Həbsdə yatan tanınmış sənət adamları və onların ailə üzvləri 

Bir neçə gün əvvəl tanınmış meyxanaçı Bayram Kürdəxanlı narkotik vasitələrin qanunsuz dövriyyəsinə görə həbs edildi. Sabunçu rayon Məhkəməsi istintaq müddəti üçün onun barəsində 2 ay müddətinə həbs-qətimkan tədbiri seçib və meyxanaçı Bakı İstintaq Təcridxanasına yerləşdirilib. Meyxanaçının barəsində Cinayət Məcəlləsinin 234-cü (narkotik vasitələrin qanunsuz dövriyyəsi) maddəsi ilə iş başlanılıb.

Bu xəbər oxucuları o qədər də təəccübləndirmədi. Şou-biznes nümayəndələrinin bir çoxlarının, eləcə də meyxanaçıların adı bu kimi hadisələrdə tez-tez hallanır. Bir çox hallarda isə məşhurlarımızın ailə üzvləri cinayətə bulaşır və həbsxana həyatı yaşamalı olur. Lent.az son illərdə adı cinayət əməllərində hallanan, həbsxanaya düşən məşhurları təqdim edir.

Siyahımızın ilk sırasında dünyasını dəyişmiş reper Hüseyn Dərya yer alır. Heç kimə sirr deyil ki, o, dəfələrlə narkotik istifadə etdiyinə görə, həbs həyatı yaşayıb. Sonuncu dəfə həbsdən azadlığa çıxan müğənni mətbuata açıqlamasında narkotikə “yox” dediyini, “tövbə” etdiyini açıqlamışdı.

Növbəti sırada tanınmış müğənni-bəstəkar Tunar Rəhmanoğlu başçılıq edir. Azəri Günelin qardaşı kimi də tanınan ifaçı 2013-ci ilin mayın 4-də həbs edilib Səbəb isə Tunarın avtoşluq etməsi və polisin qanuni tələbinə məhəl qoymaması idi. İdarə etdiyi “Mersedec” markalı avtomobillə yol hərəkəti qaydalarını pozandan sonra sənədlərini inspektora təqdim etməkdən imtina edən T.Rəhmanoğlu daha sonra barəsində inzibati tədbir görülməsi üçün şöbəyə aparılmışdı. Məhkəmənin qərarı ilə ona 10 sutka həbs və 1 il müddətinə sürücülük hüququndan da məhrum olunması cəzası verildi. On gün həbs yatan ifaçı azadlıqdan çıxdıqdan sonra mövzu ilə bağlı mətbuata açıqlama vermək istəmədi.

Bir zamanlar populyarlığı ilə özündən söz etdirən Vüsal Əliyevin də yolu həbsxanadan keçib. O, Cinayət Məcəlləsinin dələduzluq (178-ci) maddəsi ilə axtarışda olub. Bir müddət Moskvada yaşayan müğənni Xətai Rayon Polis İdarəsinin əməkdaşları tərəfindən saxlanılaraq, istintaqa cəlb edilmişdi. Lakin V,Əliyevin himayəsində 4 azyaşlı uşağın olması nəzərə alınaraq, azadlığa buraxılıb.

Azərbaycanl ilk dəfə “Eurovision-2008” mahnı müsabiqəsində təmsil edən müğənni Samir Cavadzadədə adı cinayətdə hallanan məşhurlardandır. O, dostu Elvin Hüseynovu bıçaqlaması faktı ilə əlaqədar saxlanılıb. Hadisə 2011-ci il sentyabrın 20-də Nəsimi rayonu Mirəli Qaşqay küçəsi, 32 ünvanında baş verib.  

Reper Elşad Xose (Əliyev) də narkotikdən istifadə etdiyi üçün həbs olunanlardandır. Hətta o, 2010-ci ildə narkotik vasitələrin qanunsuz dövriyyəsinə görə həbs edilib və bir müddət həbsxana həyatı yaşayıb.

Rejissorlardan Aqil M.Quliyev 2013-ci il aprelin 23-ü Xətai Rayon Məhkəməsində keçirilən prosesdə hökm oxunaraq, 1 il 6 ay müddətinə azadlıqdan məhrum edilib. Buna səbəb kimi, rejissorun Marianna Turabova adlı şəxsdən 150 min manat borcu olduğunu, lakin pulu geri qaytarmadığı göstərilmişdi.

Aqil.M.Quliyevin kolleqası, Gənc Tamaşaçılar Teatrının rejissoru Ağalar İdrisoğlu yolu həbsxanadan keçənlərdəndir. A.idrisoğlu Bakı Şəhər Baş Polis İdarəsində Cinayət Məcəlləsinin 178.3.1-ci maddəsi ilə başlanmış cinayət işi çərçivəsində həbs edilib. O, 2 ay həbs həyatı yaşayıb. O, bir qrup şəxslə birgə şəbəkə biznesində təqsirləndirilir.

“Elit-star" ləqəbi ilə tanınan müğənni Cəmilə İsgəndərovanın adı da cinayət əməlində hallanıb. Məlumatlara görə, ifaçının keçmiş qonşusu polisə şikayət edərək bildirib ki, Cəmilə tanışı ilə birlikdə yaşadığı Nizami rayonu ərazisində qonşusunun avtomobilini mənimsəyib və bu yolla dələduzluq edib.

Azərbaycanda şou-biznes nümayəndələrinin adlarının bu kimi cinayətlərdə hallanması adi hala çevrilsə də, onların doğmalarının da adları  da az hallanmayıb.

Buna misal olaraq həbsxanada özünü asan müğənni Mətanət Əsədovanın 35 yaşlı bacısı Nurlanə Əsədova 43 yaşlı həyat yoldaşı ilə birgə saxlanılıb. Onlar 2013-ci il sentyabrın 29-da Xırdalan şəhərində aptek işçilərinə qarşı quldurluqda ittiham olunub. Həbsxanaya salınan müğənnin bacısı buna dözməyərək, bir neçə gün sonra, oktyabrın 9-dan 10-na keçən gecə Kürdəxanıdakı istintaq təcridxanasında özünü asıb.

Xalq artisti Aygün Kazımovanın qardaşı Kazım Kazımov 2013-ci ildə Bakı Ağır Cinayətlər Məhkəməsində keçirilən məhkəmədə 10 il həbs cəzasına məhkum edilib. K.Kazımov Cinayət Məcəlləsinin 178.3.2-ci (dələduzluq - külli miqdarda ziyan vurmaqla törədildikdə) və 178.2.4-cü (dələduzluq - xeyli miqdarda ziyan vurmaqla törədildikdə) maddələri ilə təqsirli bilinib. Bakı şəhərində tikinti işləri ilə məşğul olan K.Kazımov vətəndaşlara külli miqdarda ziyan vurmaqda, bir mənzili bir neçə nəfərə sataraq, dələduzluq əməlləri törətməkdə ittiham olunub.

Müğənni Rəqsanə İsmayılovanın qohumlarından cinayət işində adı hallananlar yetəri qədərdir. Belə ki, müğənnin bacısı Ellada İsmayılova 2007-ci ildə Ağır Cinayətlərə Dair İşlər üzrə Məhkəmədə təqsirləndirilən şəxslər qismində məsuliyyətə cəlb olunub. E.İsmayılova Cinayət Məcəlləsinin 144-1.1-ci (insan alveri, yəni şəxsin alqı-satqısı və ya onun istismar edilməsi məqsədilə dövlət sərhədindən keçirilməsi üçün və ya eyni məqsədlə digər şəxslərə verilməsi üçün cəlb edilməsi, əldə edilməsi, gizlədilməsi, verilməsi), maddəsi ilə ittiham olunmuşdu. Hazırda azadlıqda olan Rəqsanənin bacısı xarici ölkədə yaşayır. Lakin onun övladları da anasından geri qalmayıblar. Belə ki, E.İsmayılovanın oğlanları Turan və Tural Səfərovlar ötən ay Bakının Nərimanov rayonu ərazisində baş verən insident zamanı həbs olunublar.

Mərhum şair Nüsrət Kəsəmənlinin oğlu Araz Kəsəmənli isə hazırda həbsdədir. O, 2 dəfə azadlıqdan məhrum edilib. Onun ilk həbsi 1998-ci ildə olmuşdu. O, qeyri-rəsmi nikahda yaşadığı qadını qətlə yetirmiş və məhkum olunmuşdu. Daha sonra azadlığa çıxan A.Kəsəmənli yenidən istintaqa cəlb edilərək bu ilin mayın 19-da Bakı Ağır Cinayətlər Məhkəməsində barəsində 8 il 4 ay həbs qərarı seçilib. O, 2013-ci il sentyabrın 17-də qardaşı Reşat Kəsəmənli və dostu Valehlə toya getdikləri zaman şöbəyə aparılıblar. Hadisədən bir neçə saat sonra Reşat və Valeh buraxılsa da, Araz Cinayət Məcəlləsinin 234-cü (qanunsuz olaraq narkotik vasitə əldə etmə, saxlama, satma, daşıma, göndərmə) maddəsi ilə istintaqa cəlb edilib.  

Əməkdar artist Firuzə İbadovanın bacısı, aktrisa Rəhilə İbadova həbsxana həyatı yaşayıb. Belə ki, aktrisa 2006-cı ildən 4 saylı Cəzaçəkmə Müəssisəsində cəza çəkib və 20013-ci ilin dekabrın 11-də azadlığa buraxılıb. O, Cinayət Məcəlləsinin 178.3.2 (dələduzluq, külli miqdarda ziyan vurmaqla törədildikdə) maddəsi ilə təqsirləndirilərək 9 il azadlıqdan məhrum edilmişdi. Sonradan Bakı Apelyasiya Məhkəməsi işi 8 ilə endirib). Həbsxanadakı Dram Dərnəyinin rəhbəri olub.

Abdulla Şaiq adına Azərbaycan Dövlət Kukla Teatrının aktyoru Rəhman Rəhmanovun oğlu Emil Rəhmanov da soyğunçuluqda günahlandırılıb. 2008-ci ilin yanvarında saxlanılaraq, barəsində Cinayət Məcəlləsinin soyğunçuluq (180. 2.2-ci ) maddəsi ilə cinayət işi oxunub. O, 6 il həbs cəzası alıb. Həmçinin Ağır Cinayətlərə Dair İşlər üzrə Məhkəmənin hökmü ilə 3 min manat məbləğində cərimələnib. Hazırda azadlıqdadır. E.Rəhmanov 2005-cı ildə "Azəri-star" mahnı müsabiqəsinin iştirakçısı olub.

Tanınmış aktyor, Xalq artisti Arif Quliyevin oğlu Fərid Quliyev illər öncə qəsdən adam öldürmə maddəsi ilə məhkum olunaraq 14 il müddətinə həbs cəzası almışdı. Lakin sənətkarın oğlu F.Quliyev uzun müddət vərəm xəstəliyindən əziyyət çəkdiyi üçün 17.01.2012 tarixində dünyasını dəyişib.

Xalq artisti Təranə Muradovanın bacısı Nailə Paşayeva dəfələrlə müxtəlif cinayətlərə görə həbs olunub. İlk dəfə 13 yaşında həbs olunan N.Paşayeva 20 yaşında azadlığa çıxsa da, yenidən oğurluq səbəbi ilə həbs olunub. 2008-ci ilin 20 aprelində 6 il müddətində azadlıqdan məhrum etmə cəzası ilə yenidən cəzaçəkmə müəssisəsinə göndərilmişdi. Sonuncu dəfə isə narkotik üstündə həbs olunaraq 4 il 6 ay müddətində azadlıqdan məhrum edilən N.Paşayeva bir neçə gün əvvəl qaraciyər serozundan dünyasını dəyişib.

Tanınmış aktrisa, xalq artisti Kübra Əliyevanın oğlu Rauf Məmmədov Ağır Cinayətlərə Dair İşlər üzrə Məhkəmədə Cinayət Məcələsinin 181-ci (quldurluq) və 126-cı (qəsdən sağlamlığa xəsarət yetirmə) maddələri ilə ittiham olunub. O, Bakıda aptekə basqın etməkdə təqsirli bilinərək 14 il müddətinə azadlıqdan məhrum edilmişdi. Xatırladaq ki, aptekə daxil olan R.Məmmədov orada satıcı işləyən, Elmira Məmmədovaya baş nahiyəsindən yumruqla xəsarət yetirərək, kassa aparatından 505 manat pulu əldə edərək, hadisə yerindən uzaqlaşmışdı.