“Həyat
varsa”, “Muradına çatan Günəş”, “Sənə inanıram” seriallarında baş rolları ilə
tamaşaçıların sevgisini qazanmış tanınmış kinoaktyor Ruslan Sabirli öz pərəstişkarlarını
daha bir sürprizi ilə sevindirib. Belə ki, o, bu dəfə ona pərəstiş edən
tamaşaçılarına musiqi töhfəsi verib. Bu barədə kinoaktyor Xeberle.com portalına
açıqlama verib:
“İlk musiqi kompozisiyamı 1996-cı ildə bəstələmişəm
və o vaxtdan bəri təxminən 10-a yaxın bəstəm mövcuddur. Uzun müddətdir ki, onları nə vaxtsa aranjiman
edib məni və yaradıcılığımı sevən insanlara təqdim edəcəyim arzusu ilə
yaşayırdım. Qismət bu günə imiş. İlk olaraq pərəstişkarlarıma 2009-cu ildə bəstələdiyim
“Yaz xatirələri” adlı kompozisiyamı təqdim etmək qərarına gəldim. Bu melodiya hazır
olan kimi kövrək hisslərə qapıldım. Bir tərəfdən neçə illərdir arzusunda
olduğum xəyalın gerçəkləşməsi sevinci, digər tərəfdən isə bir vaxtlar yaşadığım
hisslərin xatirələri kövrəltdi məni. Bu kompozisiya həyatımda yaşadığım bir sevgi
hekayəsidir və onu bu gün yanımızda olmayan, lakin qəlbimizdə yaşayan insanlara
həsr edirəm. Ümid edirəm “Yaz xatirələri” pərəstişkarlarım tərəfindən seviləcəkdir.”
Xeberle.com
Xəbərdən istifadə edərkən istinad etmək vacibdir.
