəyirəm, ikinci uşağı dünyaya gətirim, lap gözəlləşim”. 

Röya ona qarşı səhv addım atanlara şans vermədiyini vurğulayıb, eləcə də qeyd edib ki, özünə güclü qız kimi baxır. Röya sənətdə kimlərin qaldığı kimlərinsə getdiyinə də münasibət bildirib: "Bu sənətdə güclülər qaldı, zəiflər getdi. Şou-biznesdə ikiüzlülük ancaq kişilərdədir. Burada oğlanlardan söz gedir. Qadınlarla mübahisə, rəqabət, səviyyəsizlik. Üstündən bir müddət keçir, gəlirlər barışmağa. Amma qapılar bağlıdır, eləsinə şans düşmür. Mən diqqəti ailəmə, oğluma, Kənana (prodüser Kənan Bayramov) verirəm. Elələrini tanısaydım, qarpızdoğrayanı müğənni etməzdim. Mən Azərbaycanın ulduzuyam. Ən gözəl mahnıları mən oxumuşam. Azərbaycanda müğənnilər arasında çox bahalı qadınam. Bu neçə illərdir belədir, kimlər mübarizə aparsa da, mənə çatmayıb”.

Qeyd edək ki, ötən gün ANS PRESS-ə eksklüziv müsahibə verən türkiyəli məşhur müğənni Murat Boz ölkəsində yalnız Röyanı tanıdığını bildirib.